आलुवः मीम्हेसित जुजुं यंकल

जिमि मांया नां तुल्सीमाया महर्जन, जिमिा बाःया नां सानु महर्जन । लगमय् इनाखा धइगु त्वाः दु, अनं भचा दुहां वन कि माकःगल्लि वइ, अनं नं दुहां वन कि खलक्यब वइ, अन हे जिमिगु छेँ । जि ९१ सालया म्हपुजाकुन्हु बूगु । देशय् ९० सालय् तःभुखाय् ब्वःगु झिला लिपा । तःभुखाचं जिमिगु छेँ मदुं हँ ! किला (अंगः) छगः जक दुन हँ ! मामं कनातःगु । जिमिगु छेँय् कापः थायेगु तां दु, नेपाली तामय् मां व निनिपिंसं कापः थाइ ।

जिमि थानाकापःया जांघावाल सुरुवाः न्ह्यायेगु, भान्तां लँ फीगु । बुट्टा मदुगु मारचाः सुइगु । भ्वय् वनेबलय् जक वहःया कल्लि न्ह्यायेगु, पञ्चरत्नया चुरा न्ह्यायेगु ।जिपिं माकःखलःत, छाय् अथे धाःगु मसिउ । बाज्यापिंसं माकः लहिउगुलिं ला । अथेला जिपिं ज्यापुतय् दथुइ पाछै खलः दु, फकं खलः दु । बकुलाः खलः नं दु । बाली पीपिंत नां बियातःगु ला, व जिं मसिल ।
जिमिगु खलक्यब तकू, चुकथें च्वं । अन वा पायेगु थाय् खः । जिपिं म्हितेगु थाय् नं खः ।

जि व केहें छम्ह त्वाःया पासापिंनाप घ्वाइँकासा, सुलाकासा, तेलकासा, यकंधाला म्हितेगु ।जिमि टेकुइ च्यापी झिपी बुँ दु, बुँइ निखा बल्चा नं दु । मां–बाः, बाज्या व ककापिंसं बुँइ ज्या याइ । अगः नं दु, अन बाः व बाज्यां स्वइ । आँय्पा, अपा, टायल, नं छी, यलय् च्वंपिं मनूत वयाः ज्या याः वइ । न्हापा न्हापा टेकुइ फाँट फाँट बुँ जक छेँ, अस्पताल छुं नं मदु । दुवातय् प्यकालँ दु, अन सिम छमा दु, छपु लँ त्रिपुरेश्वर वनेगु, छपु लँ कालिमाति वनेगु, छपु सी लँ (सिथं यंकीगु लँ) अनं जिमिगु बुँ वनेगु ।

अले छपु उत्तरपाखेया लँ नाय्भाच्व त्वाः वनेगु । नाय्भाच्व त्वालं नाय्तय्सं टेकु दोभानय् म्येय् ज्वये हइ । बागमति खुसि तबाला, लः यच्चुसेच्वं । बागमति खुसि व विष्णुमति खुसि ह्वंगु थाय् जूगुलिं टेकु दोभान धाःगु । अन दक्व जातया दिप दु । जिपिं ज्यापुतय्गु दिप धाःसा भचा उखे विष्णुमति खुसि सिथय् लाः वं । जोगीतय् सीम्ह ल्हाकीगु थाय् नं दु । खुसि सिथय् सतः नं दु ।

जि न्हय्दँ ति दुबलय् टेकु दुवातय् च्वंगु सिमाय् शुक्रराजयात यख्खानातःगु खना । सुथय् जा नयाः मांनापं बुँ वनाच्वनागु । सिमाय् मनू छम्ह यख्खानातल, यख्खानातःगु खनाः गपाय्सकं ग्यातका । मनूयात भ्वंमाः छमाः नं क्वखायेकातःगु दु, अले फसं यानाः व सीम्ह फान्टांफान्टां सनाच्वन । स्वःवःपिं मनूत म्वःम्वः दु । जिमि बाःनं धाःगु चान्हय् १२ बजे ती हे शुक्रराजयात मोटरय् तया हयाः सिमाय् यख्खागु हँ ! बुँया बल्चाय् च्वँच्वंम्ह जिमि बाः नं खनागु हँ ! स्वये ग्यानाः बांलाक मस्वया हँ ! बुँ वनेबलय् सिमाय् मनू यख्खानातःगु लु ल्वःमंके मफुत जिं । आतक नं लुमनाच्वं ।

