विश्वकप २०१८

मनपाया ज्येष्ठ नागरिक स्वास्थ्य परीक्षण हाकनं शुरु

येँ – येँ महानगरपालिकां ज्येष्ठ नागरिकया स्वास्थ्य परीक्षणयात हाकनं निरन्तरता बिउगु दु । येँ मनपां थ्व हे वालंनिसें ज्येष्ठ नागरिकयात महानगर भत्तालिसें निःशुल्क स्वास्थ्य परीक्षण ज्याझ्वः न्ह्याकूगु खः । येँ मनपाय् निर्वाचित जनप्रतिनिधि वयेधुंकाः शुरु याःगु थ्व ज्याझ्वः निश्चित अवधिया निंतिं जूगु सम्झौता सिधयेवं दथुइ दिउगु खः ।

येँ मनपां छगू ज्याझ्वः यासें ज्येष्ठ नागरिक स्वास्थ्य परीक्षण सेवायात हाकनं निरन्तरता बिउगु खः । मनपां ग्वसाः ग्वःगु छगू ज्याझ्वलय् ज्याकुथिइ वये फुपिंत थःगु हे ज्याकुथिइ व ज्याकुथिइ वये मफुपिं ज्येष्ठ नागरिकयात छेँय् छेँय् वनाः स्वास्थ्य परीक्षण यायेगुकथं थुकियात हाकनं निरन्तरता बिउगु खः ।

ज्येष्ठ नागरिकया छेँय् वनाः स्वास्थ्य परीक्षण याइगु पुचलय् चिकित्सयात आवश्यक सहयोगीलिसें चिकित्सा उपकरणसहित छ्वयेगु योजना महानगरया दु । महानगरं छेँय् छेँय् स्वास्थ्य परीक्षणया निंतिं न्हिंन्हिं २० गू पुचः परिचालन याइगु जूगु दुसा छगू पुचलय् छम्ह चिकित्सकलिसें प्यम्ह स्वास्थ्य सहयोगी दइ ।

थनिं दछि न्ह्यः जूगु निर्वाचनं स्थानीय तहय् निर्वाचित जनप्रतिनिधि वयेधुंकाः येँ मनपां ८८ दँ च्वय्या ज्याथजिथिपिनिगु निंतिं जक उगु सेवा बिया वयाच्वंगु खः । आः वयाः महानगरं ७५ दँय् उमेर पुले धुंकूपिं जिथिपिं व ८० दँ पुलेधुंकूपिं ज्याथपिंत नं थ्व सेवा बीगु जूगु दु ।

ज्याझ्वलय् बिउगु जानकारीकथं महानगरं आः ७५ दँ पूरा जूपिं मिसा व ८० दँ पुलेधुंकूपिं मिजंतय् निंतिं निःशुल्क स्वास्थ्य परीक्षण नापं महानगर भत्ता वापत १२,००० तका दां नं बीगु येँ महानगरयालिकाया प्रमुख विद्यासुन्दर शाक्यं जानकारी बियादिल । चिकित्सा विज्ञान तथा राष्ट्रिय प्रतिष्ठानया उपकुलपति डा. गणेशबहादुर गुरुंगं ज्याझ्वलय् सहभागि ज्येष्ठ नागरिकया स्वास्थय परीक्षण यासें सेवा शुरु यानादीगु खः ।

येँ महानगरपालिकां थःगु कार्यक्षेत्र दुने च्वनीपिं सुं नं ज्येष्ठ नागरिकं ध्यबा मदयाः ल्वय् सुचुका च्वनेमाःगु अवस्था मवयेमा धइगु ल्याखं छेँय्छेँय् वनाः ज्येष्ठ नागरिकया स्वास्थ्य परीक्षण व उपचार सेवा बीगु व्यवस्था यानागु येँ महानगर जनस्वास्थ्य महाशाखा प्रमुख हरिकुमार श्रेष्ठं कनादिल ।

महानगरपालिकां ज्येष्ठ नागरिकया निंतिं थुगु सेवा न्हियान्हिथं सुथसिया १० ताःइलंनिसें सनिलया ५ ताःईतकया निंतिं बीगु जुइ । महानगरपालिकाया कथं येँ महानगर लागा दुने जक ६,९२२ ज्येष्ठ नागरिक दुगु प्रारम्भिक अनुमान दु ।

सम्बन्धित बुखँ

LEAVE YOUR COMMENTS