वाम एकता लिपाया पहिचान मुद्दा

देय्या निगू तःधंगु कम्युनिष्ट पार्टी एकीकरण जुयाः न्हूगु पार्टी निर्माण जुइवं स्वाभाविक रुपं थुकिया अत्यधिक चर्चा जूगु दु । एकीकरण जूवंगु निगू पार्टी थवंथः हे ततःधंगु पार्टीत खः । चाहे जुल धाःसा थ्व निगू पार्टी अलग अलग च्वनाः नं मेगु दलतलिसे जानाः सरकार गठन यायेफु । अज्याःगु हैसियतया निगू पार्टी छथाय् च्वनेवं गुगु विशाल रुप काःगु खः, व खनाः मेपिं त्रसित जूगु दु ।

सरकारया ल्हातय् थ्व इलय् तःधंगु हे राजकीय शक्ति लानाच्वंगु दु । उकिं न्ह्यसः थ्वहे पिदनाच्वंगु दु कि सरकारं आः थ्व शक्ति गन व छु ज्याय् प्रयोग याइ ? सरकारं सुरुंनिसें हे समृद्धिया नारा बियाच्वंगु कारणं आः ल्हातय् वःगु थ्व असीमित शक्तियात समृद्धि व तीव्र विकासया ज्याय् हे छ्यली धइगु खँय् शंका मदु ।

तर संसारया न्ह्यागु देशय् नं जब छम्ह व्यक्ति वा छगू पुचलं तीव्र महत्वाकांक्षा तयाः देशया विकास प्रक्रिया न्ह्याकी तब व देशय् छगू तःधंगु खतरा नं जन्म जुइ – तानाशाही जुइगु खतरा ! थ्व तानाशाही निगू कथं प्रकट जुइफु । छगू, शासनय् च्वंम्ह व्यक्ति वा पुचलं समृद्धिया नामय् देश थज्याःगु ढंगं सञ्चालन याइ कि वं मेपिं सुयागुं हे खँ न्यनी मखु, याकःचा हे सर्वेसर्वा जुया बी ।

न्हापा न्हापा थें सुनां फूऽ यायेवं तुं  क्वःमदलीगु जब्बर बहुमत थ्व सरकारया पक्षय् दु । यदि थ्वं चाहे जुल धाःसा जुजु महेन्द्रं देशया लागिं यक्व यानाः नं गुगु पक्षय् व चुके जूगु खः, उकियात ‘चुटकीभरं’ हे समाधान याना बीफु ।

वं न्ह्यागु हे गल्ती कमजोरी याःसां नं उकियात समृद्धिया म्हगसं त्वपुना बी । समृद्धि थुलि तःधंगु नारा जुया बी कि अन जवाफदेहिता, सुशासन, पारदर्शिता थेंज्याःगु लोकतन्त्रया आधारस्तम्भत फुक्क हे टुक्रु टुक्रुं त्वःधुला वनी । संसारया आपालं देशय् थथे जूगु दु । उकी मध्ये गुलिं देशय् तानाशाही प्रवृत्ति जन्म जूगु खःसां उकिया नापनापं मुलुकया समृद्धि नं जुया वन ।

फलतः छगू कालखण्ड लिपा तानाशाही पतन जुइवं जनताया ल्हातय् समृद्ध मुलुक प्राप्त जू वन । तर गुलिं देशय् धाःसा समृद्धिया उत्कट अभिलाषा ज्वनाः तानाशाही शासन ला सुरु यात तर मुलुकं प्रगति धाःसा याये मफु । गुकिं यानाः देशय् प्रगति वये मफु केवल तानाशाही जक ल्यना बिल । अज्याःगु मुलुकय् जनता हानं छक्वः दमन व बर्बरता सह यायेत बाध्य जुइ माल ।

अज्याःगु दमन चीका छ्वयेगु लागिं उमिसं हानं छक्वः क्रान्ति हे याये माःगु अवस्था तकं पिहां वल । अथे हे मेगु कथंया तानाशाही धइगु समृद्धिया नारायात न्ह्यःने तयाः देशय् विद्यमान मेमेगु अत्यावश्यक समस्यातय्त वास्ता हे मयायेगु प्रवृत्ति । देशय् स्थानीय वा क्षेत्रीयस्तरया थीथी कथंया समस्यात दयाच्वनी ।

चीधंगु समुदाय व समाजया विशिष्ट कथंया मगाःमछिंत दयाच्वनी । तर शासकं केवल राष्ट्रिय संकल्प व महान समृद्धिया खँ जक न्ह्यःने तयाः स्थानीयस्तरया अज्याःगु समस्यातय्त या त वास्ता याइ मखु, या त दमन यानाः सिधयेकेगु कुतः याइ ।
च्वय् न्ह्यथनागु निगू कथंया तानाशाही मध्ये नेपाली कांग्रेस थेंज्याःगु लोकतन्त्रवादी धाःगु पार्टीं न्हापांगु कथंया तानाशाही ब्वलनीगु खः ला धइगु चिउताः प्वंकाच्वंगु दु ।

