विश्वकप २०१८

सिटीया शतक व मेपिं विजेता

रुसय् जुइगु विश्वकप २०१८या निंतिं आः यक्व न्हि ल्यं मन्त । लच्छि स्वयां म्हो इलय् विश्वकप सुरु जुइ, अले सकलसिया मिखा वनिगु जुइ, विश्व फुटबलया दकलय् तःधंगु धेंधेंबल्लाखय् । तर थ्वयां न्ह्यः निगू महŒवपूर्ण कासा ल्यं हे दनि, एफए कपया फाइनल व युरोपेली च्याम्पियन्स लिगया उपाधि भिडन्त ।

एफए कपया फाइनलय् चेल्सी व म्यानचेस्टर युनाइटेड म्हितेत्यंगु दु । च्याम्पियन्स लिगया फाइनल धाःसा डिफेन्डिङ च्याम्पियन रियल म्याड्रिड व लिभरपुल म्हिती । थ्व बाहेक युरोपया दक्व धयाथें प्रमुख लिगया विजेता निश्चित जुइधुंकूगु दु । इंग्ल्यान्ड व जर्मन त्वःताः स्पेन, इटाली व फ्रान्सया लिगय् छगू चरणया कासा ल्यं दनि ।

अय्सां थुपिं कासा औपचारिक जक जुइ, छाय्धाःसा थ्वयां न्ह्यः हे लिग विजेता सु जुइगु खः, उकिया रहस्य चाले धुंकूगु दु । थ्व ल्याखं युरोपया प्रमुख न्यागू लिगया उपाधि भिडन्तया लिच्वः अपेक्षित हे जुल, अले सुनां त्याकल उमिसं अःपुक व याउ“क हे त्याकल ।

इङ्गल्यान्ड


छगू इलय् थथे ताःगु खःकि थुगुसीया युरोपेली च्याम्पियन्स लिग त्याकीगु टिम मेगु मखु, म्यानचेस्टर सिटी जुइ । तर थथे मजुइगु जुल, च्याम्पियन्स लिगय् सिटी हाकनं छक्वः असफल साबित जुल । अय्नं सिटीयात सुनानं इंग्लिस प्रिमियर लिग त्याकेगुपाखें धाःसा तापाके मफुत । सिटीया व्यवस्थापकय् पेप ग्वार्डिओला वयेवं क्लबं लिग त्याकूगु थ्व न्हापांखुसी खः ।

गुगु दिनय् म्यानचेस्टर युनाइटेड वेस्ट ह्यामया ल्हातं बुत, उगु हे दिनय् सिटी लिग च्याम्पयन नं जुल । प्रिमियर लिगया फुक्क कासा क्वचाये धुंकूगु दु, अले ३८ चरणया कासा लिपा सिटी थ्याक्क १०० ल्याः हयेत सफल जुल । अले थ्व ल्याः कीर्तिमानी ल्यां नं जुल । उलि जक मखु, सिटीं गोल याःगु नापं यक्व कथंया कीर्तिमान नं थःगु नामय् याःगु । उकिं थुगुसी प्रिमियर लिगया उपाधि होड एकपक्षीय हे जुल धाःसा छुं मपाः ।

स्पेन

स्पेनी ला लिगया छगू तःधंगु विशेषता खः– बार्सिलोना व रियल म्याड्रिडया कासा । छक्वः निक्वः हे जक जुइ एटलेटिको म्याड्रिड वा मेगु छुं क्लबं उमित टक्कर बीगु । मखु धाःसा थुपिं हे निगू क्लबं पालंपाः धयाथें लिग त्याका वयाच्वंगु दु । वंगु झिद“या आधार दयेकेगु खःसा बार्सिलोना रियलया न्ह्यःने तसकं बल्लाःगु खनेदु, उकिं लिग उपाधिइ वया हे अप्वः वर्चश्व खनेदु ।

थुगुसीया लिग नं बार्सिलोनां हे त्याकल, डेपोर्टिभो लाकुरुनाविरुद्धया कासाय् त्यायेवं थ्व सम्भव जूगु खः । लिगय् बार्सिलोनायात रियलं छुं हे चुनौती बीमफुत । तर बार्सिलोना च्याम्पियन्स लिगय् धाःसा असफल सावित जुल । खालि थुलि हे कि बार्सिलोना पूरा लिगय् अपराजित जुइमफुत । मेखे रियल धाःसा च्याम्पियन्स लिगया फाइनलय् थ्यंगु दु ।

