सम्पदा स्यंकाः सम्पदा बचाउ !

येँ -थनया ऐतिहासिक सोह्रखुट्टे फल्चा स्यंकेधुंकाः आः वहे लागाया पुलांगु ल्वहंहिति दुगु थासय् हिति स्यंकाः सोह्रखुट्टे सतः दयेकेगु धकाः जूगु कुतःयात स्थानीय जनता लिसें सम्पदाप्रेमि पुचलं विरोध याःगु दु । थ्वहे खँय् विरोध यायेत म्हीग वंगु स्थानीय जनताया छगू पुचःलिसे खँ ल्हासें आः स्थानीय वडाया जनप्रतिनिधितय्सं उगु थासय् ल्वहंहिति नं कायम हे यानाः फल्चा नं दयेकेगु जुइ धकाः सहमति याःगु दु ।
ल्वहंहिति दुथाय् सोह्रखुट्टे फल्चाय् नं तयेगु धकाः हितियात पूवंक हे मदयेकाः बँय् फुक्क अप्पा लाना तयेधुंकूगु दु । वहे खनाः स्थानीय जनतां विरोध याःगु खः ।

छगू सम्पदा बचे यायेगु नामय् हानं मेगु सम्पदा स्यंकेगु कथं स्थानीय निकायं ज्या यानाच्वंगु खँय् सम्पदाप्रेमितय्सं आश्चर्य प्वंकूगु दु ।
थ्वहे झ्वलय् उगु लागाया अवलोकन याः वंगु सम्पदाप्रेमितय् पुचलं सोह्रखुट्टे फल्चा वास्तवय् न्हापा गन तयातःगु खः वहे थासय् हानं दयेकूसां जिउगु सुझाव न्ह्यःने तःगु दु । न्हापा फल्चा दुगु थासय् हे हानं फल्चा दयेकल धाःसां ट्राफिकया समस्या खास हे वइगु खने मदइगु जुयाः वहे थासय् दयेकूसां जिउ धइगु सुझाव वय्कःपिंसं बिउगु खः । पुलांगु हे थासय् सोह्रखुट्टे फल्चा हानं दयेकेगु धाःगु खँयात धाःसा वडा व प्रहरी ज्याकुथिं ययेकूगु मदु ।

सम्बन्धित बुखँ

LEAVE YOUR COMMENTS