दृष्टिविहीनयात मोबाइल

येँ – क्रियाशील नेपाल नांया संस्थां मिखां मखंपिं विद्यार्थीतय्त मोबाइल वितरण याःगु दु । महिला, बालबालिका व ज्यष्ेठ नागरिक मन्त्रालय व येँ महानगरपालिकाया सहकार्यय् संस्थां मिखां मखंपिंत एन्ड्रोइड मोबाइल वितरण याःगु खः ।

अपांगता जूपिनिगु शैक्षिक अधिकार प्रवद्र्धनया निंतिं संस्थां थन छगू ज्याझ्वःया दथुइ झिम्ह मिखां मखंपिं विद्यार्थीयात मोबाइल वितरण याःगु खः । मिखां मखंपिं विद्यार्थीतय्सं मोबाइलय् सफू डाउनलोड यानाः अध्ययन याये फइगु जूगु दु ।

मिखां मखंपिं विद्यार्थीतय् अध्ययन क्षमता अभिवृद्धि प्रविधिकरण व एन्ड्रोइड मोबाइल वितरण ज्याझ्वः संचालन याना वयाच्वंगु संस्थां आतकया दुने थीथी जिल्लाय् न्यासः स्वयां अप्वः मिखां मखंपिं विद्यार्थीयात एन्ड्रोइड मोबाइल वितरण याये धुंकूगु जानकारी बिउगु दु ।

ज्याझ्वलय् मन्त्रालयया महिला विभागया शाखा अधिकृत निरा अधिकारी व येँ मनपा, सामाजिक विकास विभागया प्रमुख नूरनिधि न्यौपानें मोबाइल वितरण यानादिसें विद्यार्थीया शिक्षाय् पहुँच दयेकेत फक्व ग्वाहालि यायेगु प्रतिवद्धता प्वंकादिल ।

सम्बन्धित बुखँ

LEAVE YOUR COMMENTS