राज्यया एकलवादी सोच नं सिन्डीकेत हे खः

सरकारं यातायातया ख्यलय् एकाधिकारवादी ‘सिन्डीकेट’ प्रणालीयात थुना बिउगु दु । सिन्डीकेटवालातय्सं थःगु एकछत्र कायम यायेत अनेक हर्कत याइ । यातायात सेवा बन्द याइ । तर सरकारं कठोर तीव्रकदम न्ह्याकी । सिन्डीकेट प्रणाली भंग यानाः हे त्वःते । दृढ जुइ । मेखेर आम जनतां नं सिन्डीकेट प्रणाली अन्त्य यानाः हे त्वःतेगु सरकारया दृढ संकल्पप्रति सहमति क्यनी । समर्थन याइ । सरकारं न्ह्याकूगु पलाःयात प्यखेरं लसकुस याइ ।

बजाःयात थःगु नियनत्रणय् कयाः सिन्डीकेटवालातय्सं सम्पूर्ण यातायात सेवायात थःगु स्वार्थ अनुरुप न्ह्याकाच्वंगु दु । आः । यातायात सेवायात छम्ह संचालकं मनोमानी नियन्त्रणं पित हये । प्रतिस्पर्धात्मक वातावरण तयार जुइ । जनतायात अधिक सुविधा बियाः यातायात सेवा बीपिं न्हू न्हूपिं यातायातसेवीत खनेदइ । वइ । जनताया नुगलय् विश्वास दनी ।

यातायात सेवाय् दुगु सिन्डीकेट प्रणाली लिना छ्वयेगु सरकारया कुतः स¥हानीय जूसां पूर्ण सन्तोषया विषय जुइमखु । थौं । यातायात क्षेत्रय् जक मखु । अनेक अत्यावश्यक वस्तुया आपूर्तिया ख्यलय् नं सिन्डीकेट प्रणालीया बर्चस्व खनेदु । सरकारं यातायात ख्यलय् जक थःगु पलाः केन्द्रीत यानां मगाः । सरकारं सन्तोष व गर्व यायेगु ई मखुनि । मवःनि । आम जनतायात असर याइगु थीथी खयलय् विद्यमान सिन्डीकेट प्रणालीयात नं निर्मूल यायेमाः ।

यातायात क्षेत्रय् जक मखु । अनेक अत्यावश्यक वस्तुया आपूर्तिया ख्यलय् नं सिन्डीकेट प्रणालीया बर्चस्व खनेदु । सरकारं यातायात ख्यलय् जक थःगु पलाः केन्द्रीत यानां मगाः । सरकारं सन्तोष व गर्व यायेगु ई मखुनि । मवःनि । आम जनतायात असर याइगु थीथी खयलय् विद्यमान सिन्डीकेट प्रणालीयात नं निर्मूल यायेमाः ।

तरकारि बजाय् नं थौं पूर्णरुपं सिन्डीकेट प्रणाली सञ्चालित हँ ! न्हियान्हिथं मदयेक मगाःगु खाद्यवस्तु च्याम्ह–झिम्ह व्यापारीतय् ल्हाती लाइ । सम्पूर्ण बजाःया भाग्य इमिसं क्वःछी । जनता खुंखार व्यापारीतय् शिकार जुइ । इमिसं हइगु कृत्रिम मूल्यवृद्धिं जनतां दुःख सी । अथे हे स्वास्थ्य शिक्षाया ख्यलय् नं सिन्डीकेट प्रणाली हावी जुयाच्वंगु दु । विशेष यानाः नीजि स्कुलत मिले जुयाः फक्व शुल्क अप्वः कायेगु ज्या जुयाच्वंगु दु । कार्टेलिङ प्रथा छ्यलाच्वंगु दु ।

तर । धाइ । थौं हरके क्षेत्रय् थःगु प्रभाव जमे यानाच्वंपिं सिन्डीकेटवालातय्त जक दोषी खंकां मगाः । मजिउ । सिन्डीकेट प्रथायात थःगु अधिकार खंकाः बजाःयात थःगु स्वेच्छाचारी धंगं न्ह्याकाच्वंपिं सम्बन्धित साहु, महाजन, व्यापारीतय् लिउने ततःधंपिं राजनैतिक नेतातय् लिधंसा दयाच्वनी । अझ गुलिखे व्यापार संचालन देय्या शक्तिशाली मनूतय्सं पर्दा लिउने च्वनाः संचालन यानाच्वनी ।

