विश्वकप २०१८

आः नेकपा यात गुकथं स्वयेगु ?

एमाले व माओवादी केन्द्रया एकता यानाः नेपाल कम्युनिष्ट पार्टी धकाः औपचारिक रुपं घोषणा याःगु जूसां नं वैधानिक रुपं थुगु पार्टीया नां मेगु हे जू वनीगु अवस्था दु । निर्वाचन आयोगय् तकं केपी शर्मा ओली व पुष्पकमल दाहाल निम्ह अध्यक्ष जुयादीगु उगु पार्टीया नां क्वय् अण्डरलाइन तयाः नेपाल कम्युनिष्ट पार्टी धकाः निवेदन दर्ता याःगु दु ।

प्रतिनिधिसभा व प्रदेशसभाया निर्वाचन न्ह्यः आकाझाकां कार्यगत एकता यानाः एकता यायेगु घोषणा यानादीपिं एमालेया अध्यक्ष केपी ओली व माओवादी केन्द्रया अध्यक्ष पुष्पकमल दाहालया विशेष चाहना कथं अले थ्व निगू पार्टीया दथुइ थःथःगु बाध्यतां यानाः अन्ततः एकता जुल ।

आः नेपाल कम्युनिष्ट पार्टी नेपाःया दकले तःधंगु पार्टी जक मखु संसदय् दुई तिहाई जःखः बहुमत दुगु अले न्हय्गू प्रदेश मध्ये खुगू प्रदेशय् सरकार दुगु पार्टी जूगु दु । दुगु अवस्थाय् नेपाःया राजनीतिइ तःधंगु लिच्वः लाकीगु स्वाभाविक हे खः ।

पुष्पकमल दाहालयात माओवादी केन्द्रय् सांगठनिक ल्याखं, कार्यकर्ताया चाहनानिसें उमिगु व्यवस्थापनया ल्याखं नापं अनेक कथं भद्रगोल जुयाच्वंगु, द्वन्द्वया इलय् थःपिनिपाखें यानागु ज्या व अबलेया घटनायात माःगु प्रक्रियापाखें बैधानिक रुपं व्यवस्थापन याये मफयाच्वंगु, पार्टी झन झन कमजोर जुया वनाच्वंगु धइगु छगू कथं तःधंगु समस्या खः ।

थुज्वःगु बाध्यताया दथुइ थःपिनिगु निंतिं नं सुरक्षित जुइगु माध्यम कथं न्हूगु लँपु अले कार्यकर्तायात नं न्हूगु कथं व्यवस्थापन यायेत एमालेलिसे एकता यानाः न्हूगु हे पार्टी गठन यानागु जुल धाये मालाच्वंगु अवस्था खः ।

कन्हयया दिनय् पार्टीया क्वय्या तह तक गुकथं एकता याइगु खः अले कार्यकर्तात गुलि तक एकता जुया च्वने फइगु खः उकिया आधारय् जक थुगु पार्टीं देय् व जनताया नितिं विकास व समृद्धि हये फइ धायेफइ ।

एमालेलिसे एकता याये फत धाःसा आःया अवस्थाय् एमाले अध्यक्ष केपी ओली प्रधानमन्त्री जुयादीगु खःसां लिपा थः उगु पार्टीया प्रमुख जुइ फइगु अवस्था दुगु नापं एकता मयाइगु अवस्थाय् हाकनं संसदीय खेल दुने कांग्रेसलिसे जानाः थः प्रधानमन्त्री जक जुइ फइगु व अनं च्वय् वनेगु लँ चालीगु सम्भावना मदुगु नापं पार्टीया भद्रगोलयात समाधान याये मफइगु तायेकाः हे प्रचण्डं पार्टी एकतायात बः बियादीगु खनेदुसा उकिं हे पार्टी एकताया सम्भावना जूगु खः ।

अथे हे एमालेया अध्यक्ष केपी ओलीयाके नं थःगु कथंया बाध्यता दुगु अवस्था खः । माओवादी केन्द्रयात मोर्चाय् जक तया तल धाःसा आः सरकार दयेकूगु सछिन्हुया अवस्थाय् ला मन्त्रीतपाखें समस्या वल धाःसा कन्हय् वनाः झन झन समस्या वयेफुगु अवस्था खः ।

माओवादी केन्द्रयात कांग्रेसं साथ कयाः थःगु नेतृत्वया सरकार क्वःथलेगु नितिं न्हूगु कथंया समीकरण राजनीतिइ गुगुं नं इलय् जुइफइगु अवस्था दुगुलिं स्थीर सरकारया नितिं अले न्यादँ तक थः प्रधानमन्त्री जुयाः छुं न छुं याये फइगु अवस्था दु । थःगु पार्टी दुने हे माधवकुमार नेपाल व झलनाथ खनाल पक्षधरं गुकथं अन्तर विरोध तच्वयेका हयाच्वंगुयात कमजोर यानाः थः शक्तिशाली जुया च्वने दइगु तायेकाः हे सायद ओलीं एकतायात बः बिउगु जुइमाः धायेछिं ।

