विश्वकप २०१८

पूँजीवादी माक्र्सवाद, माक्र्सवादी पूँजीवादया सौन्दर्य शास्त्र

थन । मलय् चाःहिउ वये । छुं न्यायेगु विचारं मखु । थनया बजाः गथे च्वं ? मनूतय् अभिरुचि छु गज्याःगु ? सीके मास्ति वइ । वसः, पुँसा धइगु कापः, आकारया खँ जक जुइमखु । पुनीम्हेसिया सोच, विचाः नं वं पुंगु वसतं पिज्वयेका बी । अझ ई, सोच गुखेर न्ह्यानाच्वन उकिया नं व संकेट जुयाच्वनी ।

मलय् छम्ह मय्जु खनी । पाइन्टय् । तर पाइन्टया डिजाइन असामान्य । पाइन्टया निपा तुति सामान्यतया छगू हे साइज, बुत्ता, कापःया जुइ । तर । मय्जुं न्ह्यानातःगु पाइन्ट अथे मखु । छपा तुतिइ छगू रंग, डिजाइनया । मेगु तुतिइ मेगु हे रंग, बुट्टाया । गजब । छम्ह हे मनुखं न्ह्यानातःगु छगः हे पाइन्टया तुति निगू रुप, निगू संसार । निगू संसारया योग ।

आकाश–पातालया मिलन । गठबन्धन । एकता । छगः हे पाइन्टय् । क्या गठबन्धन ! क्या एकता ! दृश्य रोचक !
तर खँ । दृश्यया जक मखु । दृश्यं ईयात गुखेर यंकाच्वन । न्ह्याकाच्वन । छगः हे पाइन्टया निपा तुतिया आनकातान पाःगु रंग, बुट्टा स्वये । कौतुहल जुइ । अथे हे पुलि गूगु,, थाय्थासय् झुलिझुलि वंगु पाइन्ट न्ह्याइपिं ल्याय्म्हपुस्ता नं गाक्कं खनेदइ ।

थज्याःगु पाइन्टत स्वयेबलय् जक भ्वाथः, झुलिझुलि । तर थुकिया मू तस्सकं हे थिके हँ !अजीबगु वसः, पहिरनत खनी । मचाबलय्या खँ लुमनी । गुंपुन्हिबलय् । जिमि छेँ क्वं ख्यालःत हइ । झुलिझुलि वंगु भांग्राया वसः पुनातःपिं वइ । रंगीविरंगी पहिरन । निपा तुतिइ निथी हे लाकां न्ह्यानाः वइ । जिपिं । इमित स्वस्वं हाले ‘हय् वँय्, खिचा क्वें ।’ खूब हाले । न्ह्यइपुसे च्वनी ।

म्हिगःया सामाजिक, सांस्कृतिक मान्यता, सौन्दर्यशास्त्र थौं हिला वंगु दु । न्हू न्हूगु सौन्दर्यशास्त्रया उदय जुयाच्वंगु दु । सौन्दर्यशास्त्रया न्हू न्हूगु विधान लूगु दु । आः निपा तुतिइ निथी लाकां न्ह्यायेगु चलन वइ ।

गुंपुन्हिबलय् विसंगत धंगं वसः पुना वइपिंत ‘वँय्’ धाइ । ‘हय् वँय्, खिचा क्वें’ धकाः लापा थानाः हायेके । न्ह्यइपुके । नुगः हे याउँसे च्वनी ।थौं । थन अजीबगु पाइन्ट न्ह्याना वःपिं खनी । छगः हे पाइन्ट । तर पाइन्टया निपा तुति, निगू रंगया । निथी बुट्टाया । उकिसनं पुलिइ खुनातःगु । झुलिझुलि गंगु पाइन्ट न्ह्यानाः ल्याय्म्ह ल्यासेत मस्त ।

