विश्वकप २०१८

राजकुमार ह्यारि व मार्केलया इहिपा

बेलायती राजकुमार ह्यारि व अमेरिकी अभिनेत्री मेगन मार्केल दथुइ शनिवाः इहिपा जूगु दु । राजकीय इहिपा समारोह विन्डसर किल्लाया सेन्ट जर्ज गिर्जाघरय् जूगु खः । राजकुमार ह्यारि व मार्केलया थ्व इहिपा समारोहय् थीथी च्यानलपाखें लाइभ प्रसारण जूगु खः ।

इहिपा समारोहया कभरेज यायेत विश्वन्यंकंया मिडिया विन्डसर थ्यनाच्वंगु दुसा द्वलंद्वः बेलायती राजपरिवारया शुभचिन्तकत नं राजकीय इहिपा समारोह स्वयेत विन्डसर थ्यनाच्वंगु दु । थुगु इहिपा समारोह स्वयेत छगू लाखं अप्वः मनूत मुंगु खँ धाःगु दु ।इहिपा समारोहय् अमेरिकी टेलिभिजन स्टार ओपरा विनफ्रे, अभिनेता इडरिस एल्बा, जर्ज क्लुनी, फुटबलर डेविड बेकह्याम लिसें यक्व हे सेलिब्रिटितय् उपस्थिति दुगु खः ।

न्हिनय् इहिपा लिपा निम्हतिपुलिं शहर चाःहिउगु खः । राजकुमार ह्यारियात महारानी एलिजाबेथं ड्युक अफ ससेक्स उपाधि बियातःगु दु । इहिपा लिपा मार्कल डचेज अफ ससेक्स जुइ । राजकुमार ह्यारि राजगद्दीया उत्तराधिकारीपिनि धलखय् खुगूगु थासय् लानाच्वंम्ह खः । वयात अर्ल अफ डम्बाटन व बेरन किलकिलया उपाधी नं बियातःगु दु ।

राजकीय इहिपा समारोह स्वयेत द्वलंद्वः मनूत शुक्रवाः चान्हय्निसं विन्डसर न्ह्यःने मुनाच्वंगु खः । थुगु इहिपा समारोहय् भमचा जुइम्ह मार्कलया अबु थोमस धाःसा स्वास्थ्यया कारणं वयेमफुत । इहिपा समारोहया निंतिं सेन्ट जर्ज गिर्जाघरयात तुयुगु गुलाफ स्वांया लिसें थीथी स्वानं सजे यानातःगु खः ।

सु खः मार्केल

राजकुमारी ह्यारिया भमचा जूम्ह मार्केल मूलत आइरिस अबु व अमेरिकी अफ्रिकन मां पाखें बूम्ह अमेरिकी खः । ह्यारि व मार्केल दथुइ २०१६ जुलाइ निसें मतिनाया स्वापू दयाच्वंगु खः । मार्केल ३६ दँ दयेधुंकूम्ह खःसा ह्यारि धाःसा ३३ दँ जक दु ।

मार्केलं थ्वयां न्ह्यः फिल्म निर्माता ट्रेभर एङगलसनलिसे ब्याहा यायेधुंकूगु दु । सन् २०११ य् जूगु थ्व ब्याहा निदँ लिपा हे पारपाचुके यानाः क्वचाःगु खः । मार्केल अमेरिकी अभिनेत्री जक मखु, मिसा सशक्तिकरणया निंतिं सः तया वयाच्वंम्ह छम्ह अभियन्ता नं खः ।

सम्बन्धित बुखँ

LEAVE YOUR COMMENTS