उकिं न्ह्याम्हेस्यां न्ह्यागु हे धाःसां ओली व दाहालया विशेष चाहाना कथं अले पार्टीया क्वय्या तहलय् तक माःगु कथंया बैचारिक रुपं माक्व सहलह हे ब्याकेगु मयासे हथासं हे पार्टीया च्वय्या तहलय् भागबन्डा मिले यानाः, मार्ग दर्शनया ल्याखं माक्र्सवाद व लेनिनवादयात जक स्वीकार यानाः मेगु फुक्कं वहसया विषय धकाः त्वःताः पार्टी एकताया घोषणा याःगु खनेदु ।

माक्र्सवाद व लेनिनवादयात नं नेपाःयात ल्वःगु कथं नाला वनेगु धकाः करिब करिब मदन भण्डारीं प्रतिवादन यानादीगु जनताया बहुदलीय जनवादयात स्वीकार यानाः नेपाल कम्युनिष्ट पार्टी धकाः घोषणा याःगु खः । कम्युनिष्ट धइपिं वर्गविहिन समाज दयेकीपिं, ब्यक्तिया सम्पत्ति मदइगु समाज दयेकीपिं धकाः थुइकाच्वंपिनिगु मिखाय् धायेगु खःसा आः ओली व दाहालं नेतृत्व यानादीगु न्हूगु पार्टी कम्युनिष्ट पार्टी हे मखु ।

अथे हे वर्तमान संविधानपाखें थःपिंत विभेद यानातल धकाः असहमति प्वंकाः भाषिक, सांस्कृतिक नापं हरेक ख्यलय् समानताया माग याना वयाच्वंपिं नापं पहिचानया माग याना वयाच्वंपिनिगु भावना कथं माःगु कथंया ज्या तत्काल थुगु पार्टीं याइगु अवस्था मदु धाःसां छुं पाइ मखु ।

राजनीतियात कया चिउताः मतइपिनिगु नितिं खास हे अर्थ मदुसा पुँजीवादयात स्वीरकार याइपिं अले संंसदीय अभ्यासयात स्वीकार यानाः लोकतन्त्र, गणतन्त्रया पक्ष ज्वनीपिनिगु नितिं धाःसा ओली व दाहालया नेतृत्वया थ्व न्हूगु पार्टी घोषणा जूगु तसकं बांलाःगु ज्या जूगु दु धकाः थुइकाच्वंगु दु ।

नेपाल कम्युनिष्ट पार्टी घोषणा जुइ धुंकाः आः तकया दुने माओवादी केन्द्रया नेता गोपाल किराँतीं माओवादी केन्द्र पुनर्गठन यायेगु धकाः घोषणा यानादीगु, विप्लवया नेतृत्वय् दुगु नेपाल कम्युनिष्ट पार्टीं कयौं नेता कार्यकर्तात थःपिनिगु पार्टीइ वइगु जुल धयाच्वंगु अवस्था अले एमाले वरिष्ठ नेता झलनाथ खनालं थःत पार्टीया अध्यक्ष केपी ओली व माधव नेपालं विभेद याःगु धकाः असन्तुष्टी प्वंकाच्वंगु अवस्था दु ।

झलनाथ खनाल पक्षं ला दाहालया विशेष पहलं जक पार्टी एकता जूगु खः धकाः तकं धयादीगु धइगु आवंलि दाहालया गुटय् थःपिं वनेगु जुइ धकाः अप्रत्यक्ष रुपं धयादीगु खः धकाः थुइकेमाः । माओवादी केन्द्र दुने म्हिगःनिसें बैचारिक वहस यानाच्वंपिं, जनयुद्धया इलय् तःधंगु योगदान याःपिं नेता कार्यकर्तातय्सं आःया अवस्थाय् अनौपचारिक रुपं माओवादी एमालेकरण जुल धकाः तकं स्वीकार याना वयाच्वंगु दु ।

थुकथं स्वल धाःसा आः नेपाल कम्युनिष्ट पार्टी न्हूगु पार्टीया रुपय् दयेकेगु ज्या जूगु ला दु तर थुगु पार्टी दुने न्हूगु हे कथंया अन्तरविरोध ब्वलना वइगु अवस्था नं अवश्य दु । कन्हयया दिनय् पार्टीया क्वय्या तह तक गुकथं एकता याइगु खः अले कार्यकर्तात गुलि तक एकता जुया च्वने फइगु खः उकिया आधारय् जक थुगु पार्टीं देय् व जनताया नितिं विकास व समृद्धि हये फइ धायेफइ ।

आःया अवस्थाय् नेपाल कम्युनिष्ट पार्टीया विकास व समृद्धि धइगु रेल हयेगु, ततःधंगु पावरहाउस दयेकेगु, लँ तबाला यायेगु, ततःखागु छेँ दयेकेगु जक खः । नेपाःया उत्पीडित समुदायया पहिचानया मुद्दा, समानताया मुद्दा प्राथमिकताया विषय जुयाच्वंगु मदु । विकास व समृद्धिं हे संविधानपाखें हे थःपिंत विभेद यानातल धकाः थुइकाच्वंपिनि माग तत्काल सम्बोधन यायेगु सोच कथं नेपाल कम्युनिष्ट पार्टी न्ह्याः वनीगु अवस्था मदु ।

 

सम्बन्धित बुखँ

LEAVE YOUR COMMENTS