जि खुदँ दुबलय् इहि याःगु, गुदँ दुबलय् बियाछ्वल । भम्चा जुयाबलय् तासया जामा सिनागु, तासया लं फिनागु । छ्यनय् शीरबन्दी अले जन्तर छपु क्वखायागु । दुलिइ च्वनाः वनागु । समिलु, लमि, माजु व जन्ति वःपिं अले ज्यापु बाजं खलःत दक्व दू नापनापं वनेगु चलन । निम्ह मनूतय्स. दू क्वबी, दुली लासा फुंग दु, जि मज्जां ग्वारातुलाः वनागु ।

क्वहितिया अष्टनारां महर्जननाप जिगु ब्याहा जुल । व झिंस्वदँ दुम्ह । ब्याहा याना वये धुंकाः तिनि जितः बाः¥हाः तल । थुखेया छेँय् देसि तामं थाज्या यायेगु । जनी, गा, पर्सि (छिका), लं थःपिंत जक थायेगु । निता स्वता रंगया कापः थानाः व कापःया लं सुयाः भ्वय् वनेबलय् फीगु । ढाका कापः लिपातिनि वल । स्वब्वः दुगु ढाकाया गां न्ययेगु । धोब्यातय्थाय् तुयुगु गा थ्वकेगु (तुइसे च्वंकेगु) । कापः लाकां न्ह्यायेगु । सितापाइलाय् बुँ यक्व दु, अन ज्या याः वनेगु ।

बुँज्या याः वइपिंत छन्हुया स्वानाः (१२ पैसा) ज्याला बीगु । बुँ वनेबलय् कःनि–मुस्या सियाः, गुन्द्र वालाः, छुचुंमरि, बजि, आलु वालाः, स्वंमाय् थ्वँ ज्वना वनेगु, न्हिनय् नयेत, नकेत । मुगः ज्वनाः खापाय् दायेगु ज्या यक्व याना । थःछेँ त्वालय् माकः तुं दु, सुथय् ख्वाः सिलेत, चिप भारा सिलेत, वसः हीत, अनया लः सालाकायेगु, त्वनेत धाःसा इनाखा त्वालय् वनाः न्हाय्पं ज्वनाः तीगु हितिइ लः काः वनेगु । आः माकः तुं छचाःलिं छेँ दत, तुंथिइ लः नं मंत ।

क्वहितिइ धाःसा थपाय्मछिं धाःगु हिति दु । त्वालय् च्वंपिं सकसिनं अन हे लः काः वइगु, आतक नं क्वहितिइ लः वःनि । क्वहितिया उखे नं थुखे नं क्यबया क्यब, तरकारि व फलफुल सइगु । व हे क्यबया पश्चिमपाखे लिपा परोपकार स्कुल दयेकल । दक्षिणपाखे क्यब भचा ल्यं दनि । कुमारि सालीबलय् जैसिदेगलय् च्वनाः स्वयेगु । न्हिनय् १२ बजे जुलकि लँ पनी । न्ह्यःने प्यम्ह सल दइ, लिउने पल्टन वइ । स्वम्ह किसि हइ, दथुइ च्वंम्ह किसिम्हय् जुजु दइ, जुजुया नां मसिउ ।

व जुजुं झ्यालं ल्यासेत खनकि ध्यबा ह्वली । अले झातापाःद्यः, गणेद्यः व दबुलिइ नं ध्यबा ह्वली । जैसिदेगः न्ह्यःने सिद्धि द्यः फल्चाय् आलुवः छुनाः मीम्ह मिसायात व जुजुं ययेकाः ब्वनायंकल धाःगु न्यना । लिपा व मिसाया नां ‘आलुवः महारानी’ जुल हँ !जि मस्तय्त बुँइ ज्या यायेमाःगुलिं आखः ब्वंके मछ्वया, जि नं बुँइ वनेमाःगुलिं आखः ब्वं मवनागु, आः बुँ नं मदया वन, छय्पिं स्कुल वन ।

सम्बन्धित बुखँ

LEAVE YOUR COMMENTS