हिरोइन जूपिं मिस नेपालत
हिन्दी फिल्म ख्यलय् ब्यूटी कन्टेस्ट त्याकावःपिं हिरोइनत यक्व दु । तर नेपाली फिल्म ख्यलय् धाःसा थथे ब्यूटी कन्टेस्ट त्याकावःपिं हिरोइनत उलि मदुनि । खय्त ला नेपालय् थज्याःगु ब्यूटी कन्टेस्ट शुरु जूगु नं उलि मदुनि । दकलय् सकलय् न्हापांगु ब्यूटी कन्टेस्ट धइगु हे सन् १९९४ य् मिस नेपालया नामं जूगु खः । हिडन ट्रेजरया ग्वसालय् जुया वयाच्वंगु थ्व कासा आः तक नीस्वक्वः जुइधुंकल ।
सन् १९९४य् जूगु दकलय् न्हापांगु कासाय् मिस नेपाल जुइत ताःलाःम्ह रुबी राना खः । अले रुबी राना हे फिल्मय् पलाः न्ह्याकूम्ह दकलय् न्हापांम्ह मिस नेपाल खः । थौंसिबें नीदँ–नीन्यादँ न्ह्यः राजेश हमाललिसे “अनमोल” नांयागु फिल्म म्हितूगु खःसा व धुंकाः सुनिलदत्त पाण्डेलिसे “भुतुक्कै भएँ नि” नांयागु फिल्म म्हितल ।
तर थ्व निगुलिं फिल्मं स्वकुमिया नुगः त्याके मफुत । अनं लिपा वं मेगु हे लजगाः ज्वन । रुबी रानां लिपांगु इलय् वयाः “अन्तराल” फिल्मया लुखां हाकनं छक्वः फिल्मय् इन्ट्रि यात, अले “आधी बाटो” व “शिशा” नांयागु फिल्म नं म्हितल तर सपोर्टिंग रोलय् रिइन्ट्रि जुइत याःगु कुतः नं ताःलाये मफुत ।
थुकथं दकलय् न्हापांम्ह मिस नेपालया फिल्म यात्रा ताःमलातसा आः थगुनेया मिस नेपाल निकिता चण्डकं नं फिल्मपाखे पलाः न्ह्याकाः मिस नेपालतय्गु फिल्म यात्रायात निरन्तरता बीगु ज्या याःगु दु ।
अजुचायापुसे च्वंगु खँ ला छु धाःसां मिस नेपाल हे जुइत ताःलाःपिं बाहेक मेमेगु ब्यूटी कन्टेस्ट त्याकूपिं वा मिस नेपालय् ब्वति कयाः मेमेगु उपाधी त्याकूपिं धाःसा फिल्मय् दुहां वःगु उलि खनेमदु खय्त ला निकितां म्हितेगु धकाः क्वछिउगु “रानी महल” फिल्मया बारे उलि बांलाःगु खँ पिहां वयाच्वंगु मदु, अय्सां निकिताया नं हिरोइन जुइगु इच्छा दु धइगु खँ थुकिं क्यंगु दु । थथे कलिउडय् हिरोइन जूपिं मिस नेपालतय्गु यात्रा स्वयेगु खःसा उलि ताःलाःगु धाःसा खनेमदु । आः तक मुक्कं नीस्वम्ह मय्जुपिं मिस नेपाल जुइधुंकलसा उकी गुम्हेसिनं कलिउडय् दुहां वनेगु कुतः याःगु खनेदु ।
अजुचायापुसे च्वंगु खँ ला छु धाःसां मिस नेपाल हे जुइत ताःलाःपिं बाहेक मेमेगु ब्यूटी कन्टेस्ट त्याकूपिं वा मिस नेपालय् ब्वति कयाः मेमेगु उपाधी त्याकूपिं धाःसा फिल्मय् दुहां वःगु उलि खनेमदु । उकी मध्ये सन् १९९७ य् झरना बज्राचार्य मिस वल्र्ड नेपाल जूगु इलय् फस्र्ट रनर अप जूम्ह मिनाक्षी वन्दना शर्मा छम्हेसिनं हे जक फिल्मय् अभिनय याःगु दु, तर नेपाली फिल्मय् मखु, हिन्दी टेलिसिरीयलय् ।
