खुसिबाः लिपा ख्वाउँया मार

येँ – वंगु असार महिनाय् तिनि खुसिबाः वयाः छेँबुँ चुइका यंकूपिं तराईया आपालं खुसिबाः पीडितत थौंकन्हय् अप्वया वःगु ख्वाउँपाखें थप मारय् लाःगु दु ।
छेँबुँ फुक्कं खुसिं चुइका यंकेवं पिनेपाल ग्वयाः च्वनाच्वंपिं स्थानीय मनूत थौंकन्हय् अप्वया वःगु ख्वाउँपाखें अझ मारय् लाःगु खः । उमिके च्वनेत छेँ जक मखु पुनेत वसः तकं मदुगुलिं चिकुयाः ज्यान हे वनीगु अवस्थाय् थ्यंगु खः ।

आः तक चिकुयाः सप्तरीइ १६ म्ह व सिरहाय् १६ म्ह मनूया ज्यान वनेधुंकूगु खँ धाःगु दु । वंगु खुसिबालं २ नम्बर प्रदेशय् ६० म्ह मनूया ज्यान वंगु खः ।चिकुयाः मनूया ज्यान हे वनेधुंकलं तकं सरकारपाखें खुसिबालं पीडितया लागिं राहत धाःसा छ्वया हःगु मदुनि । मन्त्रालयपाखें ध्यबा वनेधुंकल धाःसां पीडितयाथाय् तक थ्यंगु धाःसा मदुनि । सरकारं उमित क्वाःगु वसःया नापं प्रति प्रतिवार २५ हजार तका दां नं बीगु घोषणा याःगु दु ।

थुकी १० हजार लुमुगु वसः न्यायेत व १५ हजार छेँ दनेत खः धाःगु दु । थुकिया लागिं १ अर्ब १० करोड तका बजेट नापं फ्यायेधुंकूगु दु । सरकारं छ्वयेधुन धाःगु ध्यबा आः तक मथ्यनीगु जुयाः आः निदँ न्ह्यः भुखाय् ब्वःबलय् भुखाय् पीडितया लागिं धकाः मुंकातःगु राहतया वसः जूसां इना बीगु तयारी जुयाच्वंगु खँ धाःगु दु । भुखाचं पीडितया लागिं धकाः छ्वया हःगु करोडौं तकाया राहत सामग्री ध्वगिनाच्वंगुलिं निवाः न्ह्यः तिनि निवाः बिक च्याकाः नष्ट याना छ्वःगु खः ।

आः चिकुइ मखुत
माघ शुरु जुइवं चिकुइगु कम जुया वंगु खँ मौसमविद्तय्सं धाःगु दु । म्हिगः निसें राजधानीया तापक्रम थहां वंगु दु । अथे धाःसा तांन्वयेगु हे सुरु जुइगु सम्भावना धाःसा मदुगु खँ नं मौसमविद्तय्सं धाःगु दु । म्हिगः येँया न्यूनतम तापक्रम ३.६ डिग्री थ्यंगु खः । वंगु पुस २५ व २६ गते येँया तापक्रम ०.६ डिग्री थ्यंगु खः थुगु थ्व दँया दकलय् कम खः । थुगुसी चिकुलां वयेमाःगु वा नं मवः ।

सम्बन्धित बुखँ

LEAVE YOUR COMMENTS