यातायातया खँय् गुलिखे बससेवाया मालिकत दुनें दुनें देय्या राजनैतिक नेतात जुयाच्वनी । राजनीतिक उच्च शक्तिलिसे स्वापू मतसे सिन्डीकेट प्रणाली सम्भव जुइमखु । थ्व प्रणालीयात हांनिसें लिनाछ्वयेगु खःसा देशय् दयाच्वंगु थज्याःगु कुकर्म फस्ते यायेगु ज्याखँय् राजनीतिक नेतातय्सं ल्हाः तये मजिउ । ल्हाः तये दइमखु । आम जनताया राय जुइ ।

थौं । देय्या राजनीति हे सिन्डीकेट प्रणालीं न्ह्यानाच्वनी । राजनीतिइ हरेक दलया निम्ह प्यम्ह नेतातय् सिन्डीकेटया हावी खनेदइ । पार्टीइ लखंलख सदस्य दु धाइ । तर पार्टीया महत्वपूर्ण निर्णय दल दुनेया निश्चित सिन्डीकेटं याइ । मेपिं बहु सदस्यत मूकदर्शक जक जुइ ।

देशय् न्हू संविधान वइ । गुलि करोडं दयेकूगु संविधान खः थ्व ? दावा याइपिं दइ । यथार्थय् अथे जुइमखु । निम्ह प्यम्ह नेतातसें गोप्य छलफलं संविधान क्वःछी । संविधानसभाया सदस्यतय्त मात्र रबर स्टाय्म्प याइ । संविधान निर्माणय् इमि नं सहभागिता दु । क्यनेत प्रमाणया रुपय् इमित ल्हातिं टेबुल थाकेबी । गणितीय बहुमत चूलाकी । तर यथार्थय् संविधान सिन्डीकेटया दस्तावेज जुयाः खनेदइ । आम जनतां संविधानया सन्तोष काये दइमखु । फइमखु ।

यातायात ख्यलय् सिन्डीकेट चिइकाः छ्वयेगु सरकारया पलाःयात स¥हाना यासें फेसबुकय् छम्ह भाजुं प्रतिक्रिया प्वंकी । भाजुं धाइ, ‘यातायात जक मखु, देय्या राज्य संचालनय् नं जातीय, भाषिक, सांस्कृतिक सिन्डीकेट सोच, प्रणाली हावी जुयाच्वंगु दु । थुकियात चिइकेमाः । तर चिइकीम्ह सु ? फेसबुकय् न्ह्यथंगु भाजुया न्ह्यसलं तसकं गम्भिर राजनीतिक न्ह्यसः थनी । नेपाः बहुजाति, बहुसांस्कृतिक, बहुभाषिक, बहुधार्मिक देय् खः ।

देय् सकसियां साझा खः । जुइ । जुइमाः । थन फुक्क जाति भाषा, धर्म, संस्कृति समान रुपं विकास यायेगु नैसर्गिक अधिकार काये दयेमाः । देय् दुनेया थीथी जाति, संस्कृति, भाषा, धर्मया विकासं राष्ट्र गबलें नं कमजोर जुइमखु । सबल जुइ । बरु देय्या सर्वा·िन विकास खनेदइ ।

तर देशय् राज्यस्तरय् सिन्डीकेट मनोवृत्तिंग्रस्त एकलवादी सोचया हावी जुयाच्वंगु दु । थःगु फुक्क राष्ट्रिय, मेपिनिगु संकीर्ण, हानीकारक खनीगु राजनीतिक सिन्डीकेटवालातय् थौं शासन शक्तिइ दबदबा खने दइ । थुकियात हांनिसें लिना छ्वयेमाः । अन्यथा यातायातया सिन्डीकेटयात चिइकेगु सरकारया कुतः ‘ह्वाइटवास’ थें जक खनेदइ । पिने आकर्षक ।

दुनें दुनें कुमिचां भ्वाभः यायेत स्वयाच्वंगु राज्यस्तरया सिन्डीकेट प्रणालीयात हे अन्त्य याये हे माः । छेँ पिनें आकर्षक खने दयां छु याये ? दुनें भ्वाभः जुल कि ! छेँ गुगुं इलय् नं दुनी । दुनेफु । देय्यात राज्यस्तरीय सिन्डीकेट सोच, प्रणालीं मुक्त यायेमाः । थौंया गम्भिर राजनीतिक हाथ्या जुइ थ्व !

 

सम्बन्धित बुखँ

LEAVE YOUR COMMENTS