ने. सं. ११४४ चौलाथ्व एकादशी - कामदा एकादशी

सांसद विकास निर्माणया कार्यकर्ता मखु

थःगु हैसियत मसिउगु कारणं झीथाय् सदनय् त्याकावःपिं सांसदत आः नं थःगु गामय् बिजुली तयेमाल, हिति तयेमाल वा लँ पीच यायेमाल धइगु बाहेक नीति निर्माणया खँ ल्हायेगुलि लिपा हे लानाच्वंगु दु । थ्व वास्तवय् सही मखु । अझ वंगु जेठ १५ गते बजेट भाषण वयेवं ला झन् हे विनियोजित सांसदत तंम्वःगु दु । विनियोजित बजेटयात थःपिनिगु क्षेत्रय् लाकेगु कुतः उमिसं आः नं याना हे च्वंगु दनि ।

विकास निर्माणया ज्या वडा अध्यक्ष, गाउँपालिका प्रमुख वा जिल्ला समन्वय समितिया प्रमुखया खः । सांसदतय्के ला देसय् थीथी क्षेत्रया लागिं माःगु नीति निर्माण यायेगु थेंज्याःगु महत्वपूर्ण जिम्मेवारी दइ । उमिसं थःगु जिम्मेवारी थःपिसं म्हसीके फयाच्वंगु मदु । थ्वहे थौंया दकलय् तःधंगु विडम्बना जुयाच्वंगु दु ।

विकास निर्माण थेंज्याःगु आश्वासन चुनावय् बियावःगु कारणं हे आः लँ दयेकेगु, धः दयेकेगु, बिजुलीया लठ्ठा हयाबिइगु बाहेक उमि मेगु ध्यान वनाच्वंगु मदु । लँ दयेकेगु, धः दयेकाबीगु धयागु आश्वासन बियाः त्याकावःपिं जूगुलिं हे जनतां नं थ्वहे खँय् पिरे यायेगु यानाच्वंगु दु । सांसदतय्सं देय् हे विकास यायेगु निंतिं नीति दयेकेत थःपिं सदनय् वयापिं खः धइगु तकं थःपिसं स्पष्ट याये मफुनि । थ्व धयागु झी सांसदतय्सं थःपिनि हैसियत मसिउगु हे खः धाःसां पाइमखु ।

बजेट अधिवेशनयात नं नीति निर्माण यायेगु हे अवसर कथं कायेमाः । मखु उकियात बजेट थःपिनिगु हे ल्हातय् हयाः खर्च याये दयेकेगु हे जक स्वयेगु खःसा थ्व थें स्वार्थ वा नीति हीन ज्या मेगु जुइमखु जुइ । सांसदतय् ज्या थथे कार्यकर्ता जुइगु मखु ।

नीति वा राजनीति फुक्कं ज्याया जुजु वा राजा खः । राजनीति सफल रुपं न्ह्यज्यानाः सही नीति दयेके फत धाःसा देश याकनं विकास जुइ । निसः स्वसः दँ तक जुइ मफुगु विकास चीनय् कम्युनिष्ट पार्टीया सरकार वयेवं जुल । क्यूबा नाकाबन्दीया बावजुद नं आत्मनिर्भर जुयाः ५० दँ तक कम्युनिष्ट शासन निर्धक्क न्ह्यानाच्वन । अथेहे थीथी थासय् थीथी कथं देय् व जनताया पक्षय् ज्या यानाच्वंगु राजनीतिक पार्टीतय् भविष्य बांलाः ।

झीथाय् छुं छुं सांसदतय्सं बाहेक अप्व थें सांसदतय्सं निर्वाचन क्षेत्रयात बीगु बजेट अप्वयेके माःगु जक माग यानाच्वन । थ्व सही खँ खः हे मखु । थ्वयां न्ह्यः नं निर्वाचन क्षेत्रयात बिउगु बजेट थः कार्यकर्तायात पोषण याये ज्याय् जक लगे यात धयागु स्पष्ट खनेदुगुलिं थ्व बजेट हे खारेज हे यायेमाः धाःगु खः । तर वइगु आर्थिक दँया बजेटय् उकियात तुरुन्त खारेज मयासे स्थानीय निकाय व प्रदेशया निगरानीइ जक खर्च यायेमाःगु छगू प्रावधान तःगु दु ।

छगू हे पार्टीया सांसद, प्रदेश सांसद व स्थानीय निकायया मनू लात धाःसा ला बांलाइ । तर विकास निर्माण यायेगु ज्याय् तकं थ्व कम्युनिष्ट व थ्व कांग्रेस धकाः अलग यायेगु चलन दुगु झीगु देसय् संसारय् मदुगु प्रावधान दुत हःसां बांलाक ज्या धाःसा कायेफइगु खनेमदुनि । सुरुनिसें हे सदनयात विकास निर्माणया कार्यकर्ता दयेके मजिउ धइगु सः थ्वयेका वयाच्वंम्ह नारायणमान बिजुक्छेँ रोहितं थुगुसी निर्वाचनय् सहभागी मजूसे छम्ह अभिभावकया भूमिका म्हिताः नं उकियात निरन्तरता बियादिल ।

