विश्वकप २०१८

राजधानी क्वःछीत अध्ययन

अध्ययन समितिया दुजःतय्सं सार्वजनिक रुपं न्ववाये मदु

येँ – प्रदेश नं ३ या राजधानी दयेकेगु निंतिं सम्भाव्यता अध्ययन यायेत नीस्वंगु समितिं थःपिनिगु ज्या न्ह्याकेत म्हिगः सांसद दिपक निरौलायात सभापति ल्यःगु दु । म्हिगः च्वंगु समितिया बैठकं अध्ययनयात माःगु आचार संहिता व कार्यविधि नं दयेकूगु खँ धाःगु दु । थुगु समितिइ थीथी झिंस्वंगू दलया प्रतिनिधिपिं दुथ्याःगु जानकारी सांसद बसन्त मानन्धरं ‘नेपालभाषा टाइम्स’ यात कनादीगु दु ।

आचार संहिता कथं समितिइ दुथ्याःपिं दुजःपिंसं प्रतिवेदन तयार मजूतलें गुगुं नं थाय्या बारे लबिङ यायेगु वा उकिया बारे गुगुं कथं सुझाव सार्वजनिक यायेमदइगु खँ धाःगु दु । समितिया दुजः बसन्त मानन्धरं ‘नेपालभाषा टाइम्स’यात कनादी कथं प्रदेशया राजधानी दयेकेगु निंतिं थीथी आधार नं तयार जूगु दु ।

प्रदेशया राजधानी दयेकेत अध्ययन यायेगु झ्वलय् विशेषतः नुवाकोटया विदूर, ख्वपया बोडे व काभ्रेया बनेपा व थौंकन्हय् अस्थायी राजधानी जुयाच्वंगु हेटौडायात कयाः विशेष रुपं सहलह ब्याकेगु खँ जुयाच्वंगु जानकारी नं वय्कलं बियादीगु दु ।

वय्कलं कनादी कथं थःपिंसं अध्ययन यायेगु झ्वलय् भूगोल, सम्भावित पूर्वाधार, जनसंख्याया अवस्था, सेवा सुविधाया सहजता व झिंस्वंगुलिं जिल्लाया जनतायात सुगम व सहज जुइकथं लिसें उपलब्ध जुइगु साधन स्रोत आदियात कयाः अध्ययन यायेगु व वयां लिपा जक थःपिनिगु सुझाव बीगु खँ कनादीगु दु ।

लिसें वय्कलं निर्वाचित जनप्रतिनिधि, मानवशास्त्री, भूगोलविद्, विकासविद् आदिपिं लिसें सहलह यानाः थःपिनिगु प्रतिवेदन तयार जुइगु खँ नं कनादीगु दु । लिसें वय्कलं नेपाल सरकारं प्रदेशया चुनाव न्ह्यः राजधानी गन तयेगु पाय्छि जुइ धकाः दयेकूगु समितिया प्रतिवेदनयात कयाः अध्ययन यायेगु खँ कनादीगु दु ।

प्रदेशया नांया खँय् नं विवाद

थौंकन्हय् हेटौंडाय् तयातःगु प्रदेशया राजधानी अनं मेथाय् चीके माल धकाः स्वयम् प्रदेश सरकारया मन्त्रीत हे सक्रिय जुयाच्वंगु कारणं सरकारं हथासं थ्व समिति हे गठन यानाः न्ह्याके बिउगु खः । उकथं हे थ्व प्रदेशया नां छु तयेगु धइगु खँय् नं अझं विवाद कायम जुयाच्वंगु दु ।

प्रदेशया नां तयेगु सवालय् धाःसा आः तक छुं कमिटी गठन याःगु मदुनि । नांया विवाद समाधान यायेगु लागिं दुनें दुनें ज्या जुयाच्वंगु दुसां पिने उकिया बारे छुं खँ धाःसा पिहां वःगु मदुनि । नांया सवालय् नं विवाद मजुइक ज्या यायेगु कुतः जुयाच्वंगु खँ धाःगु दु ।

सम्बन्धित बुखँ

LEAVE YOUR COMMENTS