कर म्हये मफयाः यल महानगरया बजेटय् लिच्वः

येँ – पाटन संयुक्त क्याम्पसं घरजग्गा कर मपूगु खँ सीदुुगु दु । क्याम्पसं छेँ दँसांनिसें पुलेमाःगु घरजग्गा कर आः तक नं मपूगु खँ यल महानगरपालिकाया प्रमुख कर अधिकृत दिलराज शाक्यं ‘नेपालभाषा टाइम्स’ यात कनादीगु दु । क्याम्पसं दयेकूगु उगु छेँय् थौंकन्हय् लाबिम मल चले यानाच्वंगु दुसा उगु मलय् दुगु आपालं पसः नं मनपाय् दर्ता मजूगु जानकारी वय्कलं बियादीगु दु ।

अथेहे यलया थीथी क्याम्पस, अस्पताल, स्कुल, पार्टी प्यालेस, रेष्टुरेन्ट व होटल व्यवसायीतय्सं नं मनपायात पुलेमाःगु कर पुलेत आनाकानी यानाच्वंगु दु । शाक्यया कथं थौंकन्हय् यल मनपाया १५ प्रतिशत जनतां जक घरबहाल कर पुलाच्वंगु खनेदु । वय्कःया कथं थज्याःगु घरबहाल कर पुलाच्वंगु आपालं धइथें चीधंपिं करदाता जक खः ।

यल मनपां थुगु आर्थिक दँय् घर बहाल करपाखें १ अर्ब १६ करोड तका कर म्हयेगु आज्जु तयातःगु खःसा आः तक ४६ करोड तका जक कर संकलन जूगु जानकारी नं वय्कलं बियादीगु दु । मनपां आज्जु कथं कर म्हये मफयेवं मनपाया घोषणा यानातःगु विकास निर्माणया ज्याय् तकं लिच्वः लाइगु खनेदुगु दु ।

अथेहे मनपाया प्रवक्ता राजु महर्जनं घरबहाल कर म्हयेगु निंतिं २९ गू वडाय् अभियान न्ह्यायेधुंकूगु जानकारी बियादिसें आः थीथी योजनाया ज्या जुयाच्वंगुलिं आःयात अभियान छुं ई लिपा जक न्ह्याइ धयादिल ।

प्रवक्ता महर्जनं बियादीगु जानकारी कथं मनपाया २९ गू वडाय् थीथी योजना दयेकाः ज्या न्ह्याकेगु तयारी जुयाच्वंगु दु । वय्कःया कथं नगरस्तरीय, सम्पदा व वडास्तरीय विकास निर्माण यायेगु निंतिं सम्झौता यायेगु तयारी जुयाच्वंगु दु ।

सम्बन्धित बुखँ

LEAVE YOUR COMMENTS