कंगोय् हाकनं इबोला खनेदत

प्रजातान्त्रिक गणतन्त्र कंगोय् हाकनं ज्यानमारा ल्वय् इबोलाया संक्रमण खनेदुगु दु । कंगोया झिगू लाख जनसंख्या दुगु उत्तर पश्चिमय् लाःगु ब्यान्डा शहरय् इबोलाया संक्रमण खनेदुगु स्वास्थ्य मन्त्रीं धाःगु दु । थुगु शहरय् संक्रमण खनेदयेवं इबोला संक्रमणया घटना न्हूगु चरणय् दुहां वंगु खँ स्वास्थ्यकर्मीतय्सं धाःगु दु ।

थुगु लाया सुरुपाखे ब्यान्डा शहर स्वयां १५० किलोमिटर तापाक लाःगु ग्रामिण बस्तीइ इबोला संक्रमणया न्हापांगु घटना खनेदुगु खः । थ्व लिपा आःतकया दुने इबोलां २३ म्हेसिया ज्यान वनेधुंकूगु दु । मेखे विश्व स्वास्थ्य संगठनं छ्वःगु परीक्षणय् चरणय् लानाच्वंगु इबोलाया प्यद्वः भाइल खोप बुधवाः जक कंगोय् थ्यंगु दु ।

सन् २०१४ य् पश्चिम अफ्रिकाय् इबोलाया महामारी खनेदुगु इलय् थ्व खोपया परीक्षण सफल जूगु खः ।कंगोया स्वास्थ्य मन्त्रीं शहरी क्षेत्रय् इबोला खनेदुगु पुष्टि याये न्ह्यः हे ग्रामिण क्षेत्रय् छगू अन्तिम संस्कार ज्याझ्वलय् ब्वति कयाः ब्यान्डा लिहां वःम्ह मनूयाके इबोला संक्रमण खनेदुगु विवरण वःगु खः ।

थ्वहे दथुइ विश्व स्वास्थ्य संगठनं तसकं खराब स्थिति वयेफुगु धासें चिन्ता प्वंकूगु दु । संगठनं थःम्हं बचं बियातःगु च्याद्वः भाइल खोप मध्ये न्हापांगु किस्ता कथं प्यद्वः भाइल खोप अन थ्यंकूगु खः ।विश्व स्वास्थ्य संगठन व कंगो इबोलां संक्रमित व उमिगु सम्पर्कय् दुपिं तःधंगु ल्याखय् मनूतय्त गुलिफु याकनं खोप बीगु कुतः यानाच्वंगु दु ।

कंगोय् आः खनेदुगु इबोला संक्रमणं सन् २०१४ निसें २०१६ तक पश्चिम अफ्रिकाय् खनेदुगु थुगु ल्वय्या भयावह महामारीयात हाकनं लुमंकाबिउगु दु । उबलय् थ्यंमथ्यं झिंछद्वः मनूतय् ज्यान वंगु खःसा नीच्याद्वःम्हेसित संक्रमण जूगु खः ।

सम्बन्धित बुखँ

LEAVE YOUR COMMENTS