विश्वकप २०१८

३ नम्बर प्रदेश प्रचण्डया ल्हातय्

येँ, यल व ख्वप नापं १३ गू जिल्ला दुथ्यानाच्वंगु ३ नं. प्रदेशया राजधानी क्वःद्धी मफयाच्वंगु अवस्थाय् आः वयाः नांया बारे नं तीव्र वहस सुरु जुयावःगु दु । अस्थायी राजधानी कथं मकवानपुरया हेटौंडा कायम जुयाच्वंगु अवस्थाय् ख्वप, काभ्रे, नुवाकोट नापं चितवनया सांसद्तय्सं तकं थःथःपिनिगु जिल्लाय् हे स्थायी राजधानी तयेमाः धकाः माग याना यानाहःगु दुसां गन राजधानी तयेगु धइगु बारे क्वःछीगु उलि अःपुगु विषय धाःसा अवश्य नं मखु ।

राजधानी क्वःछीगु ज्या आःया अवस्थाय् नेपाल कम्युनिष्ट पार्टी (नेकपा)पाखें ह्वीप जारी यानाः दुई तिहाई बहुमतं पारित यायेफइगु अवस्था दुसां नं कन्हय् वनाः उकिं लाकीगु लिच्वःयात ध्यानय् तयाः पार्टीपाखें आधिकारिक रुपं छुं नं खँ पित हयाच्वंगु मदुनि । ३ नम्बर प्रदेशया राजधानी बारे क्वःछीत नेकपाया नेतातय्त गुलि थाकुयाच्वंगु दु व सिबें नं तःधंगु समस्या थुगु प्रदेशया नांया बारे जुयाच्वंगु दु ।

३ नम्बर प्रदेशया नांया सवालय् खस आर्य समुदायया नेतांनिसें सांसद्तय्सं अःपुक हे बागमती प्रदेश तयेमाः धयाच्वंगु दु । अले गुलि गुलिसिनं धाःसा राजधानी प्रदेश तयेदुसां जिउ धयाच्वंगु जूसां नं थुपिं फुक्कं अन्ततः वागमती प्रदेशय् सहमत जुइगु अवस्था दु । ३ नम्बर प्रदेशया न्हापाया एमाले आः नेकपाया नेवाः सांसद्तय्सं थ्व इलय् थुगु प्रदेशया नां नेपालमण्डल तयेमाः धकाः लबिङ यायेगु यानाच्वंगु दु ।

तर न्हापाया माओवादी केन्द्र आःया नेकपाया नेवाः सांसद्त धाःसा मौन च्वनाच्वंगु दु । अथे हे नेपाली कांग्रेसया नेवाः सांसद्तय्सं नं नेपालमण्डल हे नां तयेमाः धयाच्वंगु दु । वास्तवय् एमालेया नेतात मौन जुयाच्वंगु अवस्थाय् हे कांग्रेसया नेवाः नेतातय्सं नेपालमण्डल प्रदेश नां तयेमाः धकाः धायेगु याना वयाच्वंगु खः । थुगु प्रदेशया सांसद्त मुक्कं यानाः ११० म्ह खः । एमालेया छम्ह सांसद् हरिशरण लामिछाने मंत ।

छुं जुयाः ज्या मछिनीगु हे अवस्था वल धाःसा नेवाः–ताम्सालिङ–वागमती प्रदेश नां तयेत धाःसा अवश्य नं वय्कः तयार जुयादी धकाः आशा यायेथाय् दु । थौं केपी ओलीयात कन्भिन्स यायेफुम्ह नेता धइम्ह पुष्पकमल दाहाल हे जुयाच्वंगु खनेदु ।

उकिं आः १०९ जक सांसदत जुयाच्वंगु दु । थुपिं मध्ये नेवाः, तामाङ, आदिवासी जनजाति नापं यायेबलय् मुक्कं ५० म्ह सांसद दु । नेवाःत जक २८ म्ह दुसा तामाङत १२ म्ह सांसद दु । थुगु ल्याखं स्वल धाःसा जनजातित अल्पमतय् दु ३ नम्बर प्रदेशय् । जनजाति बाहेकयापिं हे बहुमत खनेदु । दलगत रुपं स्वल धाःसा नेपाल कम्युनिष्ट पार्टी (नेकपा) (पुलांगु एमाले व माओवादी केन्द्र) यानाः मुक्कं ८१ म्ह सांसदत दुगु खःसा लामिछाने मदुगुलिं आः ८० म्ह सांसदत दु ।

१०९ सांसदया दुई तिहाई बहुमत धइगु ७४ म्ह खः । थुगु ल्याखं स्वल धाःसा नेपाल कम्युनिष्ट पार्टी (नेकपा)या पक्षय् दुई तिहाई बहुमत दु । प्रदेश सभाया दुई तिहाई बहुमतं प्रदेशया नां तयेफइगु अवस्था दु । उकिं थ्व इलय् आः नेपाल कम्युनिष्ट पार्टी (नेकपा)पाखें छु याइगु खः उकिया हे आधारय् प्रदेशया नां च्वनीगु अवस्था दु । नेकपाया नेतातय्त सुनां कन्भिन्स यायेफइ इमिगु चाहना कथंया नां च्वनीगु खनेदु ।

