विश्वकप २०१८

नवग्रन्थ सूत्र झीगु धर्म

दान, शील, नैष्कृम्य, प्रज्ञा, वीर्य, क्षान्ति, सत्य, अधिस्थान, मैत्री व उपेक्षा धर्म खः । बुद्ध, हिन्दु,ख्राईष्ट, ईस्लाम व मेमेगु धर्मत थुलिं हे जायाच्वंगु दु । यद्यपि थुपिं खँत भिंगु व मभिंगु धकाः थौंकन्हय् याकः याकः जुयाच्वन, मनू पतिकं पाक्क । उकिं थ्व खँ सकसिनं मसिउ ।

बुद्धनाप झी म्वाना वयाच्वना, हिन्दु झीसं खनाच्वनागु हे दु अले ख्राईष्ट, ईस्लाम व मेमेगु धर्मत दु धकाः झीसं न्यना वयाच्वना । मनयात ह्वातां क्यने मफु, थाकु । छाय्कि मन दुने यक्व ग्याखँ दु, तं दु व लोभ दु । थ्व मदयेके माः धकाः न्यना ला तःगु दइ तर मदयेके म्हाः, मंमदु ।उकिं जिं धर्म याना, जि बौद्ध खः, जि थनया आदिवासी नेवाः खः, थनया संस्कृति माने याना, शाक्य कुलय् जन्म जुया कथंया खँत धायेबलय् दुग्यंक धायेफइमखु ।

धायेमफुगुया हुनि मसियाः, ल्वःमनाः, मब्वनाः, मथुयाः व संस्कार मदयाः खः ।थांैकन्हय् नेवाः बौद्ध भाःपियाः मनूतय्सं गय् यानाः न्हि छ्याइ?न्ह्यथ्याक्क दने फुपिं मर्निंग वाक वनी, ध्यान याइ, न्हिकं याइ, द्यइके वनी, तुतः ब्वंवनी, पसः वनी, अनंलि दुगु लजगाः याइ । नुगः क्वसाःपिसं मनं खंकाः साधारण दान प्रदान नं याइ । थज्याःगु संस्कार नं छगू वा मेगु कथं नवग्रन्थ सूत्रत नाप स्वानाच्वंगु हे दु ।

नेवाः बौद्धत गुलिं भन्तेपिं दइगु बिहारय् वनी, आर्य श्रीगुह्य समाज तन्त्रम् नाप स्वानाच्वंगु तिब्बत बौद्ध धर्मया लामा गुरुपिंथाय् वनी । नेवाः बौद्ध परम्पराया संस्थाय् नं लगे जुइ । थथे जुइवं, वनेवं थःके दुगु बांमलाःगु बानी दइमखु धइगु जुइमखु । ला, अय्लाः, थ्वँ भ्वय्बलय् त्वःते फइ धकाः धायेफइमखु । मथ्यूपिनिगु लागि ड्रग्स, चुरोट, सुर्ति खैनीया बानी दइमखु । थुपिं साधारण बानीत खः ।

नवग्रन्थ सूत्रया हुनिं महायानी बौद्ध परम्परा दुगु झीगु स्वनिगलय् ललितबिस्तर सूत्रयात येँया पंडित निष्ठानन्द बज्राचार्यं प्राञ्जल संस्कृत भासं नेपालभाषाय् सछिदँ सिबें न्ह्यः भाय् हिइकाः पिथना बिज्यासेंलि नेपालय् थेरवाद नं दना वयेगु ह्वःताः चूलाः वल ।

थः सिबें धार्मिक मनूत, थः सिबें अधार्मिक मनूत झीगु समाजय् दु । थुकिं मनूत सन्तोष जुइ, दिनचर्याय् मगाःमचाः दःसां गर्व ताइ । मेपिं सिबें थः भाग्यमानी थें मेपिनिगु सिबें सुखी जीवन थके दुगु थें मतिइ लुइ । दुथे फुथे ग्वाहालि फुकसित यायेमाः, ग्वाहालि यायेगु लकस दक्वसित दयेका नं बीमाः ।

