विश्वकप २०१८

लाभकर विरुद्ध शेयर बजाः बन्द

येँ – हकप्रद व बोनस शेयरया आधार मूल्यय् हे लाभकर कायेगु आन्तरिक राजश्व कार्यालयया निर्णय विरुद्ध आन्दोलनय् कुहां वयाच्वंपिं लगानीकर्तातय्सं मंगलवाः नेपाल स्टक एक्स्चेञ्ज शेयर कारोवार याके मबिल ।मंगलवाः ज्याकू चालेवं हे उमिसं नेपाल स्टक एक्सचेञ्ज व धितोपत्र बोर्डय् धर्ना च्वनाः कारोवार याके मबिउगु खः ।

आन्दोलन यानाच्वंपिं लगानीकर्तातय्सं दलालतय् ज्याकू पाखें कारोवार जुइफु धकाः उमिगु ज्याकुथिइ तकं धर्ना च्वनाः कारोवार याके मबिउगु खः । लगानीकर्तातय्सं आन्तरिक राजश्व कार्यालयं हकप्रद व बोनस शेयरया आधार मूल्यय् लाभकर कायेत छ्वयाहःगु परिपत्र खारेज यायेमाःगु व ७.५ प्रतिशत अन्तिम कर माने यायेमाःगु थःपिनिगु माग पूमवंतले आन्दोलन जारी जुइगु खँ धाःगु दु ।

आन्दोलन लगानीकर्तातय् संगठन नेपाल इन्भेस्टर्स फोरमया अध्यक्ष अम्बिकाप्रसाद पौडेलं आन्तरिक राजश्व कार्यालयं छ्वयाहःगु परिपत्र सुनियोजित व लगानीकर्तातय्त भड्के यायेगु उद्देश्यं वःगु खँ धयादीगु दु । मंगलवाः जूगु कोणसभाय् न्ववासें वय्कलं थःपिनिगु निगू बुँदाया माग पूमवंतले न्ह्याथें ज्याःगु संघर्षया कार्यक्रम यायेगु जुइ धयादीगु दु ।

वय्कलं सरकारं बजेटपाखें हःगु ७.५ प्रतिशत पूँजीगत लाभकरयात हे अन्तिम कर माने यायेमाः धासें थुकिया निंतिं कानून हे हिलेमाःसां हिलाः व्यवस्था यायेमाः धयादीगु दु । आन्तरिक राजश्व कार्यालयं आइतवाः निसें आधारमूल्यय् लाभकर कायेगु निर्णय यायेवं लगानीकर्तात आन्दोलनय् कुहां वःगु खः । लगानीकर्तातय्सं आधार मूल्यय् लाभकर पुलेगु धयागु घाटा जुल धाःसा नं कर पुलेमाःगु जुइ धासें थुकथं कर पुलेफइमखु धयाच्वंगु दु ।

कोणसभाय् न्ववासें पौडेलं धयादीगु दु, ‘जिपिं आम्दानी व नाफाय् कर पुलेत तयार दु, तर घाटाय् ला कर पुलेफइमखु । नोक्सान जूबलय् नं कर पुलेमाः धयागु थ्व गज्याःगु नियम खः, गज्याःगु कानून खः ?’वय्कलं आन्तरिक राजश्वया परिपत्र कथं छुं नं हालतय् लगानीकर्तातय्सं कर पुलेफइमखु धयादीगु दु ।लाभकरविरुद्धया आन्दोलनय् लगानीकर्तातय् स्वंगुलिं संगठन छप्पँ जुयाः कुहां वयाच्वंगु दु ।

सेयर लगानीकर्ता संघया उपाध्यक्ष ताराप्रसाद फुल्लेलं न्हूगु सरकार वयेधुंकाः शेयर बजाः थहां वनी धकाः आशा यानागु जूसां सरकारया नीति व कार्यशैली लगानी मैत्री मजूगु खँ धयादिल । वय्कलं पूर्ण स्वचालित अनलाइन कारोवार प्रणाली नं घोषित मिति स्वयां छन्हु जक ढिला जुल धाःसा नं आन्दोलन यायेगु ख्याच्वः नं बियादीगु दु ।

कोणसभाय् न्ववासें पूँजीबजार लगानीकर्ता संघया नायः नवराज सुवेदीं अर्थमन्त्री डा. युवराज खतिवडा लगानीकर्ताप्रति अनुदार जूगु धासें वय्कःया राजीनामा माग यानादीगु दु ।

अर्थ मन्त्रालय लित कायेत तयार मदुनि
पँुजीगत लाभकर विरुद्ध लगानीकर्तात आन्दोलनय् कुहां वयाच्वंसां अर्थ मन्त्रालय धाःसा लगानीकर्तातय् माग पूवंकेत अझं तयार खनेमदुनि । अर्थ मन्त्रालयया पदाधिकारीत अझं आन्तरिक राजश्व विभागया परिपत्र लित कायेमाः धयागु पक्षय् मदुनिगु खँ सीदुगु दु ।

