भारत लःया कारणं टुक्रा जुइफु

भगवान बुद्धया महत्वपूर्ण वाणी थ्व छगू नं खः– अकुशल व कुशल संगत याइपिं पासा म्हसिइकेमाः । पासायात बांलाक म्हसिइके मफुत धाःसा बिना कारण दुःख कष्ट भोगय् यानाच्वने मालेयः । थ्व हे कारणं यानाः बौद्धिक व्यक्तितय्सं नं धायेगु याः पासा धयापिं विशेष यानाः स्वंगू प्रकारयापिं दयाच्वनी ।

छगू कल्याणकारी पासा, मेगु पासा जक खः, हानं मेगु प्रकारया पासा दुष्ट पासा । खालि पासाया अर्थ खः – बरोबर फाइदा बेफाइदाया भाग्यदारीया जिम्मा काइपिं पासा खः । कल्याणकारी पासाया अर्थ थः पासायात कल्याण यायेगु हिसाबं पासा दयेकाच्वनी । दुष्ट पासा धाःसा थःगु स्वार्थया लागि थः पासायात घातक यायेगु जक ज्या यानाच्वनी ।

पासाया अर्थ व्यक्ति व्यक्तिया लागि जक लागू जुयाच्वनी मखु, देश देशया सवालय् नं लागू जुयाच्वनी । झीगु नेपाःया सवालय् नं थ्व धापू मिले जुयाच्वंगु दु । विशेष ला चीन देशं नेपाःया कल्याणया लागि यक्व ज्या यानाः क्यनेधुंकल । यदि चीनं पूर्व पश्चिम राजमार्ग मदयेकूसा नेपाःया नागरिक छगू जिल्लां मेगु जिल्ला वने माल धाःसा भारतया लँपु जुयाः वनेत बाध्य जुइ ।

थुलि जक मखु नेपाःया अर्थतन्त्र सुधारया लागि धकाः उद्योगत नं स्थापना याना बिल, व्यापार, कृषि व मेमेगु क्षेत्रय् नं यक्व सहयोग यानाः क्यनाबिल । तर भारत धाःसा नेपाःया कुशलया लागि सहयोग यायेगु मस्वः, बरु नेपाःया प्राकृतिक श्रोतया सम्पत्ति हडपे यायेगुली जक मिखा तयाच्वन ।

भारत नीति अझ नं नेपाः सबल, सशक्त व आत्मनिर्भर जुल धाःसा थःगु हित जुइ मखु धयागु हे दु । उकिं भारतं नेपाःयात कमजोर व अस्थिर यायेगु रणनीति कथं खेल म्हिताच्वंगु दु । नेपाः प्रति भारतया कुनीतियात झीसं भारतयात जक दोष बिइगु पाय्छि मजू । भारतया कुनीतियात साथ बीपिं नेपाःया नोकरशाह (कर्मचारी) तन्त्र नं राष्ट्रघाती ज्या यानाः भारतया हितय् वनाच्वंगु दु ।

भारतीय विदेशमन्त्री सुष्मा स्वराज नेपाः भ्रमण अति सफल धकाः फुर्ति यात । सफलया अर्थ खः ओली न्हापा भारतीय कांगं्रेसया प्रिय पात्र खःसा आः भारतीय जनता पार्टीया प्रिय पात्र जुल धकाः कुटनीतिक भासं घोषणा याःगु खः ।

सुगौली सन्धिनिसें थौंतक नं भारतया हितया लागि कम्मर कसे जुयाच्वंपिं कुपात्रत झन झन अप्वया वनाच्वंगु खनेदु ।
विश्वया शक्तिशाली राष्ट्रया परराष्ट्र नीतिइ हे हिउपाः वयाच्वंगु खनेदु । अथे धयागु थःगु जःलाखःला देय्नाप स्वापू बल्लाकेगु नापनापं विश्वया राष्ट्रनाप सहकार्य याना वनेगु रणनीति सुरु जुल ।

चीनं नं थःगु जःलाखःला राष्ट्र शक्तिशाली जुल धाःसा थःगु देश नं सुक्षित जुइगु खः धकाः न्हूगु राण्नीति ज्वनाः न्ह्याः वनाच्वंगु दु । तर भारतया नीतिइ धाःसा हिउपाः वइगु लक्षण खने मदु । आः नं भारतं जःलाखःला राष्ट्रयात कमजोर अस्थिर यानाः थःगु स्वार्थ पूवंकेगु रणनीति निरन्तरता बिया वयाच्वंगु दु ।

