विश्वकप २०१८ फाइनल

केरुङ–येँ रेलमार्गया अध्ययन सुरु

येँ – चीनया केरुङं येँय् तक रेलमार्ग दयेकेगु निंतिं प्रारम्भिक अध्ययन सुरु जूगु दु । चीनया राष्ट्रिय रेल प्रशासनं केरुङ–येँ रेलमार्गबारे अध्ययन सुरु यायेधुंकूगु खँ भौतिक पूर्वाधार तथा यातायात मन्त्रालयं धाःगु दु । थ्व अध्ययन स्वलाया दुने क्वचाइगु खँ नं धाःगु दु ।

नेपाःयात रेलमार्गं स्वायेगु निंतिं चीनलिसे जुयाच्वंगु समझदारी कथं वंगु वालय् चिनियाँ प्राविधिक पुचलं नेपाःया उच्चस्तरीय अधिकारीतलिसे सहलह याःगु खः । भौतिक तथा पूर्वाधार मन्त्रालयया अधिकारीत चीनय् हे वनाः थुकियात कयाः सहलह यानावःगु खः ।भौगोलिक बनावटया कारणं दयेके थाकुइगु व तसकं थिके जुइगु तायेकातःगु थ्व रेलमार्ग दयेकेगु लगानी गुकथं यायेगु धयागु बारे धाःसा प्रधानमन्त्री केपी ओलीया चीन भ्रमणया इलय् क्वःछिइगु खँ धाःगु दु ।

सहलहय् सहभागी यातायात मन्त्रालययाा सचिव मधुसुदन अधिकारीं वइगु स्वला दुने भौतिक पूर्वाधार अध्ययनया न्हापांगु प्रतिवेदन वइगु खँ धयादीगु दु ।बिबिसीलिसे खँ ल्हासें वय्कलं धयादीगु दु, ‘अध्ययन व स्थलगत अवलोकनया ज्या जुयाच्वंगु दु । वइगु अगस्ट दुने प्रारम्भिक प्रतिवेदन पेश यायेगु ज्याझ्वः दु ।’

समुद्र सतहं ४ हजार मिटर च्वये लाःगु केरुङं १५ सय मिटर जक च्वय् लाःगु येँय् तक रेलमार्ग दयेकेगु तसकं थाकुइगु खँ धाःगु दु । थ्व रेल दयेकेगु निंतिं भौगोलिक स्थिति जक मखु लगानीया नं चुनौती दु ।रेल विभागया महानिर्देशक अनन्त आचार्यं प्रधानमन्त्रीया चीन भ्रमणया इलय् लागतया विषयय् खँ जुइफु धयादीगु दु ।

वय्कलं धयादीगु दु, ‘खर्च छु मोडालिटीइ यायेगु धयागु विषयय् निर्णय मजूनि । याकनं जुइत्यंगु प्रधानमन्त्रीया चीन भ्रमणया इलय् थ्व विषयय् खँ जुइ धयागु जिमिसं आशा यानागु दु ।’

चीन–नेपाल स्वाइगु प्रमुख व्यापारिक नाका जुयाच्वंगु केरुङं येँ तक रेलमार्ग दयेकेगु बारे तत्कालिन परराष्ट्रमन्त्री कृष्णबहादुर महराया पालय् निर्णय जूगु खः । आःया परराष्ट्रमन्त्री प्रदीप ज्ञवालीं नकतिनि यानादीगु चीन भ्रमणया इलय् नं थ्व विषयय् सहलह जूगु खः । थ्व रेलमार्ग येँय् थ्यनेवं थुकियात पोखरा जुयाः लुम्बिनी तक विस्तार यायेगु योजना दु ।

सम्बन्धित बुखँ

LEAVE YOUR COMMENTS