शिलखाना दुने लुया वःगु चैत्य व द्यः सुरक्षित

येँ – थनया लगमय् पुलांगु दरवार थुनाः दयेकीगु न्हूगु पार्कय् अन हे तयातःपिं ल्वहंयापिं आकर्षक द्यः व चैत्य नं पुनः पलिस्था याइगु जूगु दु । उगु थासय् तत्कालिन प्रधानमन्त्री भिमसेन थापाया किजा रणबहादुर सिंह थापां थःगु दरवार दने न्ह्यः हे थुपिं चैत्य व मूर्तित दुगु खः । थ्व मूलतः येँ मनपाया मेयर विद्यासुन्दर शाक्यया पुर्खा स्थानीय शाक्यतय्गु निजी ख्यः खः । थापा खलकं अन च्वंपिं शाक्यतय्त क्वय् नाय्पाच्वय् जग्गा बियाः थ्व थाय् थःपिंसं काःगु खः ।

तःदँ तक खाली जुयाच्वंगु उगु दरवार तःभुखाचय् बांमलाक क्षति जूगु खः । आः स्थानीय निकायं अन पूरा हे छेँ थुनाः क्यब दयेकेत्यंगु खः । उगु क्यबलय् न्हापांनिसें दुगु चैत्य व द्यः सकतां पुनः पलिस्था यायेगु खँ वडा अध्यक्ष उदयचुडामणि वज्राचार्यं कनादिल । स्थानीय मनूतय्सं धाःसा अन छगू शिलापत्र नं दुगु खःसां आः उगु शिलापत्र तनाच्वंगु खनेदु धाःगु दु । पुलांगु छेँ थुंबलय् शिलापत्र उखेथुखे लाःगु जूसां सुरक्षित हे दयेमाःगु खँ धाःगु दु ।

लगं लागा नेपाःया अतिकं पुलांगु वस्ती मध्ये छगू खः । लगंबहाः नेपाःया हे दकलय् पुलांगु बहाः खः । येँदेय् लिसे स्वानाच्वंगु ऐतिहासिक लागा ‘यँगाः’ थ्वहे लागाया जःखः लाः । उकिं थ्व थाय् तसकं ऐतिहासिक व पुरातात्विक महत्व दुगु लागा खः । नेपालय् राज्यपाखें न्हापांखुसी स्थानीय जनताया जग्गा अधिकरण यायेगु ज्या थनंनिसें हे शुरु याःगु धाइ ।

सम्बन्धित बुखँ

LEAVE YOUR COMMENTS