रामायण सर्किट छन्हु लिपा हे बन्द

येँ – भारतीय प्रधानमन्त्री नरेन्द्र मोदीया जनकपुर भ्रमणया इलय् नेपाःया प्रम व भारतीय प्रमं मंकाः रुपं उलेज्या यासें सुरु जूगु रामायण सर्किटया गाडी छन्हु चले जुयाः बन्द जूगु दु । वंगु वैशाख २८ गते शुक्रवाः धार्मिक पर्यटकत ज्वनाः नेपाःस्थित रामया ससः जनकपुरं सुरु जुयाः रामया राजधानी अयोध्या तक वंगु पर्यटक गाडीयात उत्तर प्रदेशया मुख्यमन्त्री योगी आदित्यनाथं लसकुस याःगु खः ।

प्रधानमन्त्री मोदीया भ्रमणया झ्वलय् धार्मिक पर्यटक ज्वनाः वंगु गाडी सिम्बोकिल जक जूगु धासें निरन्तर चले यायेगु निंतिं आपालं समस्या दनिगु खँ धाःगु दु । नेपालं ५०० किलोमिटर ताःहाकःगु उगु रामायण सर्किटय् गन गन स्टेसन तयेगु धइगु बारे तकं छलफल याये मानिगु जुयाः आः थथें चलेमयायेगु खँ धाःगु दु ।

थ्व सर्किटया बारे न्हापांनिसें चर्चा जुयाच्वंगु खःसां प्राविधिक रुपं छुं नं कथंया तयारी मजूगुलिं तत्काल गाडी चले जुइगु सम्भावना मदुगु खँ धाःगु दु । यदि उगु सर्किटय् नियमित गाडी चले जुल धाःसा नेपाःयात फाइदा जुइगु खँ धाःगु दु । थ्व सर्किटय् भगवान रामया जीवनीलिसे स्वाःगु नेपाः, भारत व श्रीलंकाया थीथी थासय् छक्वलं वये–वने याइगु व्यवस्था यायेत्यंगु खः ।