‘थौंकन्हय्’ लय्पौया ६८ दँ बुदिं

येँ – नेपालभाषाया साहित्यिक लय्–पौ ‘थौंकन्हय्’ ६८ दँय् क्यंगु दु । थुकिया लसताय् थनया नेपाल प्रज्ञा प्रतिष्ठानय् छगू विशेष ज्याझ्वःया दथुइ बुन्हि हनेगु नापं ‘थौंकन्हय्’या विशेष ल्याःकनं चिनाखँ मुनाया नं पितब्वज्या याःगु खः ।
‘थौंकन्हय्’ लय्–पौया सम्पादक÷प्रकाशक रुक्मणी श्रेष्ठया सभापतित्वय् जूगु ज्याझ्वलय् मूपाहांकथं फणिन्द्ररत्न वज्राचार्य झायादीगु खः ।

ज्याझ्वलय् वरिष्ठ संस्कृतिविद् वाङ्मय शताब्दी पुरुष सत्यमोहन जोशी, साहित्यकारद्वय यज्ञरत्न धाख्वा व तिलकप्रसाद कायस्थपिंत दोसल्लां न्ययकोः हनापौ लःल्हाःगु खः । अथे हे ज्याझ्वलय् नेपालभाषा ख्यलय् न्हूपिं च्वमिपिंत प्रोत्साहन बीकथं नीस्वनातःगु ‘मञ्जुका स्मृति कोष’पाखें प्रयागमान हःपाः सिरपाः ‘छपाः क्यानभास’ बाखं विधाया निंतिं मदुम्ह श्यामदास प्रजापतियात लःल्हाःगु खः ।

ज्याझ्वलय् नवासें मूपाहां वज्राचार्यं पत्रिकाय् थीथी च्वमिपिंसं च्वया हइगु च्वसुइ तःगू भाय्लचं मछ्यःसे ब्वने अःपुक छगूस्तर कायम जुइकथं छगू हे जक भाय्लचं छ्यःसा बांलाइगु विचाः तयादिल ।पुष्प चित्रकारं लसकुस यानादीगु ज्याझ्वलय् थौंकन्हय् लय्पौया आतकया पिहां वःगु ल्याःयात कयाः समीक्षा नं याःगु खः ।

फणिन्द्ररत्न वज्राचार्य, प्रा. प्रेमशान्ति तुलाधर व समालोचक पूर्णकाजी ताम्राकारया पुचलं थौंकन्हय् लय्पौया आतकया ल्याःयात समीक्षा यानादीगु खः । ज्याझ्वलय् प्रयागमान स्मृति नेपालभाषा हःपाः सिरपाःया बारे लुमिनकुमार श्रेष्ठं नुगःखँ तयादीगु खः ।

सम्बन्धित बुखँ

LEAVE YOUR COMMENTS