विश्वकप २०१८

राजनीतिइ अग्र्यानिक खेती ….. थौंया माग

थौंकन्हय् विश्वय् अभूतपूर्व ल्वय्त खने दया वयाच्वंगु दु । असाध्य । दीर्घ । गजब गजबगु ल्वय् । म्हिगःया ल्वय्या इतिहासय् थज्याःगु ल्वय्त खनेमदु । थौं ल्वय्या क्षेत्रय् अनेक उपचार विधित वइ । गुलिखे ल्वय्तय्त च्वतुक्क लायेके फयेधुंकल । तर नं विश्वय् ल्वय्या जोखिम म्हो मजूनि । न्हू न्हूगु ल्वय्या हाथ्यात लुया वइ । उपचारं न्ह्याये मदुगु ल्वय्या विकास जुया वइ । क्यान्सर, डिमनेसिया थेंज्याःगु ग्यानापुगु ल्वय् अप्वया वयाच्वंगु दु ।

थुपिं ल्वय्या उपचार जुइगु सम्भावना अझं मलूनि । चिकित्साशास्त्रया ख्यलय् जुइगु अनुसन्धानं धाइ विश्वय् लुया वयाच्वंगु थौंकन्हय्या ग्यानापुगु ल्वय्या मू कारण मनू स्वयम खः । मनूया सभ्यता, विकासया नामय् खने दयाच्वंगु अनेक विसंगति, विकृति, स्वार्थया कारणं न्हू न्हूगु ल्वचं जन्म कयाच्वंगु दु । मनूया सोच, जीवनशैली थथे हे विकृति, अराजकता, स्वार्थघता खने दया वन धाःसा अझ अनेतने ग्यानापुगु न्हू न्हूगु ल्वय्या जन्म जुइफु ।

ल्वय्या वासः जक लुइकां मजिउ । वासः लुइकेगु स्वयां ल्वय् हे मजुइकेगु बेस । ल्वय् जुइगुपाखें पनेमाः । वाःचायेकेमाः ।
खाद्य बजारय् थौं खने दयाच्वंगु दूषितिकरणं अनेक ल्वचं जन्म कयाच्वंगु दु । जन्म जुयाच्वंगु दु । बजारय् आम जनतां नइगु खाद्यवस्तु अधिकांश विषादियुक्त, अस्वस्थकर, अखाद्य रसायनया इन्जेक्सन बियाः सयेकातःगु तरकारि । नये मजिउगु रंग बुलातःगु बूबः केँत । मैन इलाः स्वयेजीकातःगु सिसाबुसात ।

थौं । राजनीतिक बजारय् समाजवादी, प्रजातन्त्रवादी, राष्ट्रवादीया नामं अनेक दलत खने दइ । सिन्का थेंज्याःगु तुसियात रासायनिक इन्जेक्सन बियाः चांचां हे झिगू केजीया यायेथें थौंकन्हय् छु छु रासायनिक राजनीतिक इन्जेक्सनं चांचां हे खसि, दुगुचा थेंज्याःपिं पार्टीत किसि पार्टीया रुपय् रुपान्तरित जुइ ।

प्लाष्टिकया जाकि, किटाणुनाशक वासः ह्वलाः ताजा यानातःगु सिसाबुसा, तरकारि । अखाद्य रसायन ल्वाकज्याःगु चिकं, घ्यः ।आम जनतां न्हियान्हिथं नयाच्वंगु छुं हे नं खाद्य सामग्री थौं जनस्वास्थ्यया निंतिं हानिकारक । जोखिमपूर्ण जुइ । थौं खने दयाच्वंगु खनेक दीर्घ, घातक ल्वय्त थज्याःगु हे विषादी अखाद्य खानां जुइ । चिकित्सक, वातावरणविद्तय्सं थःगु निष्कर्ष प्वंकी । थौंकन्हय् थज्याःगु हे खतरां सुरक्षित जुइत जैविक अर्थात अग्र्यानिक खेती प्रचारय् वइ ।

