विश्वकप २०१८

भारु हिलेत छुं ई पीत भारतया इनाप

येँ –  नेपालय् लानाच्वंगु प्रतिबन्धि न्यासः व द्वःछिवंगु भारु हिलेगु निंतिं कानुनी व प्राविधिक समस्या दुगुलिं छुं ई पिइत भारतीय पक्षं इनाप याःगु खँ सीदुगु दु । भारतीय प्रधानमन्त्री नरेन्द्र मोदीया नकतिनि जूगु नेपाल भ्रमणया झ्वलय् नेपाःपाखें थ्व विषय नं ल्ह्वंगु खः । थुकी सहलहया झ्वलय् भारतीय पक्षं छुं ई पिइत इनाप याःगु खः ।

सहलहय् सहभागी प्रधानमन्त्री केपी ओलीया सल्लाहकारपिंसं वइगु असोज तकया थ्व समस्या ज्यनीगु विश्वास प्वंकूगु दु ।
प्रधानमन्त्रीया सल्लाहकारतय्सं असोज दुने भारु हिलेफइगु आशा याःसां नेपाल राष्ट्र बैंक धाःसा विश्वास यायेत तयार मदु । राष्ट्र बैंकया अधिकारीतय्सं भारु हिलेगु निंतिं थीथी चरणय् जूगु खँल्हाबल्हाया झ्वलय् कानुनी व प्राविधिक समस्या ज्यंकेत गाक्क सहलह जुइधुंकूगु धासें भारतं थ्व समस्या ज्यंकीगु धयागु खँ विश्वास मदुगु खँ धाःगु दु ।

मंकाः पत्रकार सम्मेलनय् प्रधानमन्त्री केपी ओलीं नं थः समकक्षी मोदीया न्हयःने प्रतिबन्धित भारु हिलेगु समस्या समाधान यायेत इनाप यानादीगु खः ।पत्रकार सम्मेलन न्ह्यः जूगु औपचारिक खँल्हाबल्हाय् भारतीय अधिकारीतय्सं छुं कानुनी समस्या दुगुलिं ध्यबा हिले लिबानाच्वंगु खँ धाःगु प्रधानमन्त्रीया राजनीतिक सल्हाकार विष्णु रिमालं जानकारी बियादीगु दु ।

झीगु देशय् थानाच्वंगु भारु झीगु कारणं मखु, भारतया कारणं थानाच्वंगु खः, उकिं ध्यबा सितिकं मवनेमा धकाः जिमिसं धयागु दु

वय्कलं धयादीगु बिबिसीलिसे खँ ल्हासें धयादीगु दु, ‘भारतीय पक्षं जिमिगु इनाप न्यनेधुंकाः छुं कानुनी पक्ष ल्यं दनी, उकियात ध्यानय् तये धयादीगु दु । झीगु देशय् थानाच्वंगु भारु झीगु कारणं मखु, भारतया कारणं थानाच्वंगु खः, उकिं ध्यबा सितिकं मवनेमा धकाः जिमिसं धयागु दु ।’

सल्लाहकार रिमालं वइगु असोज महिनाया दुने ध्यबा हिलेगु विषयय् प्रगती जुइगु खँ नं धयादीगु दु ।भारतीय सरकारं आकाझाकां न्यासः व द्वःछि वंगु भारतीय नोटय् प्रतिबन्ध तयेवं हे नेपाल राष्ट्र बैंकं भारत थ्यंक वनाः नेपालय् लानाच्वंगु भारु हिलेगु बारे सहलह याःवंगु खः । उबलय् हे सम्भावित कानुन व प्राविधिक पक्ष बारे सहलह जूगु खँ राष्ट्र बैंकया अधिकारीतय्सं धयाच्वंगु दु ।

सहलहय् सहभागी राष्ट्र बैंकया अधिकारीतय् कथं उबलय् भारतीय पक्षं प्रतिव्यक्ति प्यद्वःत्या भारु जक हिलाबीगु प्रस्ताव हःगु खः, तर कानुनी रुपं हे २५ हजार तक भारतीय ध्यबा हिले दइगु व्यवस्था दुगुलिं नेपाली पक्षं थ्व प्रस्तावयात अस्वीकार याःगु खः । लिपा नेपाली पक्षं भारतीय प्रस्तावयात स्वीकार यानाः पौ च्वःसां थुकिया लिसः तकं मबिउगु खँ राष्ट्र बैंकं धाःगु दु ।

राष्ट्र बैंकया डेपुटी गभर्नर चिन्तामणि शिवाकोटीं धयादीगु दु, ‘जिमिसं ध्यबा हिलेगु तरिकाया नमूना बियागुलिं छुं समस्या जुइथें मखना । छम्हेसिया २५ हजार स्वयां अप्वः मुनी मखु, काउन्टरपाखें ध्यबा हिलाबीगु नं मखु, ध्यबा हिलीम्ह मनूया ध्यबाया नम्बर, स्वंगू पुस्ताया विवरण, खाता नम्बर, सम्पर्क आदि कयाः जक ध्यबा हिलाबी ।

अय्सां छुं कि छुं समस्या क्यनाः हिलेगु ज्या लिबाकेगु वा बेवास्ता यायेगु यानाच्वंगु दु ।’नेपालय् बैंकिङ प्रणार्ली थ्यंमथ्यं साढे ८ करोड बराबरया जक भारु दु । तर सर्वसाधारणयाके धाःसा तःधंगु ल्याखय् ध्यबा दुगु अनुमान यानातःगु दु । नेपालय् ध्यबा हिलेगु सुविधा बिल धाःसा भारतय् सुचुकातःगु ध्यबा नं खुला सीमाया कारणं नेपाः दुत हयाः हिलेगुफु धासें भारतीय पक्षं नेपालय् च्वंगु भारु हिलेत नं आलताल यानाच्वंगु खः ।

 

सम्बन्धित बुखँ

LEAVE YOUR COMMENTS