सिन्डिकेट चिइकेधुंकाः ५० गू कम्पनी जक दर्ता

येँ – नेपाल यातायात क्षेत्रय् सिन्डिकेट अन्त्य जूगु घोषणा याःगु निवाः दुने थ्यंमथ्यं ५० गू यातायात समिति जक कम्पनी कथं दर्ता जूवंगु खँ यातायात व्यवस्था विभागं धाःगु दु । थ्वयां न्ह्यः कम्पनी दर्ता जूगु ११८ गू फुक्कं न्हूगु कम्पनी जूगु खँ धाःगु दु । देन्यंकं धाःसा न्यासलं मल्याक यातायात समिति व संघ संचालनय् वयाच्वंगु अनुमान विभागया दु ।

मेखे व्यवसायीतय्सं धाःसा सरकारया हे ढिलासुस्तीया कारणं कम्पनी दर्ता यायेत अन्योल जुयाच्वंगु खँ धाःगु दु ।
व्यवसायीतय्कथं सिन्डिकेट अन्त्य यायेगु इलय् जूगु सहमति कार्यान्वयन यायेत दयेकूगु कार्यदलया बैठक तकं आःतक च्वनेमफुनिगुलिं कम्पनी दर्ता प्रक्रिया नं लिबानाच्वंगु खः ।

यातायात व्यवस्था विभागया महानिर्देशक रुपनारायण भट्टराई धाःसा व्यवसायीतय्त कम्पनीइ वनेत छुं समस्या मदुगु खँ धयादीगु दु । सरकारं सार्वजनिक सवारी साधन चले यायेगु निंतिं कम्पनीइ दर्ता यायेत असार मसान्त तकया ई बियातःगु दु । व्यवसायीतय्सं सरकारं थःपिंसं याःगु प्रतिबद्धता नं पूमवंगु खँ धयाच्वंगु दु ।

उमिगु कथं समितिया बैंक खाता रोक्का यानातःगुलिं न्हियान्हिथं जुयाच्वंगु सवारी दुर्घटना लिपा यायेमाःगु उपचार व बीमाया निंतिं तकं खर्च यायेफयाच्वंगु मदु । सरकारं थ्व समस्या याकनं ज्यंकाबीमाःगु माग नेपाल यातायात व्यवसायी राष्ट्रिय महासंघया दु ।विभागं धाःसा बैंक खाता फुकुवा यायेगु थःपिनिगु क्षेत्राधिकारय् मलाःगु व थज्याःगु छुं सहमति नं जूगु मदु धयाच्वंगु दु ।

सम्बन्धित बुखँ

LEAVE YOUR COMMENTS