विज्ञ पुचलं अन्ततः जनतायाके हे न्यनीगु – लानिपुखू छु शैलीं दयेकेगु ?

येँ – थौंकन्हय् जीर्णोद्धार जुयाच्वंगु लानिपुखू आः गुगु शैलीं दयेकेगु धकाः जनताया राय कयाः जक निर्णय याइगु जूगु दु । म्हिगः विज्ञ पुचःया दथुइ जूगु सहलहं उगु निर्णय याःगु खः । लानिपुखू प्रताप मल्लकालीन शैलीं दयेकेगु लाकि जंगबहादुरकालीन शैलीं दयेकेगु धइगु निगू बिचाः विज्ञ पुचःया दथुइ वःगु खँ सहलहय् दुथ्याःम्ह २७ वडाया वडाध्यक्ष चिनियाँमान वज्राचार्यं कनादिल । जंगबहादुरं लानिपुखू दयेकूगु नं सछिदँ पुलेधुंकूगु जूगुलिं उकियात नं मान्यता बीमाः धइगु बिचाः वःगु खः ।

विज्ञ पुचःया मेम्ह दुजः इतिहासविद् काशिनाथ तमोटं प्रताप मल्लया शैलीं दयेकेगु कि जंगबहादुर शैलीं दयेकेगु धइगु बारे निर्णय यायेत थौं ३ बजे राष्ट्रिय सभागृहय् सहलह जुइत्यंगु जानकारी बियादिल । सन् १८४५ य् श्रीलंका, भारत व नेपाः चाःहिउवःम्ह प्रुसिया (थौंकन्हय् युरोपया खुगूनिसें न्हय्गू देय्) या राजकुमारं नापं ब्वना हःम्ह छम्ह चित्रकारं च्वःगु चित्रया आधारय् प्रताप मल्लया शैलीं देगः दयेकेमाःगु खँ वयाच्वंगु दु ।

प्रताप मल्लं अबले लानिपुखूया दथुइ दयेकूगु शिखर शैलीया देगःया उचाई स्वयम्भूया प्रतापपुर स्वयां नं स्वदुगं तजाः धइगु खँ वयाच्वंगु दु । तर अनुसन्धाता तमोटं उगु देगः प्रतापपुर स्वयां चिजाः हे जुइमाः धयादिल । वय्कलं सन् १८५० स व्रिटिस राजदूतावासया रेजिडेन्सी डा. ओलिभरं ‘भेरिपिक्चर तु’ तका न्ह्यथनातःगु खँ कनादिसें देगःया शैलीयात शिखर शैली मखु ‘ग्रन्थकुट’ शैली धायेगु यानाच्वंगु खँ कनादिल ।

अथेहे ने.सं. ८४१ स नेपाः चाःहिउ वःम्ह इटालियन विज्ञ इप्पोलिपो डेरिडेरिं देगःया बारे न्ह्यथनातःगु खँ कँसें भाजु तमोटं उगु इटालियन भासं च्वयातःगु च्वसुयात अंग्रेजी भासं ‘स्केचेज अफ नेपाल’ धकाः भाय्हिलाः पिकाःगु जानकारी नं बियादिल । जंगबहादुरं तत्कालिन प्राविधिकया सल्लाह कथं सन् १८५१ स लानिपुखू व तौदह लः पित छ्वयाः अन अमूल्य वस्तु सुचुकातःगु अनुमान यासें लानिपुखूया देगः थुना छ्वःगु व लिपा दयेकेगु झ्वलय् धाःसा शिखर शैली स्वयां पाक्क गुम्बज शैलीं दयेकूगु खँ वय्कलं कनादिल ।

उगु इलय् लानिपुखू दयेकेगु निंतिं जंगबहादुरं जनतायाके म्हतिं छसुका दां म्हःगु खँ भाषा वंशावलीइ न्ह्यथनातःगु जानकारी नं वय्कलं बियादिल । म्हिगः जूगु विज्ञ पुचःया सहलह ज्याझ्वलय् प्रतिवेदनयात भिंकाः थौं सुथय् ८ बजे विज्ञ पुचःया दथुइ सहलह यायेगु व न्हिनय् ३ बजे राष्ट्रिय सभागृहय् जनताया राय कायेगु निर्णय जूगु दु । अनं वइगु सल्लाह व सुझाव कयाः लानिपुखू बारे निर्णय जुइगु खँ वडाध्यक्ष वज्राचार्यं कनादिल ।

सम्बन्धित बुखँ

LEAVE YOUR COMMENTS