मिनाक्षीं भारतय् “हम फिर मिलेंगे”, “करीना करीना”, “कीट्टो” नांयागु छुं छुं हिन्दि टेलिसिरीयल म्हितल तर वयागु पलाः नं अन क्वातुइ मफुत ।
मिनाक्षी मय्जु फस्र्ट रनर अप जूबलय् मिस वल्र्ड नेपाल जूम्ह झरना बज्राचार्य मय्जुं कलिउडय् जक मखसे बलिउडय् तक नं हिरोइन जुइगु कुतः यात । नेपालय् शुटिंग जूगु हिन्दि फिल्म “लभ ईन नेपाल”य् तकं म्हितूम्ह झरनाया न कलिउड यात्रा सुथां लात, न त बलिउड यात्रा हे ।
“हतियार” नांयागु फिल्मय् डेब्यू याःम्ह झरना बज्राचार्यं “शुभकामना”, “कोही मेरो”, “सिउँदोको सिन्दुर”, “भाईटिका”, “संजीवनी” थेंज्याःगु झिगू झिंन्यागूति फिल्म म्हितल तर हिट हिरोइनया दर्जा काये मखं । उकीसनं झरनाया “सेफ ल्याण्डिंग”, “रंगीन मनशाय” व “दिदी बहिनी” थेंज्याःगु फिल्मत पिहां हे वयेमफुबलय् वयात कयाः फिल्म दयेकीपिं हे मदया वन ।
झरनां लिपा वनाः “सेफ ल्याण्डिंग” फिल्मया प्रोड्युसर राहुल अग्रवाललिसे इहिपा यानाः जीवनया सेफ ल्याण्डिंग यात ।
आः तकया दुने मिस नेपाल जूपिं मध्ये रुबी राना, सुमी खड्का, झरना बज्राचार्य, मलिना जोशी, सृष्टि श्रेष्ठ धुंकाः आः वयाः निकिता चण्डकं कलिउडय् हिरोइन जुइगु कुतः यातसा मेपिंसं थथे मयाः । खय्त ला सन् २००२ या मिस नेपाल माल्भिका सुब्बां हिरोइन् जुइगु कुतः मयाःगु ला मखु तर वं म्हितूगु न्हापांगु फिल्म “गुडबाई काठमाण्डौ” नांयागु फिल्म रिलिज हे मजूबलय् वयागु हिरोइन जुइगु इच्छा अथें तुं लात ।
मेम्ह मिस नेपाल सुमी खडकां नं “ग्रहण” नांयागु फिल्मया लुखां थःत हिरोइनया रुपय् न्ह्यब्वयेगु कुतः यात । थ्व फिल्मया बनेज्या ताःमलात । अनं लिपा भुवन के.सी. थेंज्याःम्ह नांजाःम्ह स्टारं सुमीयात “सुपरस्टार” फिल्मय् हिरोइन दयेकल । थ्व फिल्म नं फ्लप हे जूबलय् सुमी खड्काया यात्रा दित ।
कलिउडय् थ्व दँबदँ न्ह्यः खनेदयेकः वःपिं निम्ह मिस नेवाः धइपिं मलिना जोशी व सृष्टि श्रेष्ठ खः । सृष्टि श्रेष्ठयात थःगु न्हापांगु हे फिल्म “गाजलु” ई अनमोल के.सी. थेंज्याःम्ह लोकंह्वाःम्ह हिरोया हिरोइन जुइगु ह्वःताः चूलात । फिल्म नं सुपर हिट हे जुल । तर वयागु मेगु फिल्म धाःसा पिदंगु मदुनि । थौंकन्हय् सृष्टि मय्जु थःगु फिल्मी क्यारियर सिबें कलिउडया हिरो सौगात मल्ललिसेया यःत्यःया यात्राय् न्ह्याः वनाच्वंगु खनेदु ।