दक्व जात जातिया धर्म कर्म यायेगु थःथःगु पहः दु । म्ह अप्वः धका लना स्वयेत ज्याभःत यक्व माः । झीसं नखःचखः पतिकं दान प्रदान, द्यइके वनेगु व पाठ पूजा यायेगु याना । संस्कृति धकाः दुःख सुःख या इलय् धर्म याना धकाः याइ । म्हंमफइबलय्, सीबुइबलय्, बरे छुइबलय्, ब्याहा, जन्मन्हिबलय् नवग्रन्थ सूत्र पाठ पूजा यानाच्वंपिं बज्राचार्य गुरुजुपिंथाय् दान धर्म नापं जप याकः वनी ।

नवग्रन्थ सूत्र दुने झीगु धर्मकर्म पुवंक दु । थ्व सूत्र हे झीगु आगं खः , झीगु संस्कृति, सम्पदा अले झी पुर्खाया अस्तित्व खः।
नवग्रन्थ सूत्र हे (आर्य श्रीप्रज्ञापारमिता, आर्यगण्डब्यूह, आर्य श्रीदशभूमिक, महावैपुल्य सद्धर्मसमाधिराज, सद्धर्मलंकावतार, सद्धर्म पुण्डरिक वैपुल्य, आर्य श्रीगुह्य समाज तन्त्रम्, ललितविस्तर व सुवर्णप्रभास) नेवाः बौद्ध परम्परा खः गुगु आतक बुद्धया पालं निसें निरन्तर न्ह्याना वयाच्वंगु दु ।

थ्व झीगु गौरव खः गुगु झीसं सम्वद्र्धन, संरक्षण व पालना याना वयाच्वना । झीथाय् द्वःछिदँ सिबें पुलांगु छुं छुं महाबिहार व संघ परम्परा ल्यनाच्वंगु दनि । थज्याःगु निरन्तरता विश्वया मेमेगु धर्मय् नं द हे दु । यद्यपि नेपालय् बौद्ध परम्परा भारतय् सिबें च्वन्ह्याक्क दुगु खः गुगु थौंकन्हय् न्हना वनाच्वंगु दु ।

नवग्रन्थ सिउपिं पंडितपिं ओकुबहाया अमृतानन्द शाक्य, सुन्दरानन्द शाक्य, बुबहाःया रत्नबहादुर बज्राचार्य, हिराकाजी बज्राचार्य, भद्ररत्न बज्राचार्य, येँया दिव्यबज्र बज्राचार्य, नबहिया आशाकाजी बज्राचार्य, गुणरत्न शाक्य, मीनबहादुर शाक्यपिं मदयावने धुंकल । पंडितपिं रत्नराज बज्राचार्य, बज्रराज शाक्य, सद्धर्मराज बज्राचार्य, यज्ञमानपति बज्राचार्य, सुरेन्द्रमान बज्राचार्य, गौतमबीर बज्राचार्य, पुष्परत्न शाक्य, नरेशमान बज्राचार्य व दिपक बज्राचार्यपिंसं थौंकन्हय् इलय्ब्यलय् नवग्रन्थ सूत्र पाठया नापनापं देशना नं याना वयाच्वंगु दु, गुगु झीगु धर्म म्हसीकेया नितिं मयासे मगाःगु ज्या खः ।

नवग्रन्थ सूत्रया हुनिं महायानी बौद्ध परम्परा दुगु झीगु स्वनिगलय् ललितबिस्तर सूत्रयात येँया पंडित निष्ठानन्द बज्राचार्यं प्राञ्जल संस्कृत भासं नेपालभाषाय् सछिदँ सिबें न्ह्यः भाय् हिइकाः पिथना बिज्यासेंलि नेपालय् थेरवाद नं दना वयेगु ह्वःताः चूलाः वल । ल्हासाय् राजनैतिक हिउपाः लिपा झीथाय् लामा गुरुपिं शरणार्थीया रुपय् दुहांवयेवं झी बौबाज्यापिंसं, झीसं फक्व ग्वाहालि याना ।

