विश्वकप २०१८

उत्पादन यायेमफयाः हाकुपतासि विस्थापित जुइगु अवस्थाय्

ख्वप – हाकुपतासी थेंज्याःगु पिनें वइगु आयातित पर्सिं यानाः तानं थानातइगु हाकुपतासी नं तनावनीगु अवस्थाय् थ्यनावःगु दु । अथे नं नखः,चखः व जात्राबलय् जक सिनेगु चलन जुइधुंकूगु हाकुपतासी आः व थेंज्याःगु हाकुगु पर्सिं यानाः मदया हे वनी ला धयागु अवस्थाय् थ्यंगु खः ।

हाकुपतासी थाइगु उद्योग म्हो जुयाः माग कथं उत्पादन मजूगुलिं नं आयातित पर्सिं थाय् कया हयाच्वंगु खः । स्वदँ न्ह्यव ब्वःगु तःभुखाचं हाकुपतासी थाइगु तःगु घरेलु उद्योग बन्द जूगु खः । गुकिं यानाः नं हाकुपतासीया उत्पादन म्हो जुयाच्वंगु खः ।
झिंनिदँ दुबलय् निसें हाकुपतासी थाना वयाच्वनादीम्ह ख्वप लिवालीया सूर्यलक्ष्मी कोजुं धयादी, ‘यक्व ल्याखय् हाकुपतासी माल धकाः बजारय् माःवन धाःसा दइमखु ।

यक्व माल धाःसा दछि न्ह्यव हे अर्डर बियातयेमाः ।’थःगु छेँय् हे निगः तान तयाः हाकुपतासी थाना वयाच्वनादीम्ह कोजुं थौंकन्हय् छेँ थ्यंक काःवइपिंके तकं छत्वाः पर्सिया झिंप्यसलं मियाच्वंगु दु । थःम्हं थानागु पर्सि मीत बजाः माःवनेम्वाः धयादिसें वय्कलं धयादी, ‘मालाः मालाः छेँथ्यंक हे काःवइ । उत्पादन जक यायेफुगु खःसा यक्व कमे यायेफु ।’

अथेहे पुलांगु तानत माला हाकुपतासी थायेगु कारखाना चायेकादीम्ह ख्वपया धीरेन्दं मुलं नं भुखाय् लिपा खास हे हाकुपतासी उत्पादन याये फयाच्वंगु मदु । तान थाइपिं हे मवःगुलिं वय्कःयात समस्या जुयाच्वंगु दु । वय्कलं धयादी, ‘मेसिनं थानातःगु हाकुपतासी, व थेंज्याःगु मेमेगु पर्सि व तानं थानातःगु परम्परागत हाकुपतासी दथुइ यक्व फरक दइ धयागु खँय् मनूत सचेत मदु । उकिं यानाः परम्परागत हाकुपतासी तनावनीगु अवस्थाय् दु ।’

थौकन्हय् दँय् गुलि हाकुपतासी उत्पादन जुयाच्वंगु दु, गन गन हाकुपतासी थाइ धयागु छुं तथ्यांक मदु । हाकुपतासी संरक्षण व प्रविधि हस्तान्तरणया निंतिं छुं योजना नं कार्यान्वनय् वःगु मदु । हाकुपतासी उत्पादनक मुलं धयादी, ‘हाकुपतासी थेंज्याःगु परम्परागत वसः थायेगु प्रविधिया संरक्षण यायेगु जिम्मा सरकारं हे कायेमाः ।’

आधुनिकिकरणया थौं इलय् हाकुपतासी नं थीथी जात्रा पर्व, सभा समारोहय् पुनेगु फेसन थें जुयाच्वंगु दु । अथेखःसां आवश्यक कथं उत्पादन जुयाच्वंगु मदु, गुकिं यानाः हाकुपतासी थेंज्याःगु आयातित पर्सिं थाय् कयाच्वंगु दु । जात्रा पर्वय् जूसां हाकुपतासी सिनेगु चलन वयाच्वंसां थ्व सम्बन्धी प्रविध, इतिहास व संस्कृति संरक्षण यायेगु खँ धाःसा ठोस ज्या मजूगुलिं संस्कृतिकर्मीत चिन्तित दु ।

सम्बन्धित बुखँ

LEAVE YOUR COMMENTS