विश्वकप २०१८

कुल्फीया साम्राज्य

वैशाखया लिपांगु वाः थ्यंलिसे तांन्वःगु अप्वया वःगु दु । गर्मीं थःगु साम्राज्य न्यंकाहःगु दु । थज्याःगु तांन्वःगु मौसमय् सिचुक छुं त्वने दःसा, छुं नये दःसा गुलि जिउ थें छितः नं जू जुइ । थज्याःगु इलय् छि न्ह्याथाय् थ्यंसां छिगु न्ह्यःने दइ – हिमालयन कुल्फी ।गर्मीं साम्राज्य न्यंका यंकाच्वं थें हिमालयन कुल्फीं नं नेपाः न्यंकं थःगु साम्राज्य न्यंका यंकाच्वंगु दु ।

‘उकिं नं छि न्ह्याथाय् थ्यंसां याउँक हिमालयन आइसया कुल्फी चूलाकेफइ । व नं दंक, भिंगु, साक्क’ कुल्फी उत्पादन याइगु हिमालयन आइसया प्रोपाइटर दुर्गालाल राजथलाया दावी दु, ‘जिमिगु कुल्फी स्वनिगःन्यंकं दक्वथासय् दु, अले नेपाःया पूर्व, पश्चिम दक्वथासय् वनाच्वंगु दु ।’

थ्यंमथ्यं नीदँ ति न्ह्यः थःगु छेँय् च्वंगु फ्रिजय् न्हापांखुसी कुल्फी जमे यानादीम्ह राजथलां उबलय् शायद हे जक सोचे याःगु खइ कि छन्हु थ्व हे कुल्फी नेपाःन्यंकं न्यना वनी धकाः ।ख्वपया कमलविनायकय् थः अबुजुया नपसः (चिकिचाधंगु होटल) दुगुलिं अन हे हुर्के जूम्ह भाजु दुर्गालाल राजथला २०५२ पाखे थःगु पुर्खौली छेँ ख्वप बालकोटया सिरुटारय् च्वंवल ।

अन हे चिकिचाधंगु किराना पसः चायेकल । मचाबलय् स्कुल वनेगु इलय् कमलविनायक, दत्तात्रयय् दयेकीगु कुल्फी नयाच्वंम्ह राजथलायात पसः चायेकेधुंकाः थःम्हं नं कुल्फी दयेकाः मीदःसा जिउ थें ताल । अले कमलविनायक, दत्तात्रयय् कुल्फी दयेकाच्वंगु स्वयागु भरय् थःगु छेँय् रिल बट्टाय् दुरु, खुवाः तयाः कुल्फी जमे यानादिल ।

न्हापांखुसी यानास्वःगु ज्या हे ताःलात । अले थःगु हे पसलय् तयाः छकूया न्यातका दामं मीगु सुरु यात । न्हिं सछि–सत्याकू दयेकीगु कुल्फी तुरुन्त हे चुइगु जुल । छुं दँ लिपा थःगु उत्पादन अप्वयेकादिल, अले साइकलय् तयाः न्ह्यनेसं लाःगु लोकन्थलीया छगू डेरी पसलय् नं तयेयंकल ।

लोकन्थलीइ थ्यंबलय् वय्कः उत्पादन कुल्फीया सवाः थःगु गामं पिहां वनाः बजार तक थ्यन । अले थनं निसें वय्कःया व्यापारं गति काल । लोकन्थली तक साइकलं थ्यंकूगु थ्व हे कुल्फीयात थौंकन्हय् च्यागः गाडीं देय्या थीथी थासय् थ्यंकाच्वंगु दु । लोकन्थलीं विस्तार कुल्फी थौंकन्हय् हिमालयन कुल्फीया नामं स्वनिगःन्यंकं जक मखु, विराटनगर, सिन्धुली, बर्दिवास, इटहरी, पोखरा, बाग्लुङ, वीरगन्ज, चपुर हेटौंडा थ्यनाच्वंगु दु ।

हिमालयन आइस सिजनया इलय् थौंकन्हय् न्हिं ६० निसें ८० हजार तक कुल्फी उत्पादन यानाच्वंगु दु । ‘माःसा न्हि निगू लाख तक उत्पादन यायेगु क्षमता दु’ भाजु राजथलां धाल । थःगु उत्पादनं बजाः काःगु कारण भाजु राजथलाया कथं थथे दु, ‘जिं गुणस्तरय् गुबलें सम्झौता मयानाः । सुरु उत्पादन यानाबलय् न्यातकां मियाच्वनागु कुल्फी थौैंकन्हय् नं न्यातकां मियाच्वनागु दु ।

झितका, झिंन्यातका वंगु नं दु । आः छक्वलं यक्व उत्पादन यायेगुलिं दंकं मीफयाच्वंगु दु ।’हिमालयन आइसं थौंकन्हय् कुल्फीया लिसें थीथी फ्लेवरया आइसक्रिम, चोकोबारलिसें धौ, पनिर नं उत्पादन यानाच्वंगु दु । न्हि द्वःछि लिटर दुरु खपत यानाच्वंगु दु । कुल्फीयात माःगु खुवा, दुरु पनौती, चापागाउँपाखें वयाच्वंगु दु ।

‘थौंकन्हय् प्रत्यक्ष रुपं जिं पीम्हेसित रोजगारी बियाच्वनागु दु । अप्रत्यक्ष रुपं यक्वसित रोजगारी चूलानाच्वंगु दु’ राजथलां थः याकःचां सुरु यानागु उद्योगं थौंकन्हय् थःगु गामय् च्वंपिंत रोजगारी बीफुगु खँ लसतां न्यंकल । हिमालयनया उत्पादन विस्तार यायेगु झ्वलय् थुकिया लगानी जक प्यंगू करोडं मल्याक थ्यनेधुंकल ।

याकनं हे हिमालयन दुरु नं पित हयेगु तयारी यानाच्वंगु दु । प्याकेजिङ यायेगु मेसिन फुक्क हयेधुंकूगु दु । छुं ई लिपा बजारय् दुरु नं वइगु खँ उद्यमी राजथलां कन । घरेलु उत्पादनया रुपय् देन्यंकं सलंसः थासय् कुल्फी उत्पादन जुयाच्वंगु दु । तर थुपिं उत्पादन चिकिचाधंगु छगू लागाय् जक सीमित जुयाच्वंगु दु ।

भाजु राजथलाया कथं थथे कुल्फी देन्यंकं थ्यंगु शायद हिमालयनया हे छगू जक जुइमाः । ‘आइसक्रिम ला यक्व उत्पादन देन्यंकं वनाच्वंगु दु जुइ, तर घरेलु उत्पादन थेंज्याःगु कुल्फी थुकथं देन्यंकं थ्यंगु मेगु मदु जुइमाः’ राजथलाया बिचाः दु ।
भाजु राजथलाया मेहनत, व्यवसायिक सोच, ग्राहकप्रति इमान्दारीतां हे घरेलु उत्पादनयात नं थुलिभनं विस्तार यायेफुगु दु । झीसं नं वय्कःया मेहनतया सवाः कायेगु मखुला ले सा ।

सम्बन्धित बुखँ

LEAVE YOUR COMMENTS