नेवाः समाजय् ६११ गू जात

येँ – च्वमि डा. गोपाल धौबन्जारं नेवाः सन्दर्भयात कयाः च्वयादीगु खस नेपाली भाषाया सफू ‘जाति व्यवस्था’ सांसद जीवनराम श्रेष्ठं छगू ज्याझ्वःया दथुइ विमोचन यानादिल ।नेपाल इतिहास संघया अध्यक्ष प्रा.डा. सुरेन्द्र केसीया सभापतित्वय् जूगु उगु ज्याझ्वलय् सफूया बारे टिप्पणी यासें प्रा.डा. त्रिरत्न मानन्धरं नेवाःतय् नांया लिउने थीथी कुनां स्वाः वंगुया कारण समेत विश्लेषण जूसा जिउगु बिचाः तयादिल ।

त्रिविविया केन्द्रीय इतिहास विभागया अध्यक्ष डा. शंकर थापां नेवाःतय् दथुइ सुरु जुया वःगु अन्तर्जातीय इहिपा बारे नं उल्लेख जूसा बांलाइगु खँ कनादिल । त्रिवि मानविकी विभागया डिन प्रा.डा. शिवलाल भुषालं सफूया लागिं च्वमियात सुभाय् बियादिलसा च्वमि डा. धौबन्जारं थःगु सफुली उल्लेखित विषयवस्तु बारे कनादिल । ताःहाकः अनुसन्धान यानाः च्वयादीगु सफुली नेवाःतय् म्हसीका, नेवाः वस्ती, जातीय व्यवस्था बारे विश्लेषण यानातःगु दु ।

नेवाःतय् दथुइ जयस्थिति मल्ल वये स्वयां न्ह्यः लिच्छवीकालंनिसें हे जातीय व्यवस्था दुगु खँ सफुली उल्लेख दु । नेवाःतय् दथुइ जात दुने उपजात व उपजात दुने नं कुनां समेत यानाः मुक्कं ६११ गू थर दुगु खँ नं सफुली उल्लेख दु । अथे हे नेवाःतय् दथुइ वस्तु विशेष, स्थान विशेष, खाद्यवस्तु विशेष, पशुपंक्षी विशेष, कीतपतंग विशेष, गैरनेवाः भाषा विशेष आदि समेत यानाः ११ गू आधारय् थरया नां तयेगु चलन दुगु खँ नं सफुली न्ह्यथनातःगु दु ।

सम्बन्धित बुखँ

LEAVE YOUR COMMENTS