ध्याकुनय् लानाच्वंगु मच्छेनारायण

थौंकन्हय् मनमासया ई । मनमासं मच्छेगामय् मच्छेनारायण द्यःयाथाय् तःधंगु मेला जुइ । ऐतिहासिक, पुरातात्विक, धार्मिक व सांस्कृतिक दृष्टिकोणं थ्व लछिया ई महत्वपूर्ण जूसां खोज, अनुसन्धान व प्रचारप्रसारया कारणं धाःसा चन्द्रागिरि नगरपालिकाय् लाःगु मच्छेनारायण क्षेत्र धाःसा लिउने लानाच्वंगु दु ।

वैदिक सनातन धर्मय् व्याख्या यानातःकथं भगवान विष्णुया झिगू अवतारमध्ये दकलय् न्हापांगु मत्स्य अवतार कयाः थ्व हे थासय् वेदया रक्षा याःगु बाखं थीथी पुराणय् वर्णन यानातःगु दु । थन अधिकामासय् विशेष मेला लगे जुइ । मेमेगु इलय् ध्याकुनय् लानाच्वंसां मच्छेगामय् पुरुषोत्तम मास अर्थात मलमास (थुकियात अधिकमास, मनमास नं धाः)या इलय् धाःसा गाक्कं हुल जुइगु याः ।

थुगुसी वंगु जेठ २ गतेनिसें वइगु जेठ ३० गतेतक मनमास लानाच्वंगु दु । थ्व मनमासया इलय् मच्छेनारायण द्यःयाथाय् वइपिं भक्तजनतय् ल्याः गाक्कं अप्वया वनाच्वंगु मच्छेनारायण मेला व्यवस्थापन समितिं न्ह्यथंगु दु । चन्द्रगिरि नगरपालिका वडा नं. ९ लय् लानाच्वंगु थ्व तीर्थस्थतलया मेला व्यवस्थापनया निंतिं वडाअध्यक्ष देवेन्द्र महर्जनया अध्यक्षताय् छगू समिति नं गठन यानातःगु दु ।

समितियात ग्वाहालि यायेत स्वयमसेवक, प्रचारप्रसार, पार्किङ व्यवस्था, खाद्य सामग्री व सुचुकुचु यानाः न्यागस् उपसमिति नं गठन यानागु वडा सदस्य सुरेन्द्र केसीं जानकारी बियादिल । मेला शुरु जूगु दिंनिसें थौंतकया दुने नीगू लाख स्वयां अप्वः भक्तजन वयेधुंकूगु दु । विशेष यानाः शनिवाः व विदाया दिनय् छन्हुं हे स्वंगू लाख स्वयां अप्वः व मेगु दिनय् करिब छगू लाख भक्तजन वयेगु यानाच्वंगु वय्कलं कनादी ।

‘वि.सं. २०६७ सालंनिसें थुगु थाय्या ऐतिहासिक खोज अनुसन्धान शुरु यानागु दु, जर्मन सरकारया ग्वाहालिं अनुसन्धान यानाः माइक्रोफिल्मय् उतार जुयाच्वंगुया छुं प्रति प्राप्त यानाः सफू रुपय् प्रकाशन यायेगु तयारी यानागु दु’, मच्छेनारायण क्षेत्र विकास कोषया अध्यक्ष तकं जुयादीमह वडा सदस्य केसीं कनादिल । ऐतिहासिक व पौराणिक ग्रन्थय् मच्छेनारायणयात मीनतीर्थ धकाः न्ह्यथनातःगु दु ।

मत्स्य पुराण, हिमवत्खण्डया नेपाल महात्म्य, पुराषोत्तम मास महात्म्य लगायतया ग्रन्थय् मीनतीर्थया बारे व्याख्या यानातःगु दु । थनया गुरुयोजना दयेकाः धार्मिक पर्यटकीयस्थलया रुपय् विकास यायेगु तयारी नगरपालिकां याःगु दु । भगवान विष्णुं मत्स्य अवतार काःगु थाय् धकाः प्रचारप्रसार याये फत धाःसा विश्वया हिन्दू धर्मावलम्बितय्त थन आकर्षित याये फइगु कोषया धापू दु ।

मेलाय् वइपिं भक्तजनपाखें थीथी नामं शुल्क, चन्दा, ग्वाहालि आदि कायेगु दिकेत चन्द्रागिरि व किपू नगरपालिकाया नगर प्रमुख व उपप्रमुख सहित सुरक्षा निकायया बैठक तयाः निर्णय यानागु समितिं जानकारी बिउगु दु । थुगुसी सरकारया उच्च पदाधिकारी मध्ये कामु प्रधानन्यायाधिश दीपकराज जोशी व प्रधानसेनापति राजेन्द्र क्षेत्रीं मच्छेनारायणया दर्शन व अवलोकन भ्रमण यानादीगु समितिं जानकारी बिउगु दु ।

अथे हे प्रदेश नं ३ या मुख्यमन्त्री डोरमणि पौडेललिसें मन्त्रीत नं वइगु जानकारी प्राप्त जूगु समितिं न्ह्यथंगु दु । द्वापर युगय् भगवान कृष्णं अधिकमास जुयाच्वंगु इलय् थन वयाः स्नान व पुजा यात धाःसा मनकामना पूरा जुइ धकाः मेलाया शुरुवात याःगु धइगु जनविश्वास दु । किपू व सतुंग निगुलिं थासं मच्छेनारायण द्यःयाथाय् वने फइ ।

सम्बन्धित बुखँ

LEAVE YOUR COMMENTS