अनुसन्धान विधिबारे न्यान्हुयंकंया तालिम

ख्वप-  बागिश्वरी कलेजया ग्वसालय् अनुसन्धान विधिबारे न्यान्हुयंकंया तालिम जुल । विश्वविद्यालय अनुदान आयोगया ग्वाहालिइ शुरु जूगु न्यान्हुयंकंया ‘रिसर्च मेथोडोलोजि ट्रेनिङ’ वंगु शनिवाःनिसें थन शुरु जूगु खः । तालिमया उलेज्या नेपाल मजदुर किसान पार्टीया नायः नारायणमान बिजुक्छें यानादीगु खः ।

ज्याझ्वलय् मूपाहां बिजुक्छेँनं ख्वपयात ख्वप विश्वविद्यालय चायेकेगु अनुमति बिल धाःसा झिगू लाखं डाक्टर ब्वंके फइगु खँ सियाः हे निजी ख्यःया चिकित्सा माफियातय् दबावय् सरकारं अनुमति मबिउगु खः धयादिल । वय्कलं धयादिल, ‘प्राध्यापकतय्गु राजनीतिक भागबन्डा व सरकारी शैक्षिक संस्थाय् हाजिर यानाः निजी क्षेत्रय् ज्या याइपिं शैक्षिक माफियातय्त सरकारं छुट बिउगु हे उच्च शिक्षाय् गुणस्तर म्हो जूगुया मुख्य कारण खः ।’

विज्ञान व प्रविधिया बारे छुं जानकारी मदुम्हेसित सरकारं विज्ञान व प्रविधि मन्त्रीया जिम्मेवारी बिउगुलिं हे देय् न्ह्यःने न्ह्याः वने मफुगु द्वपं बियादिल । ज्याझ्वलय् पाहांकथं झायादीम्ह आयोगया सदस्य सचिव प्रा. डा. देवराज अधिकारीं शैक्षिक क्षेत्रय् उत्तीर्ण प्रतिशत व गुणस्तर अप्वयेकेगु मुख्य चुनौतिया विषय जूगु धयादिल ।

देय्न्यंकंया थीथी नीगू सामुदायिक क्याम्पसं जक गुणस्तरया प्रमाणपत्र कायेत सफल जूगु धासें वय्कलं आः वइगु न्यादँया दुने दक्वं क्याम्पसतय्सं शैक्षिक गुणस्तरया प्रमाणपत्र कायेगुपाखे कुत न्ह्याकेमाःगु आवश्यक जूगु खँय् बः बियादिल ।
बागिश्वरी कलेज रिसर्च म्यानेजमेन्ट सेलया संयोजक प्रा. डा. सिद्धिवीर कर्माचार्यया सभापतित्वय् जूगु ज्याझ्वलय् कलेजया प्राचार्य धनकुमार श्रेष्ठ व शिक्षक राजन चौगुठिं नं नुगःखँ तयादीगु खः ।

नेपालभाषा टाइम्स

च्वमिया मेमेगु

• थुकथं न्ह्यात बोडेया म्ये प्वाः खनीगु जात्रा
• बिस्काःया झ्वलय् थिमिइ ‘सुथसिया याः’ न्यायेकल
• छायादेवीया जग्गा पुखू प्रमाणित
• पाहाँचःह्रे क्वचाल
• ताेखाय् बिस्काःया निंतिं यःसिं थन