अथे हे पहिचानया आन्दोलन न्ह्याका वयाच्वंपिं नेवाः लगायत आदिवासी जनजाति, मधेसी, दलित समुदायं धाःसा आः देशय् निगूगु कथंया तानाशाही ब्वलनीगु खः ला धकाः चिन्ता प्वंकेगु याना हयाच्वंगु दु । नेपाःया आदिवासी जनजाति, मधेसी, दलित आदि समुदायं ल्ह्वना वयाच्वंगु पहिचानया आन्दोलन देशय् न्हूगु संविधान जारी जुइधुंकाः तक नं दिउगु मदुनि ।

आन्दोलनया गति सुस्त जुल खः, तर उकिं दिपाः धाःसा मकाःनि । कारण छु धायेबलय् राज्यं उमिगु मागयात आः तकं पूवंकूगु मखुनि । देशय् न्ह्याबलें नं सरकार अस्थिर जुइगु कारणं सुं नं सरकारया थ्व खँय् ध्यान बी मलाः । ध्यान बी ला बी ला धइगु अवस्थाय् तक थ्यनीबलय् सरकार क्वःदलेधुंकी । उकिं थ्व आन्दोलनया पक्षधरत नं देशय् स्थायी सरकारया प्रतीक्षाय् च्वनाच्वंगु खः ।

तर थौं स्थायी प्रकृतिया सरकार वःबलय् धाःसा थ्व समस्याया बारे गनं छुं उच्चारण तकं जूगु खने मंत । प्रधानमन्त्रीं भाषणय् थुकिया नां तकं कयामदी । राष्ट्रपतिया नीति तथा कार्यक्रमय् नं थ्व पक्षयात पूरा हे वेवास्ता याना तःगु खने दत । थज्याःगु इलय् जाति, भाषा, धर्म, कला, संस्कृतिया मुद्दायात न्ह्यःने तयाः आदिवासी जनजाति, मधेसी आदि समुदायं ल्ह्वनाच्वंगु पहिचानया मुद्दा आः छु जुइ धकाः चिउताः ब्वलनाच्वंगु दु ।

वर्तमान सरकार थ्व मामिलाय् उदार खने मदु । थ्व जगजाहेर हे खँ खः । तर खयां नं सरकार अलोकप्रिय मखु । राष्ट्रवाद, राष्ट्रिय संकल्प, राष्ट्रया समृद्धि आदि थेंज्याःगु तःधंगु व अमूर्त फ्रेमय् सरकारया बांलाःगु किपा प्रस्तुत जुयाच्वंगु दु । उकिं सरकारं जाति, भाषा, पहिचान आदि थेंज्याःगु ‘चीधंगु’ मुद्दाय् ध्यान बियाः ‘ई बर्बाद’ यायेगु ज्या मयाये नं फु ।

फलतः समृद्धिया मुद्दायात न्ह्यःने तयाः थ्व शक्तिशाली सरकारं देय्या पहिचानवादीतय्त याइगु व्यवहार मदुम्ह जुजु महेन्द्रया व्यवहारलिसे ज्वःलाः वनेफुगु तःधंगु सम्भावना दु । आः नं जुजु महेन्द्रयात नेपाःया तःधंम्ह राष्ट्रवादी नेता कथं माने याइपिं गणतन्त्रवादीत प्रशस्त दनि । उकिं महेन्द्रं प्रतिपादन याःगु ‘महेन्द्रीय राष्ट्रवाद’ आः न्हूगु व्यवस्थायात ल्वयेक लोकतान्त्रिक गणतन्त्रया जामा पुनाः प्रस्तुत जुइ फइगु सम्भावना यक्व दु ।

तर सरकारयात थ्व मोडपाखे वनेगुपाखें बचे याये माःगु आवश्यकता धाःसा दु । छाय्धाःसां थ्व महेन्द्रया थें वंश परम्परां न्ह्यानाच्वंगु सरकार मखु । जनताया चीधंगु स्वयां चीधंगु समस्या समाधान यायेगु पाः फयाः गठन जूगु कम्युनिष्ट पार्टीया सरकार खः । अज्याःगु हे समस्या समाधान याये धकाः झिंन्हयद्वः मनूया जीवन बलिदान याना वःगु माओवादी शक्ति आः थुकी सम्मिलित जुइधुंकूगु दु ।

न्हापा न्हापा थें सुनां फूऽ यायेवं तुं क्वःमदलीगु जब्बर बहुमत थ्व सरकारया पक्षय् दु । यदि थ्वं चाहे जुल धाःसा जुजु महेन्द्रं देशया लागिं यक्व यानाः नं गुगु पक्षय् व चुके जूगु खः, उकियात ‘चुटकीभरं’ हे समाधान याना बीफु । समृद्धि सकस्यां म्हगस खः । तर समृद्धिया वितरण समान जुइमाः, व धाःसा सकस्यां इच्छा मखयेफु । अज्याःगु इच्छाया सिर्जना यायेगु हे राजनीतिया लक्ष्य जुइमाः ।

 

सम्बन्धित बुखँ

LEAVE YOUR COMMENTS