येँ – प्रधानमन्त्री केपी ओली चीन भ्रमणय् वने न्ह्यः हे नेपालय् चिनिया बैंक चालीगु सम्भावना खनेदुगु दु । थुकिया निंतिं चीनया एक्जिम बैंकं अर्थ मन्त्रालय व नेपाल राष्ट्र बैंकलिसे सहलह याःवःगु खँ धाःगु दु ।प्रधानमन्त्री ओली असारया न्हापांगु वालय् चीन भ्रमणय् वनेत्यंगु दु । चीनं थ्वयां न्ह्यव हे प्रारम्भिक खाका तयार यानाः नेपालय् बैंक चायेकेगु घोषणा यायेफुगु खँ चिनिया प्रतिनिधिलिसे खँ ल्हाःपिं अधिकारीतय्सं धाःगु दु ।
चीनं न्हापा नं नेपालय् बैंक चायेकेगु धया वयाच्वंसां थुखेपाखे गुबलें नं ध्यान तया मवयाच्वंगु खः । थ्व पालय् धाःसा एक्जिम बैंकया प्रतिनिधि हे नेपालय् वयाः खँल्हाबल्हा न्ह्याकूगुलिं बैंक चायेकेगु खँय् गम्भीर दुगु खँ अर्थ मन्त्रालयया अधिकारीतय्सं धाःगु दु ।एक्जिमया प्रतिनिधितय्सं वंगु वालय् अर्थमन्त्री डा. युवराज खतिवडायात नापलाःगु खःसा छुं न्हि न्ह्यव नेपाल राष्ट्र बंैकया गभर्नर व डेपुटी गभर्नरत लिसे खँल्हाबल्हा याःगु खः ।
उमिसं नेपालय् बैंक चायेकेगु प्रक्रिया, लाभांस यंकेगु नीति, लगानीया क्षेत्र आदि बारे न्यनेकने याःगु खँ धाःगु दु । राष्ट्र बैंकया डेपुटी गभर्नर शिवराज श्रेष्ठं नं एक्जिम बैंकया प्रतिनिधितय्सं राष्ट्र बैंकय् सहलह याःगु खँ धयादीगु दु । वय्कलं चिनिया प्रतिनिधियात नेपालय् बैंक चाकेगु खःसां लसकुस यायेत तयार दु धकाः धयाछ्वयागु खँ धयादीगु दु ।
डेपुटी गभर्नर श्रेष्ठं एक्जिम बैंक लिसें चीनया थीथी प्रान्तया बैंकतय्सं नं नेपालय् बैंक चायेकेत चासो तयाच्वंगु धयादिसें एक्जिम बैंक गम्भीर जुयाः वयाच्वंगु खँ धयादीगु दु ।नेपाःया वित्तीय क्षेत्रय् आःतक चीनया लगानी दुहां वःगु मदुनि । वाणिज्य बैंकय् भारतया लगानी धाःसा दु । नेपालय् व्यापार अप्वया वयेवं चीन नं बैंक चायेकेत उत्सुक जूगु खः ।
LEAVE YOUR COMMENTS