मचाबलय् गुंपुन्हिया ख्यालः स्वयाः हालेगु लुमनी । ‘हय् वँय्, खिचा क्वें !’ नुगल्य् थ्वइ । तर थःगु लुमन्ति अनया वातावरणय् ‘हाई !’ प्रतिध्वनीत जुइ । जि थःत हे वं अःखः धयाच्वंथें च्वनी । ‘हय् वँय्, खिचाः क्वें ।’ अनया वातावरणय् जि स्वयम ‘खिचाया क्वें’ थें च्वनाबी ।जितः छगू घटना लुमनी । छक्वः । पासायाथाय् वने । पासां जितः खनेवं धाइ ‘का हुँ, हुँ थनं, अल्छिन जुल ।’

जि अजू चाल । जि खनेवं छाय् वं अथे धाल । ‘छाय् ?’ जिं न्यने । वं जिं न्ह्यानातइगु लाकां क्यन । लाकां निपा निथी जुयाच्वन खनी । जिं मचाः । हथाय्पथाय्सं न्ह्याना वयागु । जितः मछाःसे च्वन । लाकां त्वयाः लाकां मन्ह्यासे हे छेँय् लिहां वया । मती लुइ । लँय् खंपिंसं छु धाल जुइ ?’ गुंपुन्हिबलय् थम्हं तितिसलं हालेगु न्हाय्पनय् थ्वइ ‘हय् वँइ्, खिचा क्वें ।’

छम्ह । उत्तर आधुनिक विद्वानं धाइ । ‘वँय्या परिभाषा समाज, संस्कृति, शक्तिया निर्माण खः । व शास्वत मखु । जुइमखु । जब गुगुं मान्यता शक्तिशाली जुइ ‘वँय्’ खः मखुया परिभाषा उकिं क्वःछी । न्ह्याकी । छु लक्षिण, छु अलक्षिण । उकिं विचार याइ । म्हिगःया सामाजिक, सांस्कृतिक मान्यता, सौन्दर्यशास्त्र थौं हिला वंगु दु । न्हू न्हूगु सौन्दर्यशास्त्रया उदय जुयाच्वंगु दु ।

सौन्दर्यशास्त्रया न्हू न्हूगु विधान लूगु दु । आः निपा तुतिइ निथी लाकां न्ह्यायेगु चलन वइ । छपा तुतिइ बुट व मेगु तुतिइ चप्पल न्ह्याःसां ‘हाई हाई’ धायेके फइ । अलक्षिणा धायेकेमाली मखु । छगू हे रंग, छगू हे बुट्टया पाइन्ट छगू हे प्रकारया लाकां न्ह्याइपिंत बरु ‘हय् वँय् खिचा क्वें’ धाइगु ! न्हूगु गुंपुन्हि पर्व न्ह्याय । आधुनिक ख्यालः लुइ । मेगु खँ ।

थौंकन्हय् ध्यबा दुपिनि मस्तय्सं नं झुलिझुुलि वंगु, झ्याजः दंगु पाइन्ट न्ह्याना जुइ । व्यवहारय् झुलिझुलि वंगु वसः, झ्याजः दंगु लं गरिब दुःखीपिंसं फीत बाध्य जुइ । वर्गीय विभेदया समाजय् वसः, पहिरनं नं वर्गीय विभेदया संकेत यानाच्वनी । तर थौंकन्हय् पूँजीपति वर्गं नं झुलिझुलि व झ्याजः दंगुयात थःगु यानाः गरिबीयात नं थःगु सौख, विलाशीताया विषय याःगु दु ।

कन्हय् । छखेर तुति आधुनिक जिन्सया, मेखेर तुति भांग्राया पाइन्ट न्ह्यानाः छपा तुतिइ बूट प मेखेर तुतिइ चप्पल न्ह्यानाः न्हूगु पूँजीवादी माक्र्सवाद, माक्र्सवादी पूँजीवादीया सौन्दर्यशास्त्र पे्ररित फेसन नं वइ । मनू छम्ह हे । छपा तुति पूँजीवादया मेगु तुति माक्र्सवादया कला चमत्कारी क्यनी । क्या कलात्मक एकता !

 

सम्बन्धित बुखँ

LEAVE YOUR COMMENTS