३ नम्बर प्रदेशया नांया सवालय् नेवाः व तामाङत निगुलिं समुदायया अस्तित्व स्वीकार जुइगु कथंया नेवाः–ताम्सालिङ प्रदेश धकाः नां तयेगु नितिं अभियान न्ह्याकाच्वंगु दु । विशेष यानाः नेवाः देय् दबू व नेपाल तामाङ घेदुङया पहलय् नेकपा, कांग्रेस व संघीय समाजवादीया नेवाः व तामाङतय्गु जनवर्गिय संगठन दुथ्याकाः नेवाः–ताम्सालिङ समन्वय समिति हे दयेकाः अभियान न्ह्याकाच्वंगु दु ।

अथे हे न्हापा एमालेया सांसद आः नेकपाया नेवाः सांसदतय्सं धाःसा थ्व इलय् ऐतिहासिक पहिचानया आधारय् नेपालमण्डल प्रदेश नां तयेमाः धकाः अभियान न्ह्याकाच्वंगु दु । उमिसं न्ह्याकाच्वंगु अभियानप्रति तामाङतय्सं असहमति प्वंकाच्वंगु दु । थःपिनिगु अस्तित्व नं स्वीकार जुइगु कथं ताम्सालिङ नां दुथ्याये हे माः मखुसा कन्हय् कचमच जुइफुगु, तामाङतय्सं अस्वीकार यायेफु धकाः तकं धायेगु यानाच्वंगु दु ।

नेपालमण्डल ताम्सालिङ नां तःसां थःपिंत छुं पाइ मखु धकाः तकं तामाङतय्सं धासें आःया समस्या धइगु नेवाः दुने हे समस्या खः तकं धायेगु यानाहःगु दु । नेवाःत थ्व इलय् नेवाः ताम्सालिङ प्रदेशया पक्षय् खः ला कि नेपालमण्डल प्रदेशया पक्षय् खः धइगु खँय् छगू मत जुइ फयाच्वंगु मदु । छगू कथं नेवाःत विभाजित जुयाच्वंगु दु । ३ नम्बर प्रदेशय् जनसंख्याया ल्याखं दकलय् अप्वः खस आर्यत दु ।

अले निगूगु थासय् तामाङ खःसा स्वंगूगु थासय् नेवाः लानाच्वंगु दु । थ्व इलय् नेवाः व तामाङतय्गु दथुइ सहमति जुइ मफुत धाःसा नेवाः व तामाङतय्त ल्वाकाः बागमती प्रदेश नां तइगु सम्भावना अप्वः दु । उकिं थ्व इलय् नेवाःतय्सं तामाङतय्गु नं समर्थन कयाः न्ह्याः वनेमाःगु अवस्था दु । नेवाः व तामाङत छप्पँ जुया वनेफत धाःसा अवश्य नं अःपुक नां तयेफइ । मखुसा पहिचानया आधारय् नां तये फइगु अवस्था मदु ।

उकिं नेवाःत दकलय् अप्वः सचेत जुया वनेमाः । नेवाः—ताम्सालिङ नां तयेगु धइगु नेवाः व तामाङतय्गु पहिचानया आधारय् खःसा नेपालमण्डल धइगु ऐतिहासिक भौगोलिक आधारय् नां तयेगु खः । थौं नेवाः व तामाङतय्सं जक चाहाना याना कथं ३ नम्बर प्रदेशया नां धाःसा वइ मखु । थुकिया निर्णय याइगु निकाय धइगु प्रदेश संसद खःसा संसदयात निर्देशन बीफुगु पार्टी धइगु नेपाल कम्युनिष्ट पार्टी (नेकपा) खः ।

अले नेकपाया नेतात धाये धुनेवं थौंकन्हय् पार्टीया अध्यक्ष केपी शर्मा ओली व मेम्ह अध्यक्ष पुष्पकमल दाहाल खः । वय्कःपिं निम्ह मध्ये नं केपी शर्मा ओलीं नेवाः–ताम्सालिङ प्रदेश वा नेपालमण्डल प्रदेश नांया अःपुक स्वीकार यानादीम्ह नेता मखु धकाः सकसिनं सिउ । ्कःया चाहाना धइगु बागमती प्रदेश हे जुइ । अले पुष्पकमल दाहाल बहुपहिचानया स्वीकार यायेगु पक्षयाम्ह खः । उकिं वय्कलं नेवाः–ताम्सालिङ प्रदेश वा नेपालमण्डल प्रदेश नां तयेत स्वीकार याइगु सम्भावना दु ।

अले छुं जुयाः ज्या मछिनीगु हे अवस्था वल धाःसा नेवाः–ताम्सालिङ–वागमती प्रदेश नां तयेत धाःसा अवश्य नं
वय्कः तयार जुयादी धकाः आशा यायेथाय् दु । थौं केपी ओलीयात कन्भिन्स यायेफुम्ह नेता धइम्ह पुष्पकमल दाहाल हे जुयाच्वंगु खनेदु ।

अथे जुयाः आःया अवस्थाय् फत धाःसा नेवाः ताम्सालिङ, मखुसा नेपालमण्डल अले उलि नं मजूसा नेवाः–ताम्सालिङ–वागमती प्रदेश धकाः जूसां नां तयेगु कुतः यायेमाःगु अवस्था दु । थुकिया नितिं थ्व इलय् नापलायेमाःम्ह नेता धइम्ह हे प्रचण्ड खः धकाः थुइकेमाः । उकिं ३ नम्बर प्रदेशया नां तयेगु सवाल पुष्पकमल दाहाल प्रचण्डया ल्हातय् लानाच्वंगु दु धाःसां छुं पाइमखु ।

 

सम्बन्धित बुखँ

LEAVE YOUR COMMENTS