प्रहरीया चाला

नेपाःया प्रहरीया व्यवहार व इमिगु यातनाया बारे झी अनभिज्ञ मखु । झीसं विदेशय् च्वंपिं प्रहरीया व्यवहारयात स्वयाः नेपाःया प्रहरी तसकं निर्दयी जूगु संज्ञा बीगु याइ । तर विदेशय् च्वंपिं प्रहरी नं उलि सभ्य व सहयोगी धाःसा मजू । थुकिया लिपांगु छगू उदाहरण खः अमेरिकाया न्यूजर्सी सहरया घटना ।

न्यूजर्सीया छगू समुद्री सिथय् अज्याःगु हे छगू लज्या चायापुगु घटना जूगु दु । गुगु घटना नकतिनि हे सार्वजनिक जूगु खः । न्यूजर्सी छगू समुद्रया सिथय् च्वना च्वंम्ह छम्ह मिसायात प्रहरी न्यनेकने यायेगु त्वहः तयाः ल्हाः वाःगु घटना पिहां वःगु खः । घटनाकथं एमिली विनमेनं (२० दँ) थःत प्रहरी न्यनेकने यायेगु नामय् ल्हाः वाःगु जक मखु अश्लील व्यवहार याःगु द्वपं बिउगु दु ।

घटनाकथं समुद्र सिथय् च्वनाच्वंम्ह एमिलीयात अन रमनय् वःपिं छथ्वः प्रहरीं अय्लाः त्वनातःगु दु वा मदु धइगु जांच याःगु खः । प्रहरीं नं थःपिं जांच यायेत वयागु धाःगु खः । तर एमिली थम्हं अय्ला त्वनागु मदु धाःसां जांच लिपा नं वयात मानसिक तनाव बीत स्वल । वयां लिपा प्रहरी छक्वलं वयात ल्हाः वायेगु शुरु यात ।

न्यूजर्सी प्रहरीं जारी याःगु छगू भिडियोलय् एमिली प्रहरीपाखें तापाक वनेत स्वयाच्वंगु दु । अले व थम्हं अय्लाः मत्वनागु दावी नं याना वयाच्वंगु दु । थ्व दथुइ आकाझाकां छम्ह प्रहरी वया वयात समुद्रया सिथय् ग्वतुइका बी अले मेम्ह प्रहरीं ल्हाः वायेगु शुरु याःगु खः ।

उगु भिडियो अन हे वयाच्वंम्ह मेम्ह प्रहरीया म्हय् घानातःगु भिडियोलय् रेकर्ड जुयाच्वंगु खः । भिडियो सार्वजनिक जुइवं ल्हाः वायेगु ज्याय् संलग्न जूपिं प्रहरीयात निलम्बन याःगु दु ।

सम्बन्धित बुखँ

LEAVE YOUR COMMENTS