अर्थ मन्त्रालयया अधिकारीत पूँजीगत लाभकरया नामय् ताःई न्ह्यवनिसें कर सुचुकेगु ज्या जुयाच्वंगुलिं आःया परिपत्र अथें लित कायेमजिउ धयागु पक्षय् दु । अर्थ मन्त्रालययाया अधिकारीतय्सं मंगलवाः नं आन्दोलनरत पक्षया मागयात कयाः मन्त्तालयय् सहलह जुयाच्वंगु खँ जक धाःगु दु ।

मन्त्रालयया सहसचवि उत्तमकुमार खत्रीं छगू अनलाइनलिसे खँ ल्हासें आन्तरिक राजश्व विभाया परिपत्रयात कयाः लगानीकर्तातय्त गुकथं थुइकेगु धयागु बारे मन्त्रालयय् सहलह जुयाच्वंगु खँ धयादीगु दु । वय्कःया थ्व धापू स्वयेबलय् अझं नं अर्थ मन्त्रालय थ्व परिपत्र लित कायेत तयार खनेमदुनिगु खँ लगानीकर्तातय्सं धाःगु दु ।

मेखे सोमवाः छगू टेलिभिजन अन्तर्वार्ताय् धाःसा अर्थमन्त्री डा. युवराज खतिवडां पूँजीबजारय् वयाच्वंगु समस्या याकनं ज्यंकेगु पक्ष दु धकाः धयादीगु खः । वय्कःया थ्व अभिव्यक्तिं लगानीकर्तात मन्त्रालयं राजश्वया परिपत्र खारेज याइगु आशय् च्वनाच्वंगु दु ।

आधार मूल्यय् लाभकर छु खः

छुं नं कम्पनीं हकप्रद वा बोनस शेयर बिल धाःसा उकिया अंकित मू धयागु सछि तका जुइ । थ्व सछि तका वंगु शेयरयात निगूगु बजारय् यदि सछि तकां अप्वः कयाः मिल धाःसा सछि स्वयां अप्वःगु भाःयात आधार मूल्य धाइ । गथेकि यदि ‘क’ कम्पनीपाखें बिउगु हकप्रद वा बोनस शेयर यदि निगूगु बजारय् न्यासः तकां मिल धाःसा अंकित मू १००।– तकायात त्वःताः अप्वःगु ४००।– तकाया पूँजीगत लाभकर पुलेमालीगु जुइ ।

लगानीकर्तातय्सं थ्व हे पुँजीगत लाभकरया विरोध यानाच्वंगु खः । स्वयेबलय् हकप्रद वा बोनसय् ४००।– तका लबः कयाः मिउगु खनेदुसां निगूगु बजारय् सेयर कारोवार याइपिनिगु निंतिं गुबलें गुबलें घाटाय् लाःगु नं जुइफु । गथेकि ‘ख’ धाःगु कम्पनीया शेयर छम्ह लगानीकर्तां निगूगु बजारय् छगू कित्ताया १२००।– तकां झिगू कित्ता सेयर १२,०००।– तकां न्यानातल । ‘ख’ कम्पनीं छगू कित्ता बराबर छगू कित्ता हे यानाः बोनस शेयर बिल ।

बोनस वयेधुंकाः वयागु ल्हातय् २० कित्ता शेयर दत । तर छुं ई लिपा ‘ख’ कम्पनीया शेयर भाः कुहां वनाः ५००।– तका थ्यन । आः वयाके दुगु २० कित्ता शेयरया भाः मुक्कं १०,०००।– तका जक जूवल । वं थ्व २० कित्ता शेयर मीबलय् २०००।– तका घाटा फयेमाल । अथे खःसां आःया व्यवस्था कथं वं १० कित्ता बोनस शेयर काःगु मिउबलय् छगू कित्ताया ५००।– तकाया ल्याखं ५०००।– तकां मिउगु जूगुलिंं १० कित्ता शेयरया अंकित मू १०००।– तकाया त्वःताः अप्वःगु ४०००।– तकाया धाःसा लाभकर पुलेमालीगु जुइ ।

थथे घाटा जूगु शेयर नं लाभकर पुलेमालीगु जूगुलिं निगूगु बजारय् लगानी याइपिं लगानीकर्ता थ्व व्यवस्था छुं नं हालतय् खारेज यायेमाः धयागु माग यासें आन्दोलनय् कुहां वयाच्वंगु खः ।

सम्बन्धित बुखँ

LEAVE YOUR COMMENTS