संसफोया मन्त्रालय बारे अन्यौल

येँ -संघीय समाजवादी फोरमयात बीगु मन्त्रालय बारे अझ नं निर्णय मजूनिगु खँ सीदुगु दु । संसफोयात निगू मन्त्रालय बीगु धकाः न्हापा खँ जूगु खः । न्हापा सहरी विकास मन्त्रालय बीगु खँ जूबलय् उकी खानेपानी नं नापं दुगु खः । आः खानेपानी छुटे यानाः बिस्कं मन्त्रालय दयेकूगुलिं संसफों उगु मन्त्रालय कायेत अनिच्छा प्वंकूगु दु ।

अथे हे मेगु छगू मन्त्रालय स्वास्थ्य बीगु खँ नं जुयाच्वंगु दु । तर स्वास्थ्यय् नेकपाया पद्मा अर्यालयात राज्यमन्त्री दयेका तःगु दु । संसफों राज्यमन्त्री लिकाःसा जक उगु मन्त्रालय कायेगु शर्त न्ह्यःने तःगु दु । संसफोयात बीगु निगू मन्त्रालयय् सहरी विकासय् अध्यक्ष उपेन्द्र यादव व स्वास्थ्यय् सहअध्यक्ष राजेन्द्र श्रेष्ठ वनीगु चर्चा जुयाच्वंगु दु । तर पार्टीपाखें थुकिया बारे निर्णय धाःसा मयाःनि । पार्टीया बैठक च्वनाः जक थुकिया बारे निर्णय जुइगु खँ धाःगु दु ।

सूत्रं धाः कथं प्रधानमन्त्री केपी ओलीं म्हिगः बजेट जारी याइगु न्हि कुन्हु हे शपथ ग्रहण नं याका छ्वये, तयारी यानादिसँ धकाः संसफो नेतातय्त धया छ्वःगु खः । तर पार्टीया बैठक हे मच्वंनिगु कारणं निर्णय धाःसा याये मफुनि । थुकिया नापनापं आः संविधान संशोधन बारे जूगु सहमति कार्यान्वयन यायेगु लागिं कार्यदल दयेकाः ज्या सुरु यायेगु खँ नं जूगु दु । संसफो सरकारय् वनेधुंकाः थ्व सम्बन्धी प्रक्रिया नं सुरु जुइगु खँ धाःगु दु ।

सम्बन्धित बुखँ

LEAVE YOUR COMMENTS