निदँ जक २ प्रतिशतं ब्याज

भुखाय् पीडित जनतायात राष्ट्र बैंकं झंगः लात

येँ – २०७२ सालया तःभुखां छेँ दुंपिं पीडिततय्त राहत कथं २ प्रतिशत ब्याज कयाः त्यासा बीगु धकाः अबले सरकारं नीति आः वयाः फासांफुसुं जुइगु अवस्था वःगु दु । सरकारं बी धाःगु थ्व २ प्रतिशत ब्याजया त्यासा पीडिततय्सं काये मफइगु कथंया नीति नेपाल राष्ट्र बैंकं हःगु दु ।

थज्याःगु त्यासा न्हापा झिदँया निंतिं बीगु धकाः नीति दयेकूगु खःसां आः वयाः निदँया लागिं जक बीगु धाःगुलिं धाथें पीडिततय्सं उगु राहत काये मखनीगु अवस्था वःगु दु । थज्याःगु त्यासा बीत न्हापा हे वाणिज्य बैंकतय्सं अनिच्छा क्यनाच्वंगु खःसा आः राष्ट्र बैंकया हे नीतिं यानाः नं बी मफइगु स्थिति वःगु खः ।

राष्ट्र बैंकया प्रवक्ता नारायणप्रसाद पौडेलं राष्ट्र बैंकया कार्यविधि कथं निदँ स्वयां अप्वः पुनरकर्जा बी मजिउगु कारणं अज्याःगु त्यासाया अवधि निदँ जक जुइगु खँ ‘नेपालभाषा टाइम्स’ यात कनादिल । नेपाल बैंकर्स संघया अध्यक्ष ज्ञानेन्द्रबहादुर ढुंगानां धाःसा राष्ट्र बैंकया थुगु कार्यविधि हे गलत जूगु खँ कनादीगु दु ।

वय्कःया कथं न्हापा खुला खुलाय् पुनरकर्जा नवीकरण यायेगु व्यवस्था दुगु खःसा थ्व न्ह्याक्व ई तक नं यायेगु जिउगु व्यवस्था दुगु खः, आः राष्ट्र बैंकं नीति संशोधन यानाः निदँया व्यवस्था याःगुलिं भुखाचं पीडित जनता मर्काय् लाःगु खः । वय्कलं धयादी, ‘थ्व वास्तवय् नेपाल सरकारं भुखाचं पीडित जनतायात झंगः लायेगु ज्या याःगु दु ।’

अथेहे पुनर्निर्माण प्राधिकरणया पुलांम्ह प्रवक्ता यमलाल भुसालं नं राष्ट्र बैंकं हःगु थ्व नीतिं यानाः जनतायात समस्या जुइगु खँ कनादीगु दु । थुकिया बारे राष्ट्र बैंकलिसे सहलह जुइधुंकूगु खँ कँसें वय्कलं धयादी, ‘न्हापा त्यासा कायेधुंकूपिनिगु निंतिं जिमिसं छगू पोलसी दयेकागु दु, तर आः मेपिं छेँ दने ल्यं दनीपिनिगु निंतिं छु यायेगु धइगु बारे नं सहलह जुयाच्वंगु दु ।’

.थ्व समस्याया बारे प्रधानमन्त्रीयात समेत जानकारी याकेगु खँ नं वय्कलं कनादिल ।बैकर्स संघया अध्यक्ष ढुंगानां राष्ट्र बैंकं हःगु नीतिया कारणं न्हापा त्यासा कायेधुंकूपिं नं पीडित जुइ धासें राष्ट्र बैंकं याकनं थुकी पुनर्बिचार यायेमाःगु खँय् बः बियादीगु दु ।राष्ट्र बैंकं हःगु न्हूगु नीति कथं भुखाय् पीडितयात निदँ तक जक २ प्रतिशत ब्याजं त्यासा बीगु जुइ, निदँ लिपा उकिया ब्याज बैंकया प्रचलित ब्याज दर सरह जू वनी ।

थुकिया बारे ढुंगानां धयादी, ‘‘निदँया निंतिं त्यासा बीत समस्या मदु तर वयां लिपा ऋणीं १४ प्रतिशत पुलेमाल धाःसा समस्या जुइफु । जिमिसं हे १२ प्रतिशत तक पुलाः ध्यबा हयाच्वनागु दु, गथे यानाः २ प्रतिशत ब्याजं बीफइ ?’मेखे थःगु नां कने मयःम्ह छगू बैंकया ऋण अधिकृतं राष्ट्र बैंकया नीतिया कारणं न्हापा त्यासा कायेधुंकूपिंत नं आः बांमलाःगु लिच्वः लाइगु सम्भावना दु ।

बैंकं ५० हजार तका आम्दानी दुम्ह मनुखं लय् २५ हजार तका पुले फइगु विश्लेषण यानाः त्यासा बीधुंकूगु दु तर आः राष्ट्र बैंकया नियम कथं निदँ लिपा वं लय् ४२ हजार तका पुले मालीगु अवस्था वयेफु गुगु सम्भव मखु ।

मेखे राष्ट्र बैंकं २०७२ जेठ १३ गते जारी याःगु भूकम्प प्रभावित छेँजःयात आवासीय छेँ पुनर्निर्माणया निंतिं बीगु पुनरकर्जा कार्यविधि २०७२’ या ५ नम्बर बुँदाय् थज्याःगु कर्जा न्युनतम अवधि ५ दँ व अधिकतम अवधि १० दँ तकया जुइ धकाः न्ह्यथनातःगु दु । तर आः वयाः उकियात निदँय् क्वकाःगु दु ।

येँया दलाछीइ च्वंम्ह भुखाय् पीडित प्रमेशबहादुर श्रेष्ठं थम्हं बैंकय् त्यासाया निंतिं प्रोसेश न्ह्याकागु खःसां आः राष्ट्र बैंकया न्हूगु नीतिं यानाः त्यासा कायेत अन्यौल जूगु खँ कनादिल । न्हापा झिदँया निंतिं २ प्रतिशत दरं त्यासा बी धाःगुलिं आः निदँ जक २ प्रतिशत धाःगुलिं छु याये छु याये जूगु खँ नं वय्कलं कनादिल ।

राष्ट्र बैंकया नीतिया कारणं छेँ दनेगु खः कि मखु धइगु बारे परिवार दुने सहलह यानाच्वनागु जानकारी नं वय्कलं बियादिल ।
अथेहे मेम्ह भुखाय् पीडित ज्ञाणिकमान दिपकर नं २ प्रतिशत ब्याजं त्यासा दइ धकाः थम्हं नं बैंकय् प्रोसेश न्ह्याकागु जानकारी बिसें थः नं आः अलमलय् लानाच्वंगु खँ कनादीगु दु ।

सम्बन्धित बुखँ

LEAVE YOUR COMMENTS