विश्वकप २०१८

ट्रम्पया घमण्डं वार्ता दित

मे २४, २०१८ य् अमेरिकी राष्ट्रपति डोनाल्ड ट्रम्पं उत्तर कोरियाली राष्ट्रपति किम जोङ अनया नामय् छपु पौ च्वयाः निम्ह नेता दथुइ जून १२, २०१८ य् जुइ धयातःगु वार्ता मयायेगु सन्देश छ्वल ।

अमेरिकी राष्ट्रपति ट्रम्पया थ्व पौ उलि अनपेक्षित मजुल, गुलि कि निम्ह नेतातय् दथुइ वार्ता जुइ धकाः समाचार वःबलय् जूगु खः । निगू विपरीत धु्रवया अमेरिका व उत्तर कोरियाया नेता दथुइ वार्ता जुइगु जुल धकाः समाचार वःबलय् विश्व हे चकित जूगु खः । उत्तर कोरियां यानाच्वंगु परमाणु परिक्षणया कारणं निम्ह नेतातय् दथुइ तच्वःगु चर्काचर्की जुयाच्वंगु इलय् सुनां हे पत्याः यायेमफइकथं निम्ह नेता वार्ता च्वनीगु जुल धकाः वःगु समाचार विश्वया निंतिं अनपेक्षित हे जूगु खः । तर निम्ह नेता नापलाइगु घोषणा जूसां अप्वःसिनं थ्व वार्ता सम्भव जुइगु खँय् धाःसा शंका हे प्वंका वयाच्वंगु खः ।

धाथें मे २४ या ट्रम्पया पतिं निम्ह नेता दथुइ वार्ता जुइगु खँय् शंका प्वंकाच्वंपिंत सही ठहर यानाबिल । राष्ट्रपति ट्रम्पं वार्ताय् च्वनेमखुत धकाः छ्वःगु पौ विश्वं जुइफुगु, सम्भावित धकाः हे तायेकाच्वंगु खः । वार्ताया निंतिं तयारी जुयाच्वंगु अवस्थाय् अमेरिका व उत्तर कोरिया निम्हेसिनं थःथवय् थीथी द्वपं बियाः शिखर वार्ता मयायेगु ख्याच्वः बिया वयाच्वंगुलिं थ्व अपेक्षित हे जुयाच्वंगु खः ।

उत्तर कोरियाली नेता किमया चरम आक्रामक व खुल्ला वैरभावया कारणं आः हे नापलायेगु उपयुक्त मजूगु खँ धासें ट्रम्पं वार्ता स्थगित याःगु खः । ट्रम्पं पतिइ च्वयातःगु खः ‘छि लिसे नापलायेत जि तसकं उत्सुक जुयाच्वनागु खः । दुःखया खँ, छिपाखें लिपांगु इलय् वयाच्वंगु धापुतिइ खनेदुगु चरम आक्रामक व खुल्ला वैरभावं यक्व न्ह्यवनिसें दयेकाच्वनागु योजना कथं नापलायेत जिं उपयुक्त तायेकेमफुत ।’
ट्रम्पं थःगु पतिइ वार्ता दिकेमाःगुया द्वपं उत्तर कोरियाली नेतायात हे बियातःसां धाथें वार्ता दिकूगु धाःसा ट्रम्प वा अमेरिकाया घमण्डीपहले हे खः धायेमाः ।

खास ला राष्ट्रपति ट्रम्प व अमेरिकी प्रशासनयात तायेच्वंगु दु कि अमेरिकाया लिसें विश्वं तःगु कडा प्रतिबन्धया कारणं उत्तर कोरिया तसकं दबाबय् लाःगु दु । उत्तर कोरियां थःत तसकं याकःचा तायेकेधुंकूगु दु । थज्याःगु अवस्थाय् उत्तर कोरियायात दबाबय् हे तयातयेमाः धयागु अमेरिकी प्रशासनयात तायाच्वंगु दु । अमेरिकी प्रशासनयात तायाच्वंगु दुकि आः दबाब बियाच्वन धाःसा उत्तर कोरिया पारमाणविक अस्त्र मुक्त यायेत राजी जुइ । उकिं ट्रम्पं थःगु अडानं टसमस जुइत तयार मजू ।

