विश्वकप २०१८

चीनया निंतिं जासुसी याःम्ह अमेरिकी अधिकारी ज्वन

चीनया निंतिं गुप्तचरी याःगु द्वपनय् अमेरिका डिफेन्स इन्टेलिजेन्स एजेन्सीया छम्ह पुलांम्ह कर्मचारीयात ज्वंगु दु । अमेरिकी न्याय मन्त्रालयं ५८ दँया रोन रक्वेल ह्यान्सेनयात ज्वनाः हिरासतय् कयागु खँ धाःगु दु । ह्यान्सेन अमेरिकाया बाह्य गुप्तचरी निकायया छम्ह पुलांम्ह कर्मचारी खः ।

चीनपाखे वनेत्यंगु इलय् ह्यान्सेनयात सियाटलया विमानस्थलं ज्वंगु खः । ह्यान्सेनं चीनया निंतिं अमेरिकाया गुप्तचरी यानाः च्यागू लाख डलर दां काःगु न्याय मन्त्रालयं दावी याःगु दु । तर चीनया छम्ह सैनिक अधिकारीं न्याय मन्त्रालयया थ्व धापूयात गैरजिम्मेवारीपूर्ण धकाः खण्डन याःगु दु ।

ह्यान्सेनयात सन् २०१३ निसें २०१७ तक निरन्तर अमेरिकी सैनिक व गुप्तचर गतिविधि लिसे सम्बन्धित सम्मेलनय् ब्वति कयाः अनया जानकारी चीनया सम्पर्क सूत्रयात बिउगु द्वपं बियातःगु दु ।अमेरिकी सहमहान्यायधिवक्ता जोन डेमेर्सं ह्यान्सेनं राष्ट्रिय सुरक्षायात धोखा बिउगु खँ धाःगु दु ।

चीनया निंतिं जासुसी याःगु द्वपनय् ह्यान्सन स्वयां न्ह्यः नं मेपिं तःम्ह अमेरिकी अधिकारीतय्त ज्वनेधुंकूगु दु । सिआईएया पुलांम्ह कर्मचारी जेरी चुन सिङयात नं थ्व हे महिनाय् चीनया निंतिं अमेरिकी राष्ट्रिय सुरक्षा सम्बन्धी जानकारी मुंकूगु द्वपं बियाः ज्वंगु खः । अथेहे चीनयात थज्याःगु हे जानकारी मिउगु द्वपनय् सीआईएया हे पुलांम्ह कर्मचारी केभिन म्यालोरी थौंकन्हय् भर्जिनियाय् मुद्दा फयाच्वंगु दु ।

सम्बन्धित बुखँ

LEAVE YOUR COMMENTS