विश्वकपया थिम म्येँ ‘कलर्स’ रिलिज

येँ- फिफा विश्वकप फुटबल २०१८या निंतिं कोकाकोलापाखें प्रायोजित थिम म्येँ ‘कलर्स’ सार्वजनिक जूगु दु । थ्व म्येँ अमेरिकी पपस्टार जेसन डेरुलों हालातःगु दु । विश्वय् लोकंह्वाःम्ह जेसनं विश्वकपया अफिसियल भिडियो कलर्सया म्युजिक भिडियोया निंतिं थःगु जन्मभूमि हाइटी वनाः सुटिङ याःगु दु ।
थ्व म्येँ विश्वकप २०१८ य् कोकाकोला एन्थम जुइ । भिडियो रिलिज यासें थ्व म्येँया च्वमि व गायक जेस्न डेरुलों थःगु सामाजिक सञ्जालय् च्वःगु दु, ‘थ्व म्येँ च्वयाबलय् जिगु दिमागय् एकताया बिचाः यानाः च्वयागु खः ।’
भिडियोया निर्देशन मायामिया दि सिटाडेलेलाफेरिरे –हाइटीया दकलय् तजाःगु थासय् च्वंगु गढ) याःगु खः । हाइटियन मूलया हे लोकंह्वाःम्ह गायक व अभिनेता वाइक्लेफ जेनयात नं थ्व म्युजिक भिडियो गितार थानाच्वंगु खंकेफइ ।
थ्व भिडियोय् संसारन्यंकंया मनूत थःथःगु देय्या ध्वाँय् च्वनाः सुन्दर कासाया दकलय् तःधंगु धेंधेंबल्लाः न्ह्याकेत न्ह्याःवनाच्वंगु खंकेफइ ।
दुगु म्येँया बोलय् विविधताया प्रसंशा यानाः नापं न्ह्याःवनेगु सन्देश बियातःगु दु । विश्वकप धयागु न्ह्याइपुकेगु ई खः, सकलें जानाः न्ह्याइपुकाः थःत यःगु टिमया सर्पोट यानाः थुगु पलयात रमणीय दयेकेगु खः ।
कोकाकोला वंगु ४० दँ न्ह्यवंनिसें विश्वकप फुटबल लिसे आवद्ध जुया वयाच्वंगु दु ।
जेसन डेरुलां धाःगु दु, ‘कोकाकोलालिसे जानाः फिफा विश्वक २०१८या एन्थम म्येँ हालेगु जिगु अहोभाग्य खः । थ्व धेंधेंबल्लाःलिसे स्वानाच्वनेगु तसकं सुखद अनुभव खः । थुकी संगीत बिइदयाः जिं थःत तसकं सम्मानित जूगु महसुस याना ।’

सम्बन्धित बुखँ

LEAVE YOUR COMMENTS