विश्वकप २०१८

कन्टेनरय् इलेक्ट्रोनिक ट्र्याकिङ कार्यान्वयन मजुल

येँ – स्वंगूगु देशं दुहां वइगु मालवाहक कन्टेनरय् इन्टरनेटमार्फत निगरानी तइगु इलेक्ट्रोनिक कार्गाे ट्र्याकिङ प्रणाली लागू याःसां पूर्ण रुपं कार्यान्वयनय् धाःसा वयेमफुगु मदुनि ।नेपाली व्यवसायीतय्सं बेवास्ता याःगुलिं थ्व प्रणाली लागू यायेमफुगु खँ उद्योग, वाणिज्य तथा आपूर्ति मन्त्रालयया अधिकारीतय्सं धाःगु दु । व्यवसायीतय्सं धाःसा थ्व प्रणाली जडान यायेत हे यक्व खर्च जुइगुलिं लागू यायेत थाकुयाच्वंगु खँ धाःगु दु ।

भारत जुयाः नेपालय् सामान दुतहइगु कन्टेनरय् इलेक्ट्रोनिक कार्गो ट्र्याकिङ प्रणाली लत्या न्ह्यवनिसें लागू याःगु खः ।
उद्योग वाणिज्य तथा आपूर्ति मन्त्रालयया प्रवक्ता रविशंकर सैंजुं बिबिसीलिसे खँ ल्हासें धयादीगु दु, ‘नेपाली व्यवसायीतय्त थ्व विषयय् मतलब हे मदु । उमित ला थःगु सामान थ्यंसा गाः ।’

कोलकताय् च्वंगु भारतीय भन्सारय् नेपालय् सामान यंकीगु थज्याःगु कन्टेनरय् छगू उपकरण जडान यानाबी, अले व हे उपकरणपाखें इन्टरनेटं उगु कन्टेनर गन थ्यन, गज्याःगु अवस्थाय् दु, नेपाः दुहां वयेत गुलि ई काइ धयागु सीकेफइ ।
न्हापा नेपालय् सामान हइगु कन्टेनर तसकं लिबाक जक थ्यनीगु व गुलिखे कन्टेनरय् दुने च्वंगु सामान हे तनीगु घटना जुयाच्वंगु कोलकताय् च्वंगु नेपाली महावाणिज्य दूतावासं धाःगु दु ।

इलेक्ट्रोनिक कार्गो ट्र्याकिङ प्रणाली जडान यात धाःसा सामान लिबाक नेपाः थ्यन धाःसा कन्टेनरय् तुइगु विलम्ब शुल्क थेंज्याःगु आर्थिक व्ययभार म्हो जुइगु खँ सरकारी अधिकारीतय्सं धयाच्वंगु दु ।मेखे नेपाःमि आयतकर्तातय्सं धाःसा सरकारं थज्याःगु प्रणाली बारे व्यवसायीतय्त बांलाक जानकारी तकं मबिउगु खँ धयाच्वंगु दु । प्रवक्ता संैजुं धाःसा थुकिया जानकारी बीगु ज्या सरकारया हे मखु धयादीगु दु ।

वय्कलं धयादीगु दु, ‘जिमिसं जक यानां मजिउ । सकलें जागरुक जुइमाः ।व्यवसायीत थः हे जागरुक जुइमाल ।’नेपाल फ्रेट फर्वार्डर्स एशोसियसनया पुलांम्ह अध्यक्ष राजन शर्मां थ्व प्रणाली तयेबलय् थप शुल्क पुलेमाःगुलिं नं समस्या जुयाच्वंगु खँ धयादीगु दु । वय्कलं धयादीगु दु, ‘इलेक्ट्रोनिक ट्र्याकिङ प्रणालदी तयेबलय् थ्यंमथ्यं निद्वःत्या भारु अप्वइ । ध्यबा तुइगु जुसेलिं भ्वँ दयेकेबलय् छुं भचा हलुका यानाबिउसा जिउगु खः नि ।’

सम्बन्धित बुखँ

LEAVE YOUR COMMENTS