विपश्यनाया आचार्यपिं, सयादो भन्ते नापं बर्मा, थाईल्याण्ड देशं बिज्याःपिंत न फुगु ग्वाहालि याना । बुद्ध धर्मयात मूबाहा कचा बाहा कथं झीसं माने याना । झीसं वंगु छुं दँया दुने पत्याः मजुइक जूगु थीथी राजनैतिक हिंसा व थुकिं हःगु हिउपाः स्वयेधुन । थुपिं हिउपालय् झीके सुलाच्वंगु उपाय कौशल्यं झी बचे जुया । झीसं दयेकागु सम्पदायात विपत्ति वइबलय् जिर्णोद्धार व हाकनं दयेकाः मिले याना तयेगु बांलाःगु परम्परा यात ल्यंकातया ।

थथे झीसं धर्म धकाः बांलाक मथूसां नं याना वयाच्वना । झीके थथे यायेमाः धइगु मतिइ मस्यंनि । झीपिं गुबले मार्गफलय् न्यासिवनी, अनागामि जुइ, अर्हत् पद दइ झीसं मसिउ तर झीके लोभ, द्वेष, मोह, व त्रास दु थ्व झी सकसिनं सिउ । भिं यातकि भिं जुइ मभिं यातकि मभिं जुइ । थ्वयात धर्म भाःपाः झीसं धार्मिक जीवन हनेवं मभिंगु कर्मत बुलुहुं छसिकथं पाः जुयावनी । थथे जुइबलय् सुघटना अप्वइ, दुर्घटना म्हो जुइ ।

थ्व थथेंया निंतिं सन्तोषया खँ खः । सन्तोष लँय् दिपाः जक खः दिना जक मच्वंसे त्यानु लंकाः वनाछ्वयेमाः । धर्मया मूलँपु हा, अले मूल खः नवग्रन्थ सूत्र । नवग्रन्थ दुनेया छपु छपु सूत्र जीवनया कोशल्वहं खः, दापु खः, विश्वविद्यालय खः । झीसं थ्वयात सश्रद्धा भागी याना वयाच्वना, थ्व पाय्छि खः । थ्वया सिबें पाय्छि खः नवग्रन्थया गुंगुलिं सफू ब्वनेगु, गुंगू सफू दुनेया फुक्क सहश्र सूत्र पुवंक ब्वनेगु ।

संस्कृत भाय् अप्वःसिनं मथू, मब्वं खः तर संस्कृतया धुरन्धर ज्ञाता मदुम्ह पंडित दिव्यबज्र बज्राचार्यं मदये न्ह्यः आर्य श्रीप्रज्ञापारमिता, आर्यगण्डब्यूह, आर्य श्रीदशभूमिक, सद्धर्मलंकावतार, व आर्य श्रीगुह्य समाज तन्त्रम् याना न्यागू सपूm अर्थ मपाक्क प्राञ्जल संस्कृत भासं नेवाः भासय् हिइकेधुंकूगु दु ।

मदुम्ह पंडित आशाकाजी बज्राचार्य व वसपोलया काय् सद्धर्मराज बज्राचार्यपिसं महावैपुल्य सद्धर्मसमाधिराज, सद्धर्म पुण्डरिक वैपुल्य, व सुवर्णप्रभास नेवाः भासं हिइके धुंकूगु दु । नवग्रन्थया थ्व गुंगू सफूत फुक्क छझ्वः हे त्वःमफिक सछिम्हं जक ब्वन धाःसा, न्यय्म्हं जक ब्वन धाःसा, वा झिम्हं जक ब्वन धाःसां स्वनिगःया बुद्धधर्मय् पुनर्जागरण वइ । स्वदँ न्ह्यः च्याला बिकाः नवग्रन्थ सूत्रत फुक्क क्वचायेक ब्वने धुंकाः जिके न्हापां वःगु बिचाः खः थ्व ।

 

सम्बन्धित बुखँ

LEAVE YOUR COMMENTS