अथे हे मलिना जोशीं नं सन् २०१३ य् “ऋतु” फिल्मं न्ह्याकूगु यात्रा “झुम्की”, “संरक्षण”, “लीला” व “द वीनर” थेंज्याःगु आपालं फिल्म तक थ्यंकूसां वयागु पलाः नं आःतक थातय् लायेफुगु मदुनि । थुकथं न्ह्यानाच्वंगु मिस नेपालतय्गु हिरोइन जुइगु यात्रा आतक उलि ताःलाःगु खने मदुनिसा कलिउडय् थःगु पलाः न्ह्याकूपिं मेमेपिं मध्ये माल्भिका सुब्बां लिपा वनाः फिल्म प्रोड्युसरया रुपय् “हाउ फन्नी” फिल्मय् लाय् तःगु खनेदतसा रुबी रानां लिपा वनाः क्यारेक्टर आर्टिस्ट जुइगु तकं कुतः यात ।
थुपिं बाहेक जेनिशा मोक्तान, उषा खड्गी, ईशानी श्रेष्ठ नं फिल्मलिसे स्वापू तःपिं मिस नेपालत खः । आपाःसिनं थः मिस नेपाल जुइधुंकाः फिल्मय् स्वापू क्वातुकेगु स्वःगु खनेदुसा सन् २०१३ या मिस नेपाल ईशानी श्रेष्ठं धाःसा थः मिस नेपाल जुइसिबें यक्वः हे न्ह्यः मचाबलय् हे बाल कलाकारया रुपय् कलिउडय् पलाः न्ह्याकूगु खः ।
एक्शन स्टारया रुपय् नांजाःम्ह शिव श्रेष्ठया मेन रोल दुगु “लक्ष्मण रेखा” नांयागु फिल्मय् बाल कलाकार जुयाः म्हितूम्ह ईशानी श्रेष्ठ उगु दँय् नेपाल चलचित्र संघं ग्वसाः ग्वःगु मोशन पिक्चर एवार्डय् बेस्ट चाइल्ड आर्टिस्टया सिरपाः तकं त्याकेत ताःलाःगु खः । अथे हे सन् २००९ या मिस नेपाल जेनिशा मोक्तानं आर्यन सिग्देल व नम्रता श्रेष्ठ दुगु “मेरो एउटा साथी छ” नांयागु फिल्मय् साइड रोल म्हितूगु दुसा सन् २००० या मिस नेपाल उषा खड्गी नं कलिउडय् इन्ट्रि जुइत्यंगु दु ।
उषा मय्जु धाःसा हिरोइन, साइड हिरोइन वा छुं नं कथंया आर्टिस्ट जुयाः मखसे छम्ह फिल्म प्रोड्युसर जुयाः कलिउड दुहां वयेत्यंगु खः । खय्त ला उषा खड्गीं छुं छुं म्युजिक भिडियो व विज्ञापन फिल्मय् म्हितूगु दु तर फिल्मय् धाःसा कलाकारया रुपय् मखसे प्रोड्युसरया रुपय् पलाः न्ह्याकेत्यंगु खः ।पूर्व मिस नेपाल उषा खड्गीं दयेकेत्यंगु फिल्मया नां “आउँदै जाँदै” खः ।
थ्व फिल्मया डाईरेक्टर मेपिं सुं मखसे उषाया हे जहान जि.पि. तिमल्सिना खः । छम्ह सञ्चारकःमिया रुपय् नांजाःम्ह जि.पि. तिमल्सिनाया फिल्म निर्देशकया रुपय् न्हापांगु पलाः कथं न्ह्याइगु थ्व फिल्मया पलाः धाःसा आःतकया दुने औपचारिक घोषणा ज्याझ्वःसिबें अप्वः न्ह्याःवंगु मदुनि । थुकथं स्वयेबलय् नेपाःया फिल्म ख्यलय् मिस नेपालपिंसं न्ह्याकूगु छुं नं कथंया पलाः उलि ताःलाःगु खनेमदुनि धइगु खनेदु ।
LEAVE YOUR COMMENTS