सन्दीप विश्व ११य् छनोट

येँ – नेपाली लेग स्पिनर सन्दीप लामिछाने वेस्ट इन्डिज विरुद्ध जुइगु कासाया निंतिं विश्व ११ टिमया निंतिं छनोट जूगु दु । भारतय् जुइगु व्यावसायिक क्रिकेट धेंधेंबल्लाः आइपीएलय् म्हितीगु जुसां निसें अन्तर्राष्ट्रिय रुपं चर्चाय् वयाच्वंम्ह लामिछानेयात आइसीसीं वेस्ट इन्डिजय् रंगशाला दयेकेगु निंतिं ग्वाहालि मुंकेत जुइगु कासाया निंतिं छनोटयाःगु खः ।

थ्व कासा वइगु मे ३१ तारिख इंग्ल्यान्डया प्रतिष्ठित रंगशाला लर्डस क्रिकेट मैदानय् जुइ । कासा टि–२०या शैलीं जुइ थ्व कासा पाखें मुंगु ध्यबा थगुने तच्वःगु समुद्री वाःफय् वयाः दुंगुं वेस्ट इण्डिजया न्यागू रंगशाला पुनर्निर्माणय् खर्च याइ ।

झिंन्हय्दँया सन्दीपं विश्व ११ टोली इंग्ल्यान्डया इओन मोर्गन, पाकिस्तान शाहिद अफ्रिदी व शोएब मलिक, बंगलादेशया तमिम इकवाल, भारतया दिनेश कार्तिक व हार्दिक पाण्ड्या, अफगानिस्तानया रशिद खान, न्यूजिल्यान्डया मिचेल म्याक्लिनगन व लुक रोन्ची, श्रीलंकाया तिसरा परेरा लिसें म्हिती । विश्व ११ टिमया नेतृत्व इंग्ल्यान्डया मोर्गनं याइ ।

वेस्ट इन्डिजया टोलीइ क्रिस गेल, सामुएल बद्री, कार्लोस ब्राथ्वेइट, एभिन लुइस, मार्लोन सामुएल्स व आन्द्रे रसेल थेंज्याःपिं कासामि दइ ।
दिल्ली डेयरडेविल्सपाखें आइपिएलय् न्हापांगु कासा म्हितूबलय् सकसियां नुगः त्याकेत ताःलाःम्ह लामिछाने आइपिएल धुंकाः क्यारेबियन लिगय् म्हितीगु पक्का जुइधुंकूगु दु । तर थ्व स्वयां न्ह्यव हे वेस्ट इण्डिज विरुद्धया कासाया निंतिं विश्व ११या टोली छनोट जूगु खः ।
‘थ्व नेपाः व नेपाली क्रिकेट ह्यःमितय् निंतिं तःधंगु सम्मान खः’ विश्व ११ टोली लायेवं लामिछानें धाःगु दु ।

सन्दीपं सन् २०१६ हे लर्ड्सय् म्हितेधुंकूगु दु । लर्डस्य् म्हितेगु सकलें क्रिकेटरतय्गु म्हगस जुइ । सन्दीपं धाःगु दु, ‘जितः विश्वास दु भविष्यय् नं जितः थज्याःगु ह्वःताः चूलाइ जुइ । गुकिं जिगु क्षमता अभिवृद्धि यायेत व देय्यात अन्तर्राष्ट्रिय रुपं म्हिसीका बीत ग्वाहालि याइ ।’

सम्बन्धित बुखँ

LEAVE YOUR COMMENTS