वय्कलं आः नं सदनयात विकास निर्माणया कार्यकर्ता दयेके मजिउ धयादीगु दु । थ्व ल्याखं सदन देय्या दकलय् उच्च तह व अन जूगु निर्णय धइगु कानून हे जुइगु कारणं थ्व पालन याये योग्य जुइमाः धइगु खः । विकास निर्माणया जिम्मा स्थानीय निकाययात हे लः ल्हायेमाः धयादीम्ह रोहितया छुं भचा माग थुगुसी स्थानीय निकाययात अधिकार सम्पन्न याःगुलिं नं स्पष्ट जूगु दु । लः, धः, त्वनेगु लः, बिजुली, शिक्षाया बन्दोबस्त, स्वास्थ्य सेवा नापं २२ गू थीथी विषय स्थानीय निकायया जिम्माय् वल धाःसां आः नं अधिकार वल तर उकिया पालना यायेगु कानून मवःनि ।

थःपिं न्हापांनिसें देय् व जनताया पक्षय् ज्या याना वयाच्वनापिं खः धकाः क्यनेगु हे झ्वलय् नेमकिपा बल्लाःगु ख्वपय् स्थानीय निकायपाखे आः शिक्षा लागाय् प्रगति यानाच्वंगु दु । बजेट स्थानीय लागापाखें ५० प्रतिशत खर्च यायेमाः धइगु माग नेमकिपां चुनावया इलय् वा आः नं तयाच्वंगु दु । तर थ्व इलय् १९ प्रतिशत जक बजेट शिक्षा ख्यलय् फ्यानाबिउगु दु । थुकिं नं छुं राहत चूलाकीगु ला आशा याःगु दु ।

अझ ख्वप नगरपालिकां ला थ्वहे महिनानिसें स्थानीय पाठ्यक्रम तयार यानाः ब्वंकीगु जुयाच्वंगु दु । हाले फुपिं हालीगु, ज्या यायेफुपिसं ज्या यायेगु व थीथी शीप व कला दुपिसं थःपिनि शीप व कला छ्यलेगु वातावरण दयावन धाःसा थ्व इलय् नं झीगु देसय् संसार न्यंकंया मनूत स्थानीय विकास निर्माण व संस्कृति स्वयेत वइगु खनेदु । आः धाःसा अथे जुइगु म्हो हे जक सम्भावना दु । थ्व इलय् आपालं मनूत सचेत व संगठित जुजुं वनाच्वंगु दु ।

विरामी जुइ न्ह्यः हे अस्पताल थ्यनाच्वंगु दु । शिक्षाया गुणस्तर थहां वनाच्वंगु दु । जीवनय् गनं छुं मसिउपिं मनूत नं भ्रमण यानाः जूसां थीथी थाय्या बारे न्यनेकने यानाः सयेकेगु सिइकेगु यानाच्वंगु दु । जीवनया मू थुइकेगु थें महत्वपूर्णं पक्ष मेगु छु हे दइ धकाः थ्व ज्या थौं न्हूगु पुस्तां सयेकाच्वंगु दु । शिक्षा व स्वास्थ्य निःशुल्क यायेगु धकाः २०६३ सालया अन्तरिम संविधानय् हे उल्लेख जूसां आः तकं कानून तयार मजूगु कारणं शिक्षायात दां पुलाः न्यायेमाःगु स्थिति दु ।

वासः न्यायेमाःगु कारणं बिरामी लनीगु स्वयां तच्वः जुइगु व सीगु तकं जुयाच्वंगु दु । थज्याःगु थीथी मापमलाय् आः नगरपालिका, वडा व जिल्ला समन्वय समितिं ध्यान तयेमाः । छाय्धाःसा सदन, सांसद व प्रतिनिधिसभाया ज्या विकासे कार्यकर्ता जुइगु कडापी मखु । उमिसं छु नीति तयार यात धाःसा थ्व देसय् याकनं विकास व निर्माण यायेफइ, जनतायात सुख सुविधापूर्वक गथे यानाः तयेफइ धइगु हे ध्यान तयेमाःगु खः ।

अथे मखुसे सुं मनुखं थःत छुं ग्वाहालि यात धाःसा व प्रति जक मोहित जुइगु व वयागु तुति पालि भपुइगु थेंज्याःगु कूप्रथा वा सामन्ती संस्कार थौंया मखु, म्हिगःया जुजुया पालाया खः । उकिं नं थ्व इलय् जनता सचेत व संगठित जुयाः बजेट अधिवेशनयात नं नीति निर्माण यायेगु हे अवसर कथं कायेमाः । मखु उकियात बजेट थःपिनिगु हे ल्हातय् हयाः खर्च याये दयेकेगु हे जक स्वयेगु खःसा थ्व थें स्वार्थ वा नीति हीन ज्या मेगु जुइमखु जुइ । सांसदतय् ज्या थथे कार्यकर्ता जुइगु मखु ।