थ्वहे कारणं यानाः भारतं थःगु पक्षया नेतात त्याकेगु लागि चुनावय् खूब खेल म्हिताच्वनी । दसुया लागि श्रीलंकाया राष्ट्रपति मैत्रीपाल, माल्दिभ्सया यामिन, बंगलादेशया शेख हसिना सत्ताय् छ्वयेगु लागि भारतया गुप्तचर निकायं ‘र’पाखें तःधंगु भूमिका म्हितल । तर राष्ट्रपति मैत्रीपाल, माल्दिभ्सया यामिन व बंगलादेशया प्रधानमन्त्री शेख हसिना भारतया इशाराय् प्याखं हुलेगु त्वःताः थःगु राष्ट्रया उन्नति, प्रगति वनेगु लँपु वनाच्वंगुलिं यानाः भारत हीमी चायाच्वंगु दु ।

भारतया परराष्ट्रमन्त्री सुष्मा स्वराज खड्ग ओलीयात नापलाये न्ह्यः माल्दिभ्स वनाः विपक्षी नेता भूपू राष्ट्रपति नासियात त्वःतेमाः धकाः दबाब बिल । राष्ट्रपति यामिनं आन्तरिक मामिलाय् हस्तक्षेप याये मते धकाः धम्कीया भासं धायेसातकि स्वराज ख्वाः ह्याउँकाः लिहां वल । माल्दिभ्स भ्रमण लिपा तिनि स्वराज नेपाः भ्रमणया लागि वयाः ओलीयात गुप्त मन्त्र बियाः भारत लिहां वन ।

स्वराज नेपाः भ्रमण अति सफल धकाः फुर्ति यात । सफलया अर्थ खः ओली न्हापा भारतीय कांग्रेस–आईया प्रियपात्र खःसा आः भारतीय जनता पार्टीया प्रियपात्र जुल धकाः कुटनीतिक भासं घोषणा याःगु खः । नेपाःया अवस्था थथे दुर्भाग्यपूर्ण जुयाच्वंगु दु । जनता देशभक्त जूसां फुक्क धइथें पार्टीया नेता विदेशभक्त जुयाच्वंगुलिं यानाः खः ।

वंगु दँय् आम चुनावया इलय् बाम गठबन्धनया निगू पार्टीयात जनतां अत्यधिक भोट बिउगु कारण खः– मोदीं नेपाःयात नाकाबन्दी यानाः दुःख बियाच्वंगु इलय् भारतनाप झुके मजुसे अडान कयाच्वंगु । जनतां ओली प्रति तःधंगु आश नं यात । आः ला ओलीं भारतया अर्धउपनिवेश पाखें मुक्त यानाः देशयात स्वतन्त्र याइ ला धकाः खः ।

धाथें भारतया अर्धउपनिवेशपाखें मुक्त यायेगु खःसा न्हापांगु ज्या पूर्वया ताप्लेजुङ, मध्यया रसुवा, पश्चिमया दार्चुला थ्व स्वंगू नाकां चीनपाखें रेल हयेफत धाःसा ओलीयाके देशभक्त भावना अप्वल धकाः याउँक अनुमान याःसां फरक मजू । तर ओली धाःसा चीनं रेल संचालन यायेगु सवालय् अलमल यानाच्वंगु खनाः चीनं नं शंका यात ।

छाय्धाःसा भारतया प्रम मोदीं चीनया योजना फासफुस यायेमाल धकाः मन्त्र बिल ला धकाः चीनं अनुमान याइगु स्वाभाविक खः । मोदी नेपाः भ्रमणया इलय् समुद्र मार्गं नेपाः तक पानीजहाज चले यायेगु धकाः हल्ला यात । वास्तवय् पानीजहाजया हल्लां यानाः नेपाःया सुनकोशी, भोटेकोशी, तमोर, इन्द्रावती, लिखु, अरुण, दूधकोशी इत्यादिया लः व मत कब्जा यानाः भारतय् लःया समस्या समाधान यायेगु उद्देश्य ज्वनाः मोदी भ्रमणय् वःगु खः ।

यदि भारतया राज्य राज्य टुक्रा जुल धाःसा लःया कारणं यानाः जुइफु धकाः विज्ञतय्सं अनुमान यानाच्वंगु दु । दसिया लागि पंजाबं हरियाणायात लः बी फइमखु धकाः धम्की बियाच्वनी, व थें तुं हे मेमेगु राज्यय् नं किचलो जुयाच्वंगु दु । उकिं भारतया मिखा अझ नं नेपाःया लखय् हे वनाच्वंगु दु । नेपालय् थीथी जलविद्युत परियोजना चले यायेगु व नेपाःया लखय् जहाज चले यायेगु भारतया बिचाः नं वास्तवय् नपाःया लः कब्जा यायेगु डिजायन कथं हे वःगु खँयात नं थन लुमंकेमाःगु खनेदु ।

 

सम्बन्धित बुखँ

LEAVE YOUR COMMENTS