पूर्वाधार विकास बैंकं तःधंगु परियोजना निं लगानी याइगु

येँ – नेपालय् न्हापांखुसी चायेकेत्यंगु पूर्वाधार विकास बैंकं शुरुइ लगानी बोर्ड व योजना आयोगं स्वीकृत यानातःगु ततःधंगु आयोजनाय् निं लगानी याइगु जूगु दु । नेपाःया हे दकलय् अप्वः चुक्ता पूँजी दइगु उगु बैंकं सुरुङमार्ग, सतक, जलविद्युत, सहर निर्माण, रेलगमार्ग थेंज्याःगु विकासया क्षेत्रय् लगानी याइगु खँ बैंकया अध्यक्ष विमल कोइरालां धयादीगु दु । पूर्वाधार विकास बैंकय् सर्वसाधारणया ४० प्रतिशत शेयर दइ ।

थ्व बैंकया चुक्ता पुँजी जक २० अर्ब दइ । थौंकन्हय् बंैकतय् चुक्तापुँजी च्यागू अर्ब दःसा गाःगु प्रावधान दुगु इलय् राष्ट्र बंैकं न्हापांखुसी २० अर्ब चुक्ता पुँजी दइगु बैंक चायेकेत स्वीकृति बिउगु खः ।निजी ख्यःयात पूर्वाधार विकास क्षेत्रय् लगानी यायेत प्रेरित यायेगु ताः तयाः चायेकेत्यंगु थ्व बैंकं थुकिया निंतिं विकास निर्माणया ज्याय् निं लगानी यानाः ज्या न्ह्याकेत्यंगु खः । सुरुया चरणय् सरकारं मयाःगु व निजी क्षेत्रं यायेफइगु आयोजनाय् निं लगानी यायेगु खँ बैंकया अध्यक्ष कोइरालां बिबिसीयात धयादीगु दु ।

वय्कलं धयादीगु दु, ‘लगानी बोर्डं नं छुं योजनात हःगु दु, योजना आयोगयाके नं दु । निजी क्षेत्रया नं छुं योजना दयेकातःगु दु । थज्याःगु हे योजनाय् बैंकं लगानी यानाः सुरुवात यायेगु जुइ ।’ थ्व धुंकाः बैंकं बुलुहुँ थःम्हं हे सम्भावित योजनाया छनोट यानाः उकी लगानी ज्या न्ह्याकी ।अध्यक्ष कोइरालां सुरुङमार्ग, सतक, जलविद्युत, रेलमार्ग लिसें चिचिधंगु शहर दयेकेगु थेंज्याःगु विकास योजनाय् लगानी यायेफइगु खँ धयादीगु दु ।

निजी ख्यः, सरकार व सर्वसाधारणया लगानी दइगु थ्व बैंकय् मेमेगु बैंकय् थें सर्वसाधारणया खाता चायेकी मखु । राष्ट्रबैंकया डेपुटी गभर्नर चिन्तामणि शिवाकोटीं धयादीगु दु, ‘४० प्रतिशत शेयर सर्वसाधारणया जुइ, ५० प्रतिशत निजी ख्यःया व १० प्रतिशत सरकारया दइ । थ्व बैंकं सर्वसाधारणया खाता चायेकाः ध्यबा मुंकेगु व त्यासा बीगु यायेदइमखु । ततःधंगु कारोवार जक यायेगु खः, राष्ट्रिय महत्वया योजनाय् लगानी यायेगु खः ।’

सरकारं पूर्वाधार निर्माणय् थ्यंमथ्यं छगू खर्ब ५० अर्ब तका लगानी यानाच्वंगु इलय् थ्व बैंकया स्थापनां निजी ख्यः व सर्वसाधारणया उलि हे बराबरया लगानी पूर्वाधार निर्माणय् वइगु आशा यानातःगु दु ।पूर्वाधार विकास बैंकय् ४० प्रतिशत शेयर सर्वसाधारणया जुइ, ५० प्रतिशत निजी ख्यःया व १० प्रतिशत सरकारया दइ

सम्बन्धित बुखँ

LEAVE YOUR COMMENTS