ट्रम्पया थ्व घमण्डीपहयात साथ बीत वया अधिकारीत नं न्ह्यःने वल । अमेरिकी राष्ट्रिय सुरक्षा सल्लाहकार जन बोल्टनं उत्तर कोरियायात नं लिबियाय् थें परमाणु मुक्त यायेमाः धाल । थुकियात अझ चि–मल्ता थप यानाः राष्ट्रपति ट्रम्पं हे धाल, ‘उत्तर कोरियां थःगु परमाणु हतियार नष्ट मयात धाःसा किमया नियती नं लिबियाया तत्कालिन नेता कर्णेल गद्दाफीया थें जुइ ।’

ट्रम्प व ट्रम्प प्रशासनया थज्याःथज्याःगु हे अभिव्यक्तिं उत्तर कोरियायात नं तम्वयेकाबिल । अमेरिकी उपराष्ट्रपति माइक पेन्सया छगू अन्तर्वार्ताय् उत्तर कोरियां ट्रम्प लिसे म्हिते थें जक यात धाःसा थ्व उत्तर कोरियाया तःधंगु भूल जुइ धकाः धाःगु खँयात कयाः उत्तर कोरियाया विदेश उपमन्त्रीं पेन्सयात ‘अज्ञानी’ व ‘बेवकूफ’ तक धयाबिल । अथेहे उत्तर कोरियां नं यदि अमेरिकां एकपक्षीय रुपं निःशस्त्रीकरणया जक खँ ल्हानाच्वन धाःसा वार्ताय् मच्वनेगु जुइ धकाः ख्याच्वः बियाहल ।

थुकिया लिसें कर्णेल गद्दाफीया थें ज्याःगु अवस्था जुइ धयागु धापुतिं उत्तर कोरियाली नेता किमयात नं छझाः थारान्हुइका बिल । यदि परमाणु निःशस्त्रीकरण जु हे जुल धाःसां लिपा अमेरिकां षडयन्त्र यानाः थःगु हत्या जकं याकीगु मखुला धयागु खं नं वयात छक्वः बिचाः याकेबिल ।

अथेखःसां किमं थःम्हं न्हापां बचं बियातःकथं उत्तर कोरियाया पुङ्गेरीइ च्वंगु परमाणु परीक्षणस्थल धाःसा विदेशी पत्रकारतय् न्ह्यःने हे नष्ट यानाबिल । उत्तर कोरियां परमाणु परीक्षणस्थल नष्ट याःगु छुं घौ लिपा हे अमेरिकां वार्ता मयायेगु पौ छ्वयाहल ।

ट्रम्प वार्ता दिकूगुयात अमेरिकाय् हे तःधंगु आलोचना जुयाच्वंगु दु । डेमोक्र्याटिकया नेता नेन्सी पावेलं ट्रम्पं उत्तर कोरियालिसे गम्भीर रुपं व्यवहार मयाःगु द्वपं बिउगु दु । खय्त ला ट्रम्पं उत्तर कोरियाया खँय् जक मेगु छुं नं खँय् गुबलें नं गम्भीर मजू । उकिं हे राष्ट्रियस्तरं जक अन्तर्राष्ट्रिय स्तरं हे इलय्ब्यलय् तःधंगु आलोचना जुइगु जुयाच्वंगु दु ।

आः नं कोरियाली प्रायद्वीपय् शान्ति स्थापना यायेफइगु अवस्था वःबलय् ट्रम्पया हे जिद्दीपन व गम्भीर जुइमफुगु कारणं थनया शान्तिया अपेक्षा हाकनं छक्वः लिज्यांवंगु दु । खय्त ला ट्रम्पं मेगु महिनाय् किमलिसे वार्ता जुइफु धयाच्वंगु दु । थुकी ट्रम्प गुलि गम्भीर दु धयागु इलं हे धाइ जुइ ।

सम्बन्धित बुखँ

LEAVE YOUR COMMENTS