जर्मन


जर्मन बुंडेसलिगा ला झन् झन् म्हाइपुसे च्वनावन धाइपिं यक्व पिहां वयेधुंकूगु दु । थुकिया छतायां छता कारण खः थ्व लिगय् बायर्न म्युनिखया लगातार वर्चश्व । अथे ला लिगया स्तर हे कुहां वंगु थ्यंक मखु, खालि थुलि हे खः कि बायर्नयात थीफुपिं तकं मन्त धाःसां जिउ ।

अथेला थ्व तसकं पुलांगु हे इतिहास खः, जर्मन फुटबलय् बार्यनया प्रभुत्व ।थुगुसी नं बायर्नं अपुक हे लिग त्याकल । अले थ्व पालय् थुलिमछि एकपक्षीय जुल कि सकसिनं म्हाइपु हे तायेकल । असबर्गलिसेया कासा त्यायेवं बायर्न लिग च्याम्पियन जूगु खः । बायर्न लिग त्याकूगु नं थ्व झ्वलाक खुक्वःगु खः ।

आखिर लिग तालिकां हे बायर्नया प्रभुत्वया खँ न्ववाः– ३४ कासा म्हितूबलय् बार्यन ल्याः थ्यंगु दु– ८४ । निगूगु थासय् लाःगु साल्का ६३ ल्याखय् दु । लिपांगु इलय् बोर्सिया डर्टमन्ड कमजोर जुयाः नं बायर्नयात फाइदा जुयाच्वंगु दु ।

फ्रान्स


फ्रान्सेली लिग वानय् एकछत्र कायम याना वयाच्वंगु टिम खः, पीएसजी । अर्थात पेरिस सेन्ट जर्मेन । विश्वय् दकलय् तःमिगु क्लबय् लाः थ्व । थगुने धाःसा थ्वं लिग त्याकेमफु । उकिं उबलय् क्लबया तसकं आलोचना जुल । थुकिया हे लिसः खः, थुगुसी तसकं अःपुक लिग त्याकूगु ।

धात्थें धायेगु खःसा पीएसजीं लिग त्याकेत थुगुसी छुं हे मेहनत याये म्वाःल धाःसां जिउ । थगुने मोनाकों लिग त्याकाः सकसितां अजुचायेकूगु खः । थुगुसीया लिग त्याकेत जूगु निर्णायक कासाय् पीएसजीं मोनाकोयात ७–१ गोलं बुकल । पूरा सिजन पीएसजी शीर्षय् खनेदत ।

फ्रान्सय् आः छगू चरणया कासा ल्यं दनि, पीएसजीया ल्याः थ्यनेधुंकूगु दु– ९२ । निगूगु थासय् लानाच्वंगु मोनाको मुुक्कं ७७ ल्याखय् दु । लियोन व मार्से थें जाःगु क्लब नं बमलाःगुलिं नं पीएसजीयात अःपुगु खः ।

इटाली


इटाली धाःसा थुगुसी गज्जब हे जुल । अनया सिरी ‘ए’ उपाधिया निंतिं तसकं धेंधेंबल्लाः जुल । युरोपया न्यागू लिग मध्ये थथे उपाधिया निंतिं छगूसिबें अप्वः टिम दथुइ होडबाजी जूगु थन हे जक खः । तर अन्त्य लिच्वः धाःसा हाकनं छक्वः अपेक्षित कथं हे जुल ।

थ्व लिच्वः खः– हाकनं छक्वः युभेन्ट्सं हे ल्हातय् उपाधी लाःवन । वयात अन्तय् तकं हाथ्या बियाच्वंगु टिम खः– नेपोली । थन नं छगू चरणया कासा ल्यं दनि । लिगया अन्त अन्त पाखे छुं कासाय् नेपोलीया प्रदर्शन भचा कमजोर जुइवं युभेन्ट्सयात अःपुगु खः ।

ल्यं दुगु छगू चरण न्ह्यः बायर्नया ९२ ल्याः थ्यंगु दुसा नेपोलीया ८८ । थुकिया अर्थ नेपोलीं युभेन्ट्सयात त्याकेफइमखु । थुगुसीया विश्वकपय् इटाली मदु, व छनोट जुइत असफल जुल । सायद थुकिया खराब लिच्वः छुं हद तक अनया लिगय् नं खनेदत ।

सम्बन्धित बुखँ

LEAVE YOUR COMMENTS