जयबागेश्वरी लुँहितिया अस्तित्व खतराय्

येँ – थनया जय बागेश्वरीइ च्वंगु ऐतिहासिक लुँहितिया अस्तित्व खतराय् लानाच्वंगु दु । विश्व सम्पदा धलखय् दुथ्यानाच्वंगु पशुपति क्षेत्रय् लाःगु उगु लुँहिति आः पुवंकं फोहोर व लखं जायाच्वंगु दु । येँया लुँहिति व यलया लुँहिति दयेके स्वयां सलंसः दँ न्ह्यः दयेकातःगु उगु लुँहितिइ २०३५ साल तक लः वयाच्वंगु खः ।

थ्वयां लिपा अप्वया वंगु शहरीकरणया हुनिं लः हायेगु दिउगुु खँ पशुपति क्षेत्र विकास कोषया पुलांम्ह सदस्य सचिव गोविन्द टण्डनं कनादिल । वय्कःया कथं जयस्थिति मल्लया पालय् दयेकूगु उगु लुँहिति चन्द्रशम्शेरं जीर्णोद्वार याःगु शिलालेख नं दु ।
वि.सं. २०४४ सालय् कोषया स्थापना जुइधुंकाः छकः सुसाःकुसा यायेगु ज्या याःगु खःसां अनं लिपा धाःसा वायेत्य–फ्वायेत्य यायेगु ज्या जूगु खँ नं वय्कलं कनादीगु दु ।

जयबागेश्वरीया लुँहिति संरक्षण यायेगु निंतिं पशुपति क्षेत्र विकास कोष लगायत थीथी निकायय् वनाः ग्वाहालि फ्वनागु खःसां नं संरक्षण यायेगु ज्या मजूगु खँ स्थानीय विजयगोपाल बैद्यं कनादीगु दु । पुरातात्त्विक महत्त्वया उगु हितिइ थीथी द्यःया मूर्ति दुगु जानकारी नं वय्कलं बियादीगु दु ।

सम्बन्धित बुखँ

LEAVE YOUR COMMENTS