विश्वकप २०१८

अमेरिकायात जी सेभनपाखें व्यापार युद्ध जुइगु ख्याच्वः

एजेन्सी÷ शक्तिशाली देय्तय् संगठन जी सेभेनया अर्थमन्त्रीतय्सं अमेरिकायात आः व्यापार युद्ध जुइगु ख्याच्वः बिउगु दु । क्यानडाया विस्लरय् जूगु जी सेभेनया बैठकय् अमेरिकां स्टिल व एल्मुनियमय् कर अप्वयेकूगु खँयात कयाः अर्थमन्त्रीतय्सं थ्व ख्याच्वः बिउगु दु । जी सेभेनय् दुथ्याःगु न्हय्गू देय्या अर्थमन्त्रीतय् बैठकय् अमेरिका लिसे व्यापार युद्ध पनेगु निंतिं छुं ई जक ल्यं दनिगु ख्याच्वः नं बिउगु खः ।
बैठकय् इयु व क्यानडां नं अमेरिकी नीतिया प्रतिकार यायेगु ख्याच्वः बिउगु खःसा फ्रान्सं छुं न्हि लिपा हे व्यापार युद्ध सुरु जुइगु प्रति सकसिया ध्यानकर्षण याकूगु खः ।
मेखे अमेरिकी राष्ट्रपति ट्रम्पं धाःसा अझ नं थःगु निर्णयया बचाउ यानाच्वंगु दु । ट्रम्पं तःदँ न्ह्यवनिसें मेमेगु देशं व्यापार ख्यलय् अमेरिकाया शोषण यानाच्वंगु ट्विट याःगु दु । ट्रम्पं आःया कर नीतिं अमेरिकी स्टिल उत्पादकतय्त संरक्षण याइगु न्ह्यथँसें थ्व राष्ट्रिय सुरक्षाया निंतिं तसकं महत्वपूर्ण जूगु खँ धाःगु दु ।
तर बैठकय् सहभागी अमेरिकी अर्थमन्त्रीं धाःसा अमेरिकां विश्व अर्थतन्त्रया नेतृत्व त्वःतूगु मदुनि धासें मेमेगु देशं कयाच्वंगु चिन्तायात राष्ट्रपति ट्रम्पयाथाय् थ्यंकेगु खँ धाःगु दु ।
बिहीवा जक अमेरिकी वाणिज्यमन्त्रीं स्टिलय् २५ प्रतिशत व एल्मुनियमय् १० प्रतिशत कर अप्वयेकागु कार्यान्वयनय् वःगु खँ धाःगु खः ।
इयु, क्यानडा व मेक्सिकों थगुने थ्यंमथ्यं २३ अर्ब डलर बराबरया स्टिल व एल्मुनियम अमेरिकाय् निर्यात याःगु खः । थ्व थ्वयां न्ह्यः निर्यात याःगु ४८ अर्ब डलरया थ्यंमथ्यं बछि
जक खः ।
ट्रम्पं प्रशासनं एल्मुनियम व स्टिलय् कर अप्वयेकूगु कारणं इयु, क्यानडा व मेक्सिकों नं थःथाय् अमेरिकां वइगु सामानय् कर अप्वयेकेगु घोषणा याःगु दु ।

सम्बन्धित बुखँ

LEAVE YOUR COMMENTS