सतक जाम व चिब्याःगु तां ज्यान जोखिमय्

पूर्वाधार विकासया आयोजना तयार यायेगु इलय् दीर्घकालीन आवश्यकता व परिपूर्तिया सामञ्जस्यताय् ध्यान बी मफुगुलिं यानाः स्वनिगःया सर्वसाधारणं थःगु ज्यान बचे यायेत तकं थाकुया वयाच्वंगु दु । सतकय् लँ त्वाः ल्हायेबलय् जुइमा वा ताँ प्रयोग यायेबलय् हे छाय् मजुइमा सर्वसाधारणं थःगु ज्यान जोखिमय् तयाः यात्रा यायेमाःगु बाध्यता दु । सतक तब्या यायेगु ज्या जूसां लँजुवाःतय् निंतिं पैदलमार्ग धाःसा मदु ।

दुगु थाय् नं अतिक्रमण यायेगु ज्या जुयाच्वंगु दु । दँदँ न्ह्यवंनिसें निर्माण सम्पन्न जुइमफुगुलिं अस्तव्यस्त जुयाच्वंगु निर्माण सामाग्रीपाखें बचे जुयाः लँजुवाःत जुइमाःगु स्वनिगःवासीतय् नियति जूगु दु । स्वनिगलय् मोटर चले जुइगु ताँया हालत नं अथे हे दु । ताँ दु, पैदलमार्ग मदु । सतक तब्या जू तर ताँ चिब्या जुयाच्वंगु दु । थ्व समस्या स्वनिगःवासीतय्सं फयाच्वंगु दु । थज्याःगु हे समस्या फया वयाच्वंम्ह ल्हुतिया शंकर शर्मां धयादी, ‘येँया सतक व ताँय् वनेबलय् मुटु हे थासय् मलाइथें जुइ ।’

ताँ जुल ‘बोटलनेक’
अप्वःथें थासय् जुइगु सवारी जामयाया लिउने ताँय् दुगु ‘बोटलनेक’ हे प्रमुख कारण खः । सतक तब्या जूसां नं ताः निर्माण यायेगु इलय् ध्यान बी मफुगुलिं जःखःसाया थासय् अप्वः सवारी साधन ताःहाकः हे झ्वःछुइमाःगु अवस्था दु । येँया बिजुलीबजार, बानेश्वर, तीनकुने खण्डया जामया कारण नं ताँ हे जूगु दु । अथे हे कालिमाति परोपकार क्षेत्रय् तकं सवारी ताःहाकः जाम जुइगुया लिउने तां हे मुख्य कारक खः । ल्हुति व नयाँ बजार स्वाइगु ताँ नं उकथं हे सवारी साधन जामया कारण जुयाच्वंगु दु ।

अथे हे बालाजु बाइपासं तारकेश्वर नगरपालिका दुहां वनेगु ताँय् जुइमा वा सिंहदरवार हनुमानथान पूर्वपाखेया ताँ, विदाया दिनय् नं लँजुवाःतय्त समस्या जुइकथं जाम जुइगु यानाच्वंगु दु । थुपिं ताँय् लँजुवाःतय् निंतिं धकाः पैदलमार्ग मदु । अथे हे गौरीघाट क्षेत्रय् दयेकूगु ताँ ‘सिंगल लेन’या जूगुलिं अन जुइगु जामया खँ हे त्वःते सवारी साधनयात तकं ताःईतक पियाच्वनेमाःगु बाध्यता दु । लँजुवाःतय्सं वैकल्पिक मार्ग मालेत बाध्य जुइमाः तर विकल्प धाःसा मदु ।

सतक विस्तार प्रक्रिया शुरु जूगुयालिसें ताँ निर्माणय् ध्यान बीमाःगु खःसां नं बजेटया अभाव व निर्माण व्यवसायीतय्सं इलय् ज्या याना मबीगुलिं यानाः समस्या ब्वलनाच्वंगु खः ।निर्माण व्यवसायीं इलय् ज्या याना मबिउगुलिं तीनकुने, बिजुलीबजार, कालिमाति–परोपकार व ल्हुति तां निर्माणय् यक्व हे ई काये धुंकूगु दु । बिजुलीबजार ताँ बाहेक मेगु ताँ निर्माणया जिम्मा पप्पु कन्स्ट्रक्सनं कयातःगु दु । सतक विभाग, पुल महाशाखाया कथं तीनकुने ताँ १२ करोड, कालिमाति–परोपकार व ल्हुतिया ताँ खुगू–खुगू करोडय् ठेक्का बियातःगु दु ।