अग्र्यानिक खेतीं अन्नबाली, तरकारि, सिसाबुसा, प्राकृतिक, स्वस्थकर कृषि पद्दति नाला याइ । अखाद्य रासायनिक, वासः विषादी छ्यली मखु ।अग्र्यानिक उत्पादन स्वस्थकर जुइ । थौंकन्हय् अग्र्यानिक तरकारि, सिसाबुसा, अन्न बजारय् खने दइ । तर इपिं थिके जुइ । साधारण मनूतय् पहुँच दइमखु । ध्यबा दुपिंसं जक उपभोग याये खनी । फइ । सामान्य आम जनता आखिरय् बजारय् दुगु व हे अखाद्यवस्तु हे नयेत बाध्य जुइ ।

अनेक ल्वय्या शिकार जुइगु सम्भावनां आम जनतायात न्ह्याबलें ख्यानाच्वनी । जालय् तक्यंकी । छम्ह विश्व प्रसिद्ध वैज्ञानिक स्टेफन हकिंग्सं भविष्यवाणी याइ ‘थ्व दूषितिकरणं मुक्त मजुल धाःसा मनूत द्वःछि दँ लिपा संसारं अन्त्य जुइ । मनूया पुसा नं ल्यनी मखु ।’दुःखया खँ । खाद्य बजारय् दीर्घल्वय् कथं खने दयाच्वंगु थ्व विकृति थौं राजनीतिक बजारय् नं खने दइ । खने दयाच्वंगु दु । थौं ।

राजनीतिक बजारय् समाजवादी, प्रजातन्त्रवादी, राष्ट्रवादीया नामं अनेक दलत खने दइ । सिन्का थेंज्याःगु तुसियात रासायनिक इन्जेक्सन बियाः चांचां हे झिगू केजीया यायेथें थौंकन्हय् छु छु रासायनिक राजनीतिक इन्जेक्सनं चांचां हे खसि, दुगुचा थेंज्याःपिं पार्टीत किसि पार्टीया रुपय् रुपान्तरित जुइ । क्या गजबगु रासायनिक चमत्कार ! जादू !

अथे हे विषादी वासःत ह्वलाः गुलिखे दलतय्सं थःत सदाबहार, ताजा क्यनाच्वंगु दइ । दुनें दुनें स्यने धुंकूसां विषादीया भरय् तःत आकर्षक यायेत गुलिखे दलत प्रयत्नरत खने दइ । प्लाष्टिकया जाकि थेंज्याःगु दलत नं । मैन इलातःगु स्याउ थेंज्याःगु पार्टीत नं दु । थौं राजनीतिक बजारय् विकासे दलतय् स्थिति थ्व हे खनेदु । गुम्हं रासायनिक इन्जेक्सनया भरय् ।

गुम्हं विषादी वासःया भरय् । गुम्हं अस्वस्थकर रंगया लिधंसाय् थीथी राजनीतिक दलत राजनीतिक बजारय् वइ । खनेदइ । आम जनता । राजनीतिक बजारया उपभोक्ता । राजनीतिक बजारय् दुगु वस्तु हे उपभोग यायेत बाध्य । यःसां न । मयःसां न । धिचय् या । मगु छु विकल्प ? थौं राजनीतिक बजारय् दुगु थज्याःगु राजनीतिक नसा नयाः आमजनताया राजनीकि स्वास्थ्यग थे जुइ ? लिसः असाध्य, दीर्घ, गरिबी, शोषण, प्रतिगमनया ल्वय ।

अझ छु छु विध्वंशकारी ल्वय् थौंया थ्व राजनीतिक बजारं हइगु खः ? मसिउ । आम राजनीतिक उपभोक्ताया छु दसा जुइगु खः ? अनिश्चित ।थौं इलं फ्वनाच्वंगु दु । देय्या राजनीतिक खेती अग्र्यानिक विधिं यायेमाः । जुइमाः । इन्जेक्सन भरय् भीमकाय जुयां छु याये ? विषादीया भरय् सदाबहार जुइत स्वयां छु याये ? पिनें रंग इलाः रंगीन खयेकां छु याये ?

थज्याःगु ध्वं लायेगु विधिं राजनीतिज्ञतय् व्यापार वृद्धि जुइफु । तर आम जनताया राजनीतिक जीवन थुकिं शोषित जुइ । सिद्धान्त बांलानां मजिउ । विचारय् इमान्दारिता दयेमाः । विकासे इन्जेक्सन, विषादी, मैन, रंगया आधारय् राजनीतिक बजाः झः झः धायेकां छु याये ? अग्र्यानिक राजनैतिक खेती ईया माग खः ।

 

 

सम्बन्धित बुखँ

LEAVE YOUR COMMENTS