विश्वकप २०१८

झीसं काये सयेकेमाः भिटामिन ‘ई’या लबः

झी सकसिनं सिउगु हे खँ खः कि भिटामिन्स झीगु म्हयात मदयेक मगाः । प्रत्येक भिटामिनया थःगु अलग हे महत्व दु । भिटामिनं झीत जुइगु थीथी ल्वय्पाखें झीगु म्हयात तापाक तयातयेत ग्वाहालि यानाच्वनी । भिटामिन ई नं झीगु म्हयात स्वस्थ यानातयेत महत्वपूर्ण भूमिका म्हिताच्वंगु दइ । भिटामिन ईया सेवनं म्हयात यक्व हे कथंया ल्वय्लिसे ल्वायेत ग्वाहालि चूलाइ ।

बजारय् दइगु थ्यंमथ्यं दक्व हे स्किन केयर प्रोडक्ट्सय् भिटामिन ई छताजि मदयेक मगाःगु तत्वया रुपय् दयाच्वनी । छाय्कि थुकिं ‘स्किन’ व ‘हेयर’यात ‘हेल्दी’ दयेकेगुया लिसेलिसें ‘स्ट्रेच माक्र्स, पिंपल्स’या दाग मदयेकाः ‘ड्राइ स्किन’पाखें मुक्ति बी ।
थुपिं फाइदा बाहेक भिटामिन ‘ई’इ दुगु ‘एन्टिअक्सिडेन्टं’, ‘एजिंग’या दक्वं चिं मदयेकाछ्वयेत नं ग्वाहालि याइ ।

यदि छि गबलें गुगुं केमिस्टया पसलय् वनाः ‘स्किन लोशन’ अथवा ‘अन्दर आइक्रिम’ माल धकाः धाःवन धाःसा वं नं छितः भिटामिन ‘ई’या क्याप्सुल ख्वालय् बुलेगु सल्हा बी । उकिं लिबाका च्वनादीमते, भिटामिन ईयात छिं नं थःगु जिन्दगीया अंश दयेकादिसँ । भिटामिन ई मगात कि मांसपेशिइ कमजोरी वइ, मिखा बुलुया वनी । भिटामिन ई झीगु म्हयात मदयेक मगाः । थुकिं म्हय् ह्याउँगु हिकोष दयेकेगु ज्या याइ ।

थुकिं म्हय् कोलेस्ट्रोलया स्तरयात नियन्त्रणय् तयातइ । थुकिं मानसिक रुपं त्यानुगु नं लंकी । थुकिं यानाः शारीरिक फाइदा जक मखु, सौन्दर्य लाभ नं जुइ । भिटामिन ‘ई’इ एन्टिएजिंग गुण दु । थुकिया छ्यलाबुलां छ्यंगुलिइ ‘ग्लो’ वइ । ला हय्हय्कुं मजुयावनी । भिटामिन ईया चिकं नं छिं डाइरेक्ट मालिस याःसां जिउ । अथवा फेसप्याक दयेकूसां जिउ । झासँ सिइके, भिटामिन ई या मेमेगु फाइदा ।

छाय् माःगु भिटामिन
# भिटामिन ई ह्याउँगु हिकोष दयेकेत ज्या वः । थुलि बाहेक भिटामिन ई पिनेया कवच वा सेल मेमब्रेनयात दयेकातइ । सायद छिं मसिउ जुइ, तर ला मदंनिबलय् बूम्ह मचा (प्रिमेच्योर इन्फायन्ट) याके भिटामिन ई मगातकि हि मगाइगु जुइ । थुलि तक कि मस्तय्त व वयस्क मनूतय्त भिटामिन ई मगातकि न्यूरोलोजिकल समस्या जुइफु ।

भिटामिन ईया स्रोत
वाउँचा तरकारि, सियातःगु काजु, पेस्ता थेंज्याःगु मसला, चाकुहि, सलगम, ख्यें, अं, ब्रोकाउलि, छ्व, बूब, बीबी आदिइ भिटामिन ई दइ । थ्व दक्वं चीज नयाः झीसं भिटामिन ई म्हय् गाकातयेफइ ।

छ्यंगूया निंतिं फाइदा
भिटामिन ई छ्यंगूया निंतिं यक्व हे फाइदा दुगु चीज खः । थ्वं छ्यंगूया सी धुंकूगु सेल्स व हाकुगु चातःयात लिकयाछ्वयेगु ज्या याइ । लिसें थ्व : छ्यंगूयात नाइसे व तुइसे च्वंकेत ग्वाहालि याइ ।

मानसिक तनावपाखें मुक्ति
म्हयात माक्व भिटामिन ई चूलानाच्वन धाःसा मानसिक समस्या कम जक जुइ । अले तनावपाखें नं मुक्ति दइ । धाथें ला छुं छुं रिसर्चं सीदये धुंकूगु दु कि भिटामिन ई मगातकि नं मानसिक समस्या जुइफु ।

क्यान्सरयात पनातइ
भिटामिन ई क्यान्सर थेंज्याःगु ग्यानापुगु ल्वय्लिसे ल्वायेत नं ज्या वः । क्यान्सरयात पनातयेत छ्व, केँ, बूबःबीबः व काजु पेस्ता थेंज्याःगु मसला नयेगु याना च्वनेमाः । थज्याःगु आहाराय् दुगु भिटामिन ईं छितः नुगःल्वय् व क्यान्सर थेंज्याःगु ल्वय् मजुइकातइ ।

ह्याउँगु हि कोष दयेकी
भिटामिन ईं ह्याउँगु हिकोष दयेकी । प्वाथय् दुम्ह मिसा भिटामिन ईया सेवन मयात धाःसा वं बुइकीम्ह मचायात एनिमिया (हि मगाइगु ल्वय्) जुइगु खतरा दइ ।

भिटामिन ई मगातकि
– बहनी मिखां बांलाक खनी मखु ।
– म्हया क्वँय् बमलानावनी ।
– आकाझाकां हि वइगु जुयावइ ।
– घाः लात धाःसा याकनं हि दी मखु ।
– गर्मिबलय् न्हासि वइ ।
– थ्व मगातकि झीगु म्हय् भिटामिन ‘ए’ नं कम जुयावनी ।

नोट ः प्राकृतिक स्रोतं चूलाःगु भिटामिन ईं हे जक झीत फाइदा याइ । अथे जूगुलिं गुलिफु उलि भिटामिन ई दुगु नसाज्वलं नयेगु यायेमाः ।

सम्बन्धित बुखँ

LEAVE YOUR COMMENTS