वंगु आर्थिक दँय् हे निर्माण जुइमाःगु तीनकुने व परोपकार–कालिमातिया ताँ आतकया दुने ३० प्रतिशतया हाराहारीइ जक क्वचाःगु दु । बालाजु–नयाँ बजार स्वाइगु ताँया ज्या ला शुरु तकं जूगु मदुनि । बबरमहल व बिजुली बजारया ताँ निर्माण न्ह्यानाच्वंसां क्वःछिनातःगु इलय् पूवनीगु छाँट मदु ।ताँय् तसकं सवारी साधनया झ्वःछुइगु इलय् ट्राफिक प्रहरीयात ट्राफिक व्यवस्थापन यायेगु ज्याय् तकं समस्या जुयाच्वंगु दु, गुकिया कारणं यात्रुत मारय् लायेगु नापं स्वनिगःया मुख्य सतक तकं अस्तव्यस्त जुइगु याः ।

४५ ताँ महानगरया जिम्मा
पुल महाशाखां येँ महानगरपालिकाया ४५ गू ताँया व्यवस्थापन व मर्मतसम्भार यायेगु जिम्मा येँ मनपायात बीत्यंगु दु । महाशाखा प्रमुख नापं उपमहानिर्देशक अर्जुनजंग थापां स्थानीय सरकारयात अधिकार लःल्हायेगु केन्द्रीय सरकारया नीतिकथं सडक विभागं स्वयावयाच्वंगु ताँयात स्थानीय तहय् लःल्हायेत्यनागु जानकारी बियादिल । सडक विभाग अन्तर्गत स्वनिगलय् मोटर चले जुइगु ४८ गू ताँ दु ।

ताँया तथ्यांम मदु
स्वनिगलय् दुगु पुलांगु ताँया छुं नं तथ्यांक मदुगु कारणं मर्मतसम्भारय् समस्या जुयाच्वंगु दु । ‘न्हापा छु प्रविधिं गथे यानाः दयेकल धइगु तथ्यांक मदु’ विभागया सिनियर डिभिजनल इन्जिनियर नरेशमान शाक्यं धयादिल ।
तथ्यांकया अभावय् ताँया आयु गुलि खः व मर्मतसम्भार गुकथं यायेमाःगु खः धकाः पत्ता लगे यायेत तकं समस्या जुयाच्वंगु वय्कःया धापू दु ।

पैदलमार्ग अभाव
सर्वसाधारणं ताँ पुलाः वनीगु इलय् ज्यान जाखिमय् तयाः वनेमाःगु बाध्यता दु । स्वनिगःया अधिकांश ताँय् पैदलमार्ग मदु । थुकिं नागरिकयात ताँ पुला वनीगु इलय् न्ह्याबलें सास्ती फयेमालाच्वंगु दु ।
गौरीघाट क्ष्ओत्रय् दयेकातःगु ताँ, शोभाभगवती व हनुमानथान पूर्वया ताँ, न्यत व डल्लु स्वाइगु ताँय् पैदलमार्ग मदुगुलिं स्वनिगःवासीतय्त ताँ पुलाः वनेत समस्या जुयाच्वंगु दु । सतक पार यायेबलय् दकलय् अप्वः जोखिम लँजुवाःतय्त जेब्रा क्रसिङय् दु थें ताँ पुलेगु इलय् नं नागरिकयात जाखिम जुइगु पुल महाशाखाया अध्ययनं क्यंगु दु ।

अदूरदृष्टिया कारण समस्या
अर्थ सचिव शंकरप्रसाद अधिकारी आयोजना छनोटय् दीर्घकालीन दृष्टिकोण मदुगु कारणं विकास निर्माण व आवश्यकताया सामञ्जस्यता जुइ मफुगु धयादी । वय्कःयाकथं जनसंख्या व ट्राफिक अप्वइ धइगु दीर्घकालीन सोच मदुगु कारणं स्वनिगःया सतक जनमैत्री जुइ मफुगु खः । ‘बजेट विनियोजन यायेबलय् यक्व थासय् ह्वलेमाःगु बाध्यतां तःधंगु व तब्यागु ताँ दयेके मफुत । प्राथमिकताया लिधंसाय् स्वयां नं राजनीतिक दबावया कारणं आयोजन क्वःछित ।

थ्व अस्वस्थ प्रवृत्ति भ्रष्टाचार स्वयां नं खराब जुया वन, गुकिया कारणं बजेट विनियोजन दक्ष मजुल व समस्या हे अप्वः दत’ वय्कलं धयादिल । अर्थसचिव अधिकारीं उच्चस्तरया राजनीतिनक प्रतिवद्धतासहित निश्चित अनुशासनदुने च्वनाः आवश्यकताया लिधंसाय् आयोजना छनोट यानाः कार्यान्वयनय् यंकेमाःगुलिइ बः बियादिल । वय्कलं धयादिल, ‘आयोजना छनोट व स्रोतया परिचालन प्राविधिक प्रक्रिया खः, थुकियात थुइकेमाः ।’

सम्बन्धित बुखँ

LEAVE YOUR COMMENTS