विश्वकप २०१८

न्हूगु ज्यासना पुचः ल्यसें राष्ट्रिय ज्ञानमाला सम्मेलन क्वचाल

येँ- गुक्वःगु राष्ट्रिय ज्ञानमाला सम्मेलन न्हूगु ज्यासना पुचःया ल्यज्या यासें क्वचाल । नेपाल राष्ट्रिय ज्ञानमाला समितिया ग्वसालय् व चाबहिलिइ च्वंगु चारुमति बुद्ध विहारया व्यवस्थापनय् वंगु पुस २७ गतेनिसें स्वन्हुयंकं जूगु खः । समितिया नायः किरणकुमार जोशीया सभापतित्वय् जूगु सम्मेलनया उलेज्या मूपाहां फ्राखु विशाल धम्मशोभन महास्थविरं याना बिज्याःगु खः । सम्मेलन व्यवस्थापन समितिया दुजः अनु सिंह डंगोलं लसकुस यानादीगु ज्याझ्वलय् विशेष पाहांकथं नेपाःया निंतिं श्रीलंकाया राजदूत डब्लु. एस. परेरा झायादीगु खः ।

ज्याझ्वलय् समितिया संरक्षक प्रा. सुवर्ण शाक्यं ज्याझ्वःया उद्देश्ययात कयाः थःगु नुगःखँ तयादीगु खः । समितिया महासचिव शान्तकुमार चित्रकारं प्रगति प्रतिवेदन न्ह्यब्वयादीगु ज्याझ्वलय् व्यवस्थापन समितिया सचिव परमानन्द शाक्यं सुभाय् देछानादीगु खः । बुद्ध पुजा यानाः न्ह्याःगु न् हापांगु दिंकुन्हुया ज्ञानमाला भजन नं न्ह्यब्वःगु खःसा प्राथमिक स्वास्थ्य शिविर नं संचालन याःगु खः । अथे हे निन्हुया न्हिकुन्हु ‘ज्ञानमाला भजन छगू विवेचना’ शीर्षकय् डा. रीना तुलाधरं न्ह्यब्वयादीगु ज्यापौयात कयाः भिक्षु कौण्डन्यं टिप्पणी याना बिज्याःगु खः ।

सम्मेलनया लिपांगु न्हि मय्जु रमना श्रेष्ठ (धरान)या अध्यक्षताय् समितिया न्हूगु ज्यासना पुचः ल्यःगु खः । श्रेष्ठया अध्यक्षताय् ल्यःगु न्हूगु ज्यासना पुचलय् वरिष्ठ उपाध्यक्ष विमलबहादुर शाक्य (बुटवल), मध्यमाञ्चल उपाध्यक्ष जुलुम शाक्य (किपू), पूर्वाञ्चल उपाध्यक्ष पञ्चु शाक्य (धरान), पश्चिमाञ्चल उपाध्यक्ष केशवलाल वज्राचार्य (तानसेन, पाल्पा), महासचिव इन्द्रमुनि शाक्य (यल), कोषाध्यक्ष सप्तराज शाक्य (यल), उप महासचिव प्रकाश ताम्राकार (येँ), सह कोषाध्यक्ष अष्टबहादुर डंगोल (किपू) यात ल्यःगु दु ।

अथे हे दुजलय् राजभाई शाक्य (यल), लक्ष्मीबहादुर शाक्य (यल), कुमार महर्जन (यल) व मेनुका वज्राचार्य (तानसेन, पाल्पा)यात ल्यःगु दु । वय्कःपिं सकलें निर्विरोध निर्वाचित जुयादीगु खः । स्वदँय् छकः जुइगु राष्ट्रिय सम्मेलनय् मुक्कं पीखुगू ज्ञानमाला भजन खलकं ब्वति काःगु खःसा स्वदँ लिपा झिक्वःगु राष्ट्रिय ज्ञानमाला सम्मेलन काभ्रे जिल्लाया वांख्यः ज्ञानमाला भजन खलःयात पाःब्व लःल्हासे क्वचायेकूगु खः ।

सम्बन्धित बुखँ

LEAVE YOUR COMMENTS