भारतीय सांसद थरुरयात कलाःयात आत्महत्या यायेत उक्से याःगु द्वपं

भारतीय सांसद व पुलांम्ह संयुक्त राष्ट्र संघीय कुटनीतिज्ञ शशी थरुरयात थः कलाःयात आत्महत्या यायेत उक्से याःगु द्वपं बिउगु दु । थरुरया कलाः सन् २०१४ य् सीगु खः । वया कलाः सुनन्दा पुष्करं आत्महत्या याःगु धाःसां प्रहरीं सुनन्दां आत्महत्या याःगु मखु हत्या जूगु धासें छानविन न्ह्याकाच्वंगु खः ।

दिल्ली प्रहरीं आः थरुरयात मिसायात अत्याचार याःगु व आत्महत्या यायेत उक्से याःगु विरुद्धया कानुनी प्रावधान कथं द्वपं बिउगु खः । थःत थज्याःगु द्वपं वयेवं कांग्रेस नेता थरुरं धाःसा म्वाःमदुगु द्वपं बिउगु धासें थुकिया जोडदार प्रतिवादन यायेगु खँ धाःगु दु ।

सामाजिक सञ्जालय् थरुरं च्वःगु दु, – प्यदँ स्वयां ताःहाकःगु अनुसन्धान लिपा थज्याःगु निष्कर्ष वःगु धयागु खं दिल्ली प्रहरीया अनुसन्धान प्रक्रिया व नियत बारे बांलाःगु खँ धाइमखु ।