छम्ह नेपाःमिया भागय् २८ द्वः त्यासा

येँ – नेपाःया आन्तरिक व बाह्य त्यासा जक च्यागू खर्ब ४३ अर्ब थ्यंगु दु । थ्व ल्याखं छम्ह नेपाःमिया भागय् नीच्याद्वल मल्याक त्यासा लाःवंगु दु । नकतिनि जूगु आर्थिक सर्वेक्षणं छम्ह नेपाःमिया भागय् नीच्याद्वलं मल्याक त्यासाया भार लाःसां थुकिं चिन्ता हे कायेमाःगु अवस्था धाःसा मदुगु खँ अर्थविद्तय्सं धाःगु दु ।

अर्थविद्तय्सं सार्वजनिक ऋणया कुल गार्हस्थ उत्पादनया २८ प्रतिशत थ्यंगु धयागु अर्थतन्त्रया निंतिं चिन्ता कायेमाःगु खँ मखु धाःगु दु । लिसें उमिसं थज्याःगु त्यासा धाःसा उत्पादनमूलक व रोजगारीमूलक क्षेत्रय् लगानी यायेमाःगु खँय् बः बिउगु दु ।नेपाःया त्यासा सरकारं पितबिउगु आर्थिक दँ २०७५÷७६या बजेट नं चालु खर्चया बराबर धयाथें दु । सरकारं थ्व आर्थिक दँय् नं थप प्यंगू खर्ब २५ अर्ब त्यासा कायेगु कथं बजेट दयेकातःगु दु ।

अर्थविद् केशव आचार्यं धयादीगु दु, ‘थ्व त्यासा थःथवय् तःधंगु समस्या मखु । तर थ्व त्यासा गुकथं छ्यलेगु, गन लगानी यायेगु धयागु खँय् भर परे जुइ । थ्व ध्यबा तलब नकेत, मन्त्रीया गाडी गयेत खर्च यायेगु खःसा तसकं खराब जुइ । तर थ्व त्यासां पुँजी अप्वयेकल, उत्पादन अप्वयेकल व आयात म्हो यानाः निर्यात अप्वयेकल धाःसा झीत तसकं फाइदा जुइ ।’

नेपाःया विकास निर्माणया ज्याय् त्यासाय् महत्वपूर्ण भूमिका दुसां त्यासा काःथें आर्थिक वृद्धिदर नं अप्वयेकेमाःगु खँ अर्थविद् शंकर शर्मां धयादिल । वय्कलं धयादीगु दु, ‘थ्व ल्याखं झीसं आर्थिक वृद्धिदर भचा अप्वयेकेमाःगु दु । ७ प्रतिशत तक आर्थिक वृद्धिदर थ्यंकेफत धाःसा थ्व त्यासा याउँक पुलेफइ । तर आर्थिक वृद्धिदर मजुल धाःसा झीगु त्यासा पुलेगु क्षमता नं म्हो जुयावनी ।’

पुँजीगत बजेट खर्च अप्वयेकेगु क्षमता मन्त धाःसा वःगु त्यासा सदुपयोग मजुइगु व थुकिं त्यासा भार जक अप्वयेकीगु जूगुलिं खर्च अप्वयेकेत अर्थविद्तय्सं सरकारया ध्यानाकर्षण नं याःगु दु । अथेहे आन्तरिक त्यासा अप्वः काल धाःसा निजी क्षेत्रं कायेखनीगु त्यासा म्हो जुइगु व थुकिं आयात अप्वयेकीगु व निर्यात प्रतिस्पर्धी यायेमफइगु जूगुलिं गुलि फु उलि म्हो जक आन्तरिक त्यासा कायेमाःगु सुझाव नं अर्थविद्तय् दु ।

सम्बन्धित बुखँ

